ବ୍ରହ୍ମପୁର, ୨୭।୪: ନବଦାସ ହତ୍ୟାକାଣ୍ଡ ଘଟଣା । ଦ୍ଵିତୀୟ ଥର ପାଇଁ ବ୍ରହ୍ମପୁରରେ ପହଞ୍ଚି ଜଣକ ପରେ ଜଣଙ୍କୁ ଯାଞ୍ଚ କରିଥିଲେ କ୍ରାଇମବ୍ରାଞ୍ଚ ଟିମ୍ । ୨୩ରୁ ୨୬ ତାରିଖ ପର୍ଯ୍ୟନ୍ତ ୪ ଦିନରେ ୧୪ ଜଣଙ୍କୁ ତଦନ୍ତ କରି ବ୍ରହ୍ମପୁରରେ ଛାଡ଼ିଛନ୍ତି । ଗତକାଲି ବ୍ରହ୍ମପୁର ଆଙ୍କୁଲିସ୍ଥିତ ଗୋପାଳଦାସଙ୍କ ପରିବାର ରହୁଥିବା ବାସଭବନରେ ଗୋପାଳଙ୍କ ସ୍ତ୍ରୀଙ୍କୁ କ୍ରାଇମବ୍ରାଞ୍ଚ ଜେରା କରିଥିଲେ । ପାଖାପାଖି ଘଣ୍ଟାଏ ସମୟ ଧରି ଜେରା କରିଥିଲେ । ପରେ ଗୋପାଳଙ୍କ ମାନସିକ ରୋଗୀ ଡାକ୍ତର ଚନ୍ଦ୍ରଶେଖର ତ୍ରିପାଠୀଙ୍କୁ ପାଖାପାଖି ୩୦ ମିନିଟ୍ ଜେରା କରିଥିଲେ କ୍ରାଇମବ୍ରାଞ୍ଚ । ଏମକେସିଜି ମେଡିକାଲ ମାନସିକ ରୋଗ ବିଭାଗରେ ପହଞ୍ଚି ଜେରା କରିଥିଲେ । ବିଭିନ୍ନ ଦିଗକୁ ନେଇ ତଦନ୍ତ କରାଯାଇଥିବା ସୂଚନା ଦେଲେ କ୍ରାଇମବ୍ରାଞ୍ଚ ଅତିରିକ୍ତ ଏସ. ପି ବିଜୟ କୁମାର ମଲ୍ଲିକ । ଗତ ୪ ଦିନ ଭିତରେ ଗୋପାଳ ଦାସଙ୍କ ଭାଇ, ପୁତୁରା, ପୁଅ, ଓ ଏସଆରଟିସି କର୍ମଚାରୀ, ଏଏସଆଇ, ମାନସିକ ରୋଗ ବିଭାଗ ଡାକ୍ତର ପ୍ରମୁଖ ୧୪ ଜଣଙ୍କୁ ଜେରା କରିଥିବା କୁହାଯାଇଛି ।
କହିରଖୁ କି, ପୂର୍ବତନ ମନ୍ତ୍ରୀ ନବ ଦାସଙ୍କ ହତ୍ୟା ମାମଲାରେ ପୁଣି ତଦନ୍ତ କରୁଛି କ୍ରାଇମବ୍ରାଞ୍ଚ । ଝାରସୁଗୁଡ଼ାରେ କ୍ରାଇମବ୍ରାଞ୍ଚ ଖୋଳତାଡ଼ କରିବା ପରେ ଏବେ ବ୍ରହ୍ମପୁରରେ ପହଞ୍ଚିଛି । ୩ ଦିନ ହେଲା ବ୍ରହ୍ମପୁରରେ ଡେରା ପକାଇ ଅଭିଯୁକ୍ତ ଗୋପାଳ ଦାସଙ୍କ ପରିବାର ଓ ତାଙ୍କ ସହ କଥା ହୋଇଥିବା ଲୋକଙ୍କୁ ଥାନାକୁ ଡକାଇ ପଚରାଉଚରା କରୁଛି । ଏଏସ୍ପି ବିଜୟ କୁମାର ମଲ୍ଲିକଙ୍କ ନେତୃତ୍ୱରେ ଏକ ଟିମ୍ ବ୍ରହ୍ମପୁରରେ ଗତ ୨୩ ତାରିଖରୁ ଆସି ଗୋପାଳ ଦାସଙ୍କ ପରିବାର ଲୋକ ଏବଂ ତାଙ୍କ ସହ କଥା ହୋଇଥିବା ବିଭିନ୍ନ ଲୋକଙ୍କୁ ଥାନାକୁ ଡକାଇ ଜେରା କରୁଛି ।
