ମାଲକାନଗିରି,୯/୫: ଦିଲ୍ଲୀର ଇଡି ଓ କ୍ରାଇମବ୍ରାଞ୍ଚ ଅଫିସର ପରିଚୟ ଦେଇ ମାଲକାନଗିରିର ଜଣେ ଶିକ୍ଷକଙ୍କ ଠାରୁ ୭୮ ଲକ୍ଷ ଟଙ୍କା ଲୁଟ୍ କରିବା ଘଟଣାରେ କ୍ରାଇମବ୍ରାଞ୍ଚ ପୋଲିସ ଗୁଜୁରାଟରୁ ୩ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ମହମ୍ମଦ ମାଜ ଜୁବେରଭାଇ ଘାନଚି(୧୮),ଠାକର କରଶାନଜୀ ଶୋଭାଜୀ(୪୮) ଏବଂ କୁରେଶି କରଶନଜୀ ଶୋଭାଜୀ(୩୧) ।
ସ୍ଥାନୀୟ ହାଇଟେକ କଲୋନୀର ମନୋଜ କୁମାର ଲାଉଡିଆ(୪୪) ଙ୍କୁ ୨୦୨୪ ମସିହାର ଅଗଷ୍ଟ ମାସରେ ଏକ ଅଜଣା ନମ୍ବରରେ ଫୋନ୍ କଲ ଆସିଥିଲା। କଲ୍ କରୁଥିବା ବ୍ୟକ୍ତି ଜଣକ ମିଥ୍ୟା ସୂଚନା ଦେଇ ଶ୍ରୀ ଲାଉଡିଆଙ୍କ ଫୋନ୍ ନମ୍ବରରେ ଅର୍ଥ ହେରଫେର ତଥା ମାନବ ଚାଲାଣ,ପରିଚୟ ଚୋରି,ଡ୍ରଗ୍ କାରବାର ଇତ୍ୟାଦି ସହିତ ଜଡିତ ଥିବା ଡରାଇଥିଲା। ତା’ପରେ ସେ କହିଥିଲେ ଯେ ତୁମ ନମ୍ବରକୁ ବ୍ଲକ କରାଯିବା ସହ ମୁମ୍ବାଇର କ୍ରାଇମ ବ୍ରାଞ୍ଚ ନିକଟକୁ ତଦନ୍ତ ପାଇଁ ପଠାଯିବ ବୋଲି ଧମକାଇଥିଲେ। ଭୟରେ ଶ୍ରୀ ଲାଉଡିଆ ଗତ ୨୦୨୪ ଅଗଷ୍ଟ ୩୦ ତାରିଖରୁ ୨୩.୧୦.୨୦୨୪ ପର୍ଯ୍ୟନ୍ତ ବିଭିନ୍ନ ସମୟରେ ୮୭,୬୩,୫୧୦ ଟଂକା ଲୁଟେରାମାନଙ୍କୁ ପ୍ରଦାନ କରିଥିଲେ । ପରେ ଲୁଟେରାମାନେ ଟେଲିଗ୍ରାମର ସମସ୍ତ ଡାଟାକୁ ଡିଲିଟ କରି ଦେଇଥିଲେ। ସେତେବେଳେ ଶ୍ରୀ ଲାଉଡିଆ ଜାଣିଲେ ଯେ ସେ ଠକାମୀରେ ପଡିଛନ୍ତି। ତୁରନ୍ତ ସେ କ୍ରାଇମବ୍ରାଞ୍ଚ ସହ ଯୋଗାଯୋଗ କରିବା ସହ ଏତଲା ଦେଇଥିଲେ। କ୍ରାଇମବ୍ରାଞ୍ଚ ଏହି ଘଟଣାରେ ସଂପୃକ୍ତ ଥିବା ଅଭିଯୁକ୍ତମାନଙ୍କୁ ଗୁଜରାଟରୁ ଗିରଫ କରିଥିଲେ।
