କଟକ, ୦୨/୧୨ : ବକେୟା ପାଇଁ ଧାରଣା । କଟକ ଜିଲ୍ଲାରେ ୨୧ ମାସର ବକେୟା ପାଉଣା ପାଇନାହାଁନ୍ତି କଣ୍ଟ୍ରୋଲ ଡିଲର। ଜିଲ୍ଲାପାଳଙ୍କ ଅଫିସ ଆଗରେ ବିକ୍ଷୋଭ ପ୍ରଦର୍ଶନ କଲେ ଡିଲର ମହାସଂଘର କର୍ମକର୍ତ୍ତା। ବକେୟା ପ୍ରାପ୍ୟ ତୁରନ୍ତ ଦେବା ଲାଗି ସରକାରଙ୍କୁ ଦାବିପତ୍ର ଦେଲା ଡିଲର ମହାସଙ୍ଘ।
ସୂଚନାନୁଯାୟୀ, କଟକ ଜିଲ୍ଲାର କଣ୍ଟ୍ରୋଲ ଡିଲରମାନେ ୨୧ ମାସର ବକେୟା ପାଉଣା ପାଇନାହାଁନ୍ତି। ସରକାର ଲାଗୁ କରିଥିବା ନୂଆ ନିୟମ କାରଣରୁ ସେମାନେ କ୍ଷତି ସହୁଛନ୍ତି। ତେଣୁ ନୂଆ ନିୟମ ପରିବର୍ତ୍ତନ କରିବା ସହ ସେମାନଙ୍କ ବକେୟା ଦରମା ଦାବିରେ ସୋମବାର ଡିଲର ମହାସଙ୍ଘର କର୍ମକର୍ତ୍ତାମାନେ ଜିଲ୍ଲାପାଳଙ୍କ ଅଫିସ ଆଗରେ ବିକ୍ଷୋଭ ପ୍ରଦର୍ଶନ କରିଛନ୍ତି। ଏହା ସହ ସରକାରଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରିଛନ୍ତି। ତେବେ ଦାବି ପୂରଣ ନହେଲେ ସେମାନେ ଖାଉଟିମାନଙ୍କୁ କଣ୍ଟ୍ରୋଲ ସାମଗ୍ରୀ ଯୋଗାଇବେ ନାହିଁ ବୋଲି ଚେତାବନୀ ଦେଇଛନ୍ତି। ଏଭଳି ପରିସ୍ଥିତି ପାଇଁ ସରକାର ଦାୟୀ ରହିବେ ବୋଲି କଣ୍ଟ୍ରୋଲ ଡିଲର ମହାସଙ୍ଘର ସଭାପତି ସୟଦ ଏକ୍ରାମ ହୁସେନ କହିଛନ୍ତି।
ପ୍ରକାଶ ଥାଉକି, ସାଧାରଣ ଖାଉଟି ବଣ୍ଟନ ବ୍ୟବସ୍ଥା କ୍ରମଶଃ ଜଟିଳ ହେବାରେ ଲାଗିଛି। ପ୍ରଥମେ ପ୍ରତ୍ୟେକ ଡିଲର ପଏଣ୍ଟରେ ପିଓଏସ୍(ପଏଣ୍ଟ ଅଫ୍ ସେଲ୍) ମେସିନ୍ ଲଗାଗଲା । ଏବେ ଅତ୍ୟାଧୁନିକ ଓଜନ ମେସିନ୍କୁ ପିଓଏସ୍ ମେସିନ୍ ସହ ସଂଯୋଗ କରାଯାଇଛି । ଏହାକୁ ନେଇ ଉଭୟ ଡିଲର ଏବଂ ଖାଉଟିଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା ବେଳେ ଏବେ ରାଜ୍ୟ ଖାଦ୍ୟ ଏବଂ ଖାଉଟି କଲ୍ୟାଣ ବିଭାଗ ପକ୍ଷରୁ ପ୍ରତ୍ୟେକ ଡିଲର ପଏଣ୍ଟରେ ସିସି କ୍ୟାମେରା ଲଗାଯିବା ପାଇଁ ଯୋଜନା ଆରମ୍ଭ ହୋଇଛି । ଏହି କ୍ୟାମେରା ଜରିଆରେ ଡିଲର୍ ପଏଣ୍ଟକୁ ଆସୁଥିବା ଜାଲ୍ ହିତାଧିକାରୀଙ୍କୁ ଧରିବା ପାଇଁ ଯୋଜନା ହେଉଥିବା କୁହାଯାଉଛି ।
ସେପଟେ ଖାଉଟି ବଣ୍ଟନ ବ୍ୟବସ୍ଥାରେ ଦୀର୍ଘବର୍ଷ ଧରି ପିଓଏସ୍ ମେସିନ୍ଜନିତ ସମସ୍ୟା ଲାଗିରହିଛି। ପିଓଏସ୍ ମେସିନ୍ ଇଣ୍ଟରନେଟ୍ ସହାୟତାରେ ଚାଲିଥାଏ । ରାଜ୍ୟର ଅନେକ ଗ୍ରାମାଞ୍ଚଳରେ ଇଣ୍ଟରନେଟ୍ ସୁବିଧା ସହଜରେ ଉପଲବ୍ଧ ହେଉନାହିଁ। ସେହିସବୁ ସ୍ଥାନରେ ଯଦି ଘଣ୍ଟେ ଇଣ୍ଟରନେଟ୍ ରହୁଛି ୪ଘଣ୍ଟା କଟିଯାଏ । ଫଳରେ ଉଭୟ ଖାଉଟି ଏବଂ ଡିଲର ହଇରାଣ ହେଉଛନ୍ତି। ସବୁଠାରୁ ବଡ଼କଥା, ଓଡ଼ିଶାରେ ଯେଉଁସବୁ ପିଓଏସ୍ ମେସିନ୍ ଦିଆଯାଇଛି ତାହା ୨-ଜି । କିନ୍ତୁ ଏବେ ଚାରିଆଡ଼େ ୫-ଜି ଚାଲୁଛି । ଫଳରେ ପିଓଏସ୍ ମେସିନ୍ ଠିକ୍ ଭାବେ କାମ କରୁନି। ଏଭଳି ସ୍ଥିତିରେ ଉଭୟ ଡିଲର ଏବଂ ଖାଉଟିଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା ବେଳେ ଏବେ ପ୍ରତ୍ୟେକ ଡିଲର ପଏଣ୍ଟରେ ସିସିଟିଭି କ୍ୟାମେରା ଲଗାଇବା ଯୋଜନା ଆହୁରି ଅସନ୍ତୋଷକୁ ତେଜିବା ଆରମ୍ଭ କରିଛି।
