ବାରିପଦା,୨୯/୧୦: ବାତ୍ୟା ଦାନାର ପ୍ରଭାବ କମିବା ପରେ ଜିଲ୍ଲାରୁ ବର୍ଷା ମଧ୍ୟ ଅପସରିଯାଇଛି । ତେବେ ଧୀରେ ଧୀରେ ପରିସ୍ଥିତି ସ୍ୱାଭାବିକ ହେବା ପରେ ପୁଣି ମଙ୍ଗଳବାରଠୁ ପର୍ଯ୍ୟଟକଙ୍କ ପାଇଁ ଶିମିଳିପାଳ ଅଭୟାରଣ୍ୟ ଖୋଲିଲା।
ପର୍ଯ୍ୟଟନ ଋତୁରେ ସାମୁଦ୍ରିକ ଝଡ଼ବାତ୍ୟା ଓ ବର୍ଷା ଯୋଗୁ ଶିମିଳିପାଳକୁ ବନ୍ଦ କରିବାକୁ ପଡ଼ିଥିଲା । ବର୍ଷା ହେଲେ ପାହାଡିଆ ରାସ୍ତାଗୁଡିକ ଶିମିଳିପାଳକୁ ଯୋଗାଯୋଗ ବିଚ୍ଛିନ୍ନ ହେବାର ଆଶଙ୍କା କରି ନୀତିଗତ ଭାବେ ଶିମିଳିପାଳକୁ ବନ୍ଦ ପାଇଁ ବିଜ୍ଞପ୍ତି ପ୍ରକାଶ ପାଇଥିଲା । ଦାନା ପାଇଁ ପ୍ରଥମେ ୨୩ରୁ ୨୫ ତାରିଖ ପୁଣି ଦାନା ପ୍ରଭାବରେ ଶିମିଳିପାଳରେ ଭାରି ବର୍ଷା ପାଇଁ ଦ୍ୱିତୀୟ ପର୍ଯ୍ୟାୟରେ ୨୬ରୁ ୨୮ ତାରିଖ ଯାଏଁ ଶିମିଳିପାଳକୁ ବନ୍ଦ କରିବାକୁ ନିଷ୍ପତ୍ତି ହୋଇଥିଲା । ଏହି ସମୟରେ ପୂର୍ବରୁ କଟେଜ ରହଣି ପାଇଁ ହୋଇଥିବା ସମସ୍ତ ବୁକିଙ୍ଗକୁ ବାତିଲ କରାଯିବା ସହିତ ପର୍ଯ୍ୟଟକଙ୍କୁ ଶିମିଳିପାଳ ଭିତରକୁ ପ୍ରବେଶ ପାଇଁ ବାରଣ କରାଯାଇଥିଲା ଏବଂ ଅନୁମତି ନଥିଲା । ବାତ୍ୟା ପରବର୍ତ୍ତୀ ସ୍ଥିତି ଅନୁଧ୍ୟାନ ପରେ ଶିମିଳିପାଳ ପୁଣି ପୂର୍ବପରି ପର୍ଯ୍ୟଟକମାନଙ୍କ ନିମନ୍ତେ ଖୋଲିବ ବୋଲି ଶିମିଳିପାଳ ବ୍ୟାଘ୍ର ପ୍ରକଳ୍ପର ନିର୍ଦ୍ଦେଶକଙ୍କ କାର୍ଯ୍ୟାଳୟ ପକ୍ଷରୁ ସେତେବେଳେ ସୂଚେଇ ଦିଆଯାଇଥଲା ।
ତେବେ ବର୍ତ୍ତମାନ ପାଗ ସମ୍ପୂର୍ଣ୍ଣ ଅନୁକୂଳ ଥିବାରୁ ମଙ୍ଗଳବାରଠାରୁ ଶିମିଳିପାଳ ପୂର୍ବଭଳି ପର୍ଯ୍ୟଟକଙ୍କ ନିମନ୍ତେ ଖୋଲିଥିବାରୁ ପର୍ଯ୍ୟଟକ ମହଲରେ ଖୁସିର ଲହରୀ ଖେଳିଯାଇଛି । ଏଠାରେ ଉଲ୍ଲେଖଯୋଗ୍ୟ ଦୁର୍ଗାପୂଜା ପୂର୍ବରୁ ଗତ ୧୦ ତାରିଖରେ ଶିମିଳିପାଳ ଖୋଲିଥିବାବେଳେ ରାଜ୍ୟ ତଥା ରାଜ୍ୟ ବାହାରୁ ପର୍ଯ୍ୟଟକଙ୍କ ସୁଅ ଛୁଟିଥିଲା । ତେବେ ହଠାତ୍ ସାମୁଦ୍ରିକ ଝଡ଼ ଦାନା ପାଇଁ ଦୀର୍ଘ ୬ଦିନ ଧରି ପର୍ଯ୍ୟଟକଙ୍କୁ ଶିମିଳିପାଳ ଭିତରକୁ ପ୍ରବେଶ ଅନୁମତି ମିଳିନଥିଲା ।
