ଧର୍ମଶାଳା,୦୮/୧୧: ବୟସ ଥିଲା ବେଳେ ଦାସକାଠିଆ ଦଳରେ ପାଳିଆ ଭାବେ କାମ କରି ପରିବାରର ଗୁଜୁଲାଣ ମେଣ୍ଟାଉଥିଲେ । ବୟସ ବଢ଼ିଲା ସ୍ୱାସ୍ଥ୍ୟ ସାଥ୍ ଦେଲାନି । ଦଳ ଆଉ ସାଙ୍ଗରେ ନେଲାନି । ଜମି କହିଲେ ଗୁଣ୍ଠେ ନାହିଁ । ପରିବାର କହିଲେ ୫ପ୍ରାଣୀ କୁଟୁମ୍ବ । କିଭଳି ଚଳିବେ, ତାକୁ ନେଇ ଚିନ୍ତା ଘାରିଲା । ନିଜର କଳାକୁ ବୃତ୍ତି କରି ଗାଁରୁ ଗାଁକୁ ବୁଲି ଦାସକାଠିଆ ବଜାଇ ଭିକ୍ଷାବୃତ୍ତି କରି ପରିବାର ଚଳାଉଛନ୍ତି । ଅନ୍ୟପଟେ ରୋଗ ମାଡ଼ିବସିଲା । ଆଉ ଚାଲିବାକୁ ବଳ ପାଉନି । ଏଭଳି ସ୍ଥିତିରେ ଦାସକାଠିଆ କଳାକାର ତାଙ୍କ ପରିବାର ସହ ଦୁର୍ଦ୍ଦିନରେ କାଳାତିପାତ କରୁଥିବା ଭଳି ଦୃଶ୍ୟ ଧର୍ମଶାଳା ବ୍ଲକ୍ ଅଭୟପୁର ପଞ୍ଚାୟତ ରତନପୁର ଗ୍ରାମରେ ଦେଖିବାକୁ ମିଳୁଛି ।
ରତନପୁର ଗ୍ରାମର ଏକନ ଗୁରୁ । ଦୀର୍ଘ ବର୍ଷ ହେବ ଭଦ୍ରକରୁ ଆସି ପରିବାର ସହ ଏଠାରେ ବସତି ସ୍ଥାପନ କରିଛନ୍ତି । ପରିବାର କହିଲେ ପତ୍ନୀ, ଦୁଇପୁଅ ଓ ଝିଅଙ୍କୁ ନେଇ ତାଙ୍କ ସଂସାର । ଜମି କହିଲେ ଗୁଣ୍ଠେ ନାହିଁ । ପାଲା ଦଳରେ ପାଳିଆ ଭାବେ କାମ କରି ପରିବାର ଚଳାଉଥିଲେ । ଏହାସହ ଦାସକାଠିଆ ଦଳରେ ମଧ୍ୟ ପାଳିଆ ଭାବେ କାମ କରି କିଛି ଅର୍ଥ ରୋଜଗାର କରୁଥିଲେ । ବୟସ ବଢ଼ିବା ସହିତ ସ୍ୱାସ୍ଥ୍ୟଗତ ସମସ୍ୟା ବଢ଼ିବାରୁ ଦଳ ଆଉ ସାଙ୍ଗରେ ନେଉନି । ଅନ୍ୟପଟେ ଦୀର୍ଘବର୍ଷ ହେବ ରକ୍ତହୀନତା ରୋଗରେ ପୀଡ଼ିତ । ଅର୍ଥାଭାବ ଯୋଗୁ ଚିକିତ୍ସା କରି ପାରୁନଥିବା ଏକନ ପରିବାରର ଗୁଜୁରାଣ ମେଣ୍ଟାଇବାକୁ ହାତରେ ଦୁଇଖଣ୍ଡ କାଠି ଧରି ଗାଁକୁ ଗାଁ ବୁଲି ଭିକ୍ଷାବୃତ୍ତି କରୁଛନ୍ତି ।
ମୁଁ ତ ବଡ଼ ଦେଉଳର ପାରାରେ, ନୀଳଚକ୍ର ମୋର ଆସରା... ଭକ୍ତି ସଂଗୀତକୁ ଦାସକାଠିଆ ମାଧ୍ୟମରେ ଗାନ କରି ଛକ ବଜାର ବୁଲି ଯାହା ଭିକ ଗଣ୍ଡେ ଆଣୁଛନ୍ତି, ସେଥିରେ ତାଙ୍କ ପରିବାରର ଗୁଜୁରାଣ ବଡ଼ କଷ୍ଟରେ ଚଳୁଛି । ଅନ୍ୟପଟେ ସରକାର କଳାକାରମାନଙ୍କୁ କଳାକାର ଭତ୍ତା ପ୍ରଦାନ କରୁଥିବା ବେଳେ ଏକନ ପରିବାରକୁ ସରକାରୀ ସହାୟତା କହିଲେ ଖାଦ୍ୟ ସୁରକ୍ଷା କାର୍ଡ ଯାହା ଗଣ୍ଡେ ଚାଉଳ ମିଳୁଛି । ଏଭଳି ସ୍ଥିତିରେ ଏକନଙ୍କ ପିଲାମାନେ ଶିକ୍ଷାରୁ ବଞ୍ଚିତ ହୋଇଥିବାଳ ବେଳେ ଆଗାମୀ ଦିନରେ କିଭଳି ପରିବାର ଚଳାଇବେ ତାକୁ ନେଇ ଚିନ୍ତାଗ୍ରସ୍ତ ହୋଇପଡ଼ିଛନ୍ତି । ଏକନଙ୍କ ଏଭଳି ଅବସ୍ଥାକୁ ନେଇ ବହୁବୁଦ୍ଧିଜୀବୀ ଦୁଃଖ ପ୍ରକାଶ କରୁଥିବା ବେଳେ ତାଙ୍କୁ ଚିକିତ୍ସା ସହାୟତା ସହିତ ସରକାରୀ ସୁବିଧା ଯୋଗାଇ ଦେବାକୁ ଦାବି କରିଛନ୍ତି।
