ବୁର୍ଲା,୨୮/୧୦: ଅଟୋରେ ବୁଲୁଛି ହାତଗୋଡ଼ ନ ଥିବା ଖଣ୍ଡିଆ ଶବ । ଦୁଇଦିନ ମଧ୍ୟରେ ଅନୁଗୋଳରୁ ଆରମ୍ଭ କରି ବୌଦ୍ଧ ଏବଂ ସମ୍ବଲପୁର ଜିଲ୍ଲାରେ ଘୂରି ବୁଲିଲାଣି । ହେଲେ ଏଯାଏ ଚିହ୍ନଟ ତ ଦୂରର କଥା, ବ୍ୟବଚ୍ଛେଦ ବି ହୋଇପାରି ନାହିଁ । ଡାକ୍ତରୀ କାଗଜପତ୍ରରେ ତ୍ରୁଟି ଯୋଗୁଁ ଅନୁଗୋଳ ଜିଲ୍ଲା କିଆକଟା ଥାନା ପୁଲିସ୍ ମୃତଦେହକୁ ଅଟୋରେ ଧରି ଘୂରି ବୁଲିବା ଘଟଣା ବୁର୍ଲା ଅଞ୍ଚଳରେ ଚର୍ଚ୍ଚାର ବିଷୟ ସାଜିଛି । ଶନିବାର ସନ୍ଧ୍ୟାରୁ ଶବ ବୁର୍ଲା ଭିମ୍ସାର ମର୍ଗହାଉସ୍ ସମ୍ମୁଖରେ ଥିବାବେଳେ ମୃତଦେହକୁ ଏ କି ସମ୍ମାନ ବୋଲି ବିଭିନ୍ନ ମହଲରେ ଉଦ୍ବେଗ ପ୍ରକାଶ ପାଇଛି ।
ଅନୁଗୋଳ ଜିଲ୍ଲା କିଆକଟା ଥାନା ଅନ୍ତର୍ଗତ ଜଙ୍ଗଲରେ ଏକ ଗଳିତ ମୃତଦେହ ପଡ଼ିଥିବା ପୁଲିସ୍ ଖବର ପାଇଥିଲା । ମୃତଦେହର ଗୋଡ଼ ହାତ ନ ଥିଲା । ଶବ ପଚିଯାଇଥିବାରୁ ମୃତକ ପୁରୁଷ ନାଁ ମହିଳା ତାହା ମଧ୍ୟ ଜଣାପଡୁ ନ ଥିଲା । ଛାନ୍ଭିନ୍ ପରେ ପୁଲିସ୍ ମୃତଦେହକୁ ଗତ ୨୫ ତାରିଖରେ ଜବତ କରିଥିଲା । ଏହାକୁ ବ୍ୟବଚ୍ଛେଦ ପାଇଁ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନ ନେଇ ନିକଟବର୍ତ୍ତୀ ବୌଦ୍ଧ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲା । ହେଲେ ସେଠାରେ ସୃଷ୍ଟି ହୋଇଥିଲା ଅଡୁଆ ସ୍ଥିତି । ସେଠାକାର ଡାକ୍ତର ବ୍ୟବଚ୍ଛେଦ ହୋଇପାରିବ ନାହିଁ କହିବା ସହ ବୁର୍ଲା ନେବାକୁ ପରାମର୍ଶ ଦେଇଥିଲେ । ଏହାପରେ ପୁଲିସ୍ ବାଧ୍ୟ ହୋଇ ମୃତଦେହକୁ ଏକ ଅଟୋ ରିକ୍ସାରେ ଧରି ଶନିବାର ସନ୍ଧ୍ୟାରେ ବୁର୍ଲା ଭିମ୍ସାର୍ ଶବ ବ୍ୟବଚ୍ଛେଦ ଗୃହ ନିକଟରେ ପହଞ୍ଚିଥିଲା । ତେବେ ବୌଦ୍ଧରୁ ବୁର୍ଲା ସ୍ଥାନାନ୍ତର କରିଥିବା ଡାକ୍ତର ରେଫରାଲ ପେପର୍ରେ କୌଣସି ମେମୋ ନମ୍ବର କିମ୍ବା ସିଲ୍ ପକାଇ ନ ଥିଲେ ।
ନିୟମ ଅନୁଯାୟୀ ରେଫେରାଲ୍ ହୋଇଥିବା ଡାକ୍ତରଖାନା ଅର୍ଥାତ୍ ବୌଦ୍ଧରୁ ଡାକ୍ତରୀ ଟିମ୍ ଭିମ୍ସାର୍ ଆସିବା କଥା । ହେଲେ କୌଣସି ଡାକ୍ତରୀ ଟିମ୍ ଆସି ନ ଥିବାରୁ ନିୟମ ଉଲ୍ଲଂଘନ କରି ଶବ ଗ୍ରହଣ କରିବାକୁ ବୁର୍ଲା ଭିମ୍ସାର୍ ଡାକ୍ତର ରାଜି ହୋଇ ନ ଥିଲେ । ଫଳରେ ଅଡୁଆରେ ପଡ଼ିଯାଇଥିଲା କିଆକଟା ପୁଲିସ୍ । କିଆକଟା ଥାନାଧିକାରୀ ଓ ଅନ୍ୟ ପୁଲିସ୍ କର୍ମଚାରୀମାନେ ଶନିବାରଠାରୁ ଭିମ୍ସାର ଶବ ବ୍ୟବଚ୍ଛେଦ ଗୃହ ସମ୍ମୁଖରେ ଜଗି ରହିଛନ୍ତି । ହେଲେ କାଗଜପତ୍ରରେ ତ୍ରୁଟି ଯୋଗୁଁ ଶବ ବ୍ୟବଚ୍ଛେଦ ହୋଇପାରୁ ନ ଥିବା ଜଣାପଡ଼ିଛି । ଏକ ଅଟୋ ରିକ୍ସାରେ ଗଳିତ ମୃତଦେହ ଧରି ପୁଲିସ୍ ୩ ଜିଲ୍ଲା ଚକ୍କର କାଟିବା ଚର୍ଚ୍ଚାର ବିଷୟ ପାଲଟିଛି । କାର୍ଯ୍ୟରେ ଅବହେଳା କରିଥିବା ବ୍ୟକ୍ତିବିଶେଷଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ପାଇଁ ସ୍ଥାନୀୟ ବାସିନ୍ଦା ଦାବି କରିଛନ୍ତି ।
