ନୂଆଦିଲ୍ଲୀ,୨୬/୧୧: ମହାରାଷ୍ଟ୍ର ବିଧାନସଭା ନିର୍ବାଚନରେ ବିଜେପି ନେତୃତ୍ୱାଧୀନ ମହାୟୁତି ବିପୁଳ ବିଜୟ ହାସଲ କରିବାର ଦୁଇଦିନ ପରେ ମଧ୍ୟ କିଏ ମୁଖ୍ୟମନ୍ତ୍ରୀ ହେବେ ତାକୁ ନେଇ ଅଡୁଆ ତୁଟୁନାହିଁ । ଅଡୁଆ ତୁଟାଇବାକୁ ମହାୟୁତିର ୩ ନେତା ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍ନବିସ, ଶିବସେନା ନେତା ତଥା ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଓ ଏନ୍ସିପି ନେତା ଅଜିତ ପାୱାର ସୋମବାର ସନ୍ଧ୍ୟାରେ ଦିଲ୍ଲୀ ଯାଇଛନ୍ତି । ସେଠାରେ ସେମାନେ ବରିଷ୍ଠ ବିଜେପି ନେତା ତଥା ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହଙ୍କୁ ଭେଟି ମୁଖ୍ୟମନ୍ତ୍ରୀ ଓ ମନ୍ତ୍ରିମଣ୍ଡଳ ଗଠନର ରୂପରେଖ ଚୂଡାନ୍ତ କରିବେ । ଏହା ପରେ ବିଧିବଦ୍ଧ ଭାବେ ୩ ଦଳ ପକ୍ଷରୁ ଘୋଷଣା କରାଯିବ ବୋଲି କୁହାଯାଉଛି ।
ସେପଟେ ଫଡନବିସ୍ ହିଁ ମୁଖ୍ୟମନ୍ତ୍ରୀ ହେବେ ବୋଲି ବିଜେପି ଶୀର୍ଷ ନେତୃତ୍ୱ ସୂତ୍ରରୁ ଜଣାପଡିଛି । ମହାୟୁତିର ଅନ୍ୟ ଦୁଇ ସହଯୋଗୀ ଏକନାଥ ସିନ୍ଦେ ଓ ଅଜିତ ପାୱାର ଉପମୁଖ୍ୟମନ୍ତ୍ରୀ ହେବେ । ଅନ୍ୟପକ୍ଷରେ ଶିବସେନାର ଜଣେ ବରିଷ୍ଠ ନେତା କହିଛନ୍ତି ଫଡନବିସଙ୍କୁ ମୁଖ୍ୟମନ୍ତ୍ରୀ କରାଯିବା ନେଇ ବିଜେପିର ନେତୃବର୍ଗ ସେମାନଙ୍କ ସହ କୌଣସି ଆଲୋଚନା କରିନାହାନ୍ତି । ତାଙ୍କ ଦଳ ମଧ୍ୟ ମୁଖ୍ୟମନ୍ତ୍ରୀଙ୍କ ନାମ ସହ ଏକମତ ହୋଇନାହିଁ । ମିଳିଥିବା ସୂଚନା ଅନୁସାରେ ସିନ୍ଦେଙ୍କୁ ଉପମୁଖ୍ୟମନ୍ତ୍ରୀ କରାଯିବା ସହ ତାଙ୍କ ଦଳର ୧୨ ଜଣ ବିଧାୟକ ମନ୍ତ୍ରୀ ହେବେ । ସେମାନଙ୍କୁ ପ୍ରମୁଖ ବିଭାଗ ମଧ୍ୟ ମିଳିବ । ଏନ୍ସିପି ଭାଗରେ ଉପମୁଖ୍ୟମନ୍ତ୍ରୀ ସହ ୧୦ ମନ୍ତ୍ରୀ ପଦ ପଡିବ । ମୁଖ୍ୟମନ୍ତ୍ରୀଙ୍କୁ ମିଶାଇ ମହାରାଷ୍ଟ୍ର ମନ୍ତ୍ରିମଣ୍ଡଳରେ ସର୍ବାଧିକ ୪୩ ଜଣ ମନ୍ତ୍ରୀ ରହିପାରିବେ । ବିଜେପି ହାତରେ ୨୧ ମନ୍ତ୍ରୀ ପଦ ରହିବ । ବିଜେପି ଗୃହ, ଅର୍ଥ, ରାଜସ୍ୱ ଓ ସହରାଞ୍ଚଳ ଭଳି ପ୍ରମୁଖ ବିଭାଗ ରଖିବାକୁ ଚାହୁଁଥିଲା । କିନ୍ତୁ ମୁଖ୍ୟମନ୍ତ୍ରୀ ପଦ ବଦଳରେ ସେହି ବିଭାଗରୁ କିଛି ସହଯୋଗୀ ଦଳ ହାତକୁ ଦେବାକୁ ରାଜି ହୋଇଥିବା ବିଶେଷ ସୂତ୍ରରୁ ଜଣାପଡିଛି ।
୨୦୧୪ରେ ଫଡନବିସ ମୁଖ୍ୟମନ୍ତ୍ରୀ ହେବା ସହ ପୂର୍ଣ୍ଣ ୫ ବର୍ଷ ଧରି କାର୍ଯ୍ୟ କରିଥିଲେ । ସେତେବେଳେ ବିଜେପି ସହ ଅବିଭାଜିତ ଶିବସେନାର ମେଣ୍ଟ ଥିଲା । କିନ୍ତୁ ୨୦୧୯ ବିଧାନସଭା ନିର୍ବାଚନ ପରେ ଫଡନବିସଙ୍କ ନେତୃତ୍ୱାଧୀନ ବିଜେପି ଏନ୍ସିପିର ଅଜିତ ପାୱାରଙ୍କ ସହ ହାତ ମିଳାଇ ସରକାର ଗଠନ କରିଥିଲା । ଫଡନବିସ ମୁଖ୍ୟମନ୍ତ୍ରୀ ଓ ଅଜିତ ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ । କିନ୍ତୁ ସରକାର ମାତ୍ର ୮୦ ଘଣ୍ଟା ତିଷ୍ଠି ରହିଥିଲା । ଅଜିତ ଶେଷରେ ସରକାରରୁ ଓହରିଯିବା ସହ ନିଜ କକା ତଥା ଏନ୍ସିପି ସୁପ୍ରିମୋ ଶରଦ ପାୱାରଙ୍କ ନିକଟକୁ ଫେରିଯାଇଥିଲେ । ପରେ ଶିବସେନା ନେତା ଉଦ୍ଧବ ଠାକ୍ରେ କଂଗ୍ରେସ ଓ ଏନ୍ସିପି ସହ ମିଶି ସରକାର ଗଠନ କରିଥିଲେ । କିନ୍ତୁ ତାହା ମଧ୍ୟ ବେଶୀଦିନ ତିଷ୍ଠି ନଥିଲା । ପ୍ରଥମେ ଶିବସେନା ଓ ପରେ ଏନ୍ସିପିରେ ବିଭାଜନ ଘଟିଥିଲା ଏବଂ ପୁଣି ବିଜେପି କ୍ଷମତାସୀନ ହୋଇଥିଲା ।
