ନୂଆଦିଲ୍ଲୀ, ୨୨/୦୮ : ଡ୍ରିମ୍ ୧୧ ଖେଳ ଖତମ୍ । ସଟ୍ଡାଉନ୍ ପ୍ରସ୍ତୁତିରେ କମ୍ପାନୀ। ବାଜିରେ ଲାଗିଛି ୯୬୦୦ କୋଟି । ୨୮ କୋଟିରୁ ଅଧିକ ୟୁଜରଙ୍କୁ ବଡ଼ ଝଟ୍କା। ୱାଲେଟ୍ରୁ ଟଙ୍କା ବାହାର କରିବାକୁ ଲାଗି ପଡ଼ିଛନ୍ତି ୟୁଜର। ସଂସଦରେ ଗେମିଂ ବିଲ୍ ପାରିତ ହେବା ପରେ ଗେମିଂ ଇଣ୍ଡଷ୍ଟ୍ରୀରେ ହଇଚଇ। ପ୍ରଭାବିତ ହେବେ ୪୦୦ରୁ ଅଧିକ କମ୍ପାନୀ। ବିପଦରେ ୨ ଲକ୍ଷ ଚାକିରି । ବନ୍ଦ ହୋଇଯିବ ୟୁଜରଙ୍କ ରୋଜଗାର ସ୍ରୋତ। ଏବେ ଖାଲି ରାଷ୍ଟ୍ରପତିଙ୍କ ମଞ୍ଜୁରିକୁ ଅପେକ୍ଷା। ଏହାପରେ ବିଧିବଦ୍ଧ ଭାବେ ଆଇନରେ ପରିଣତ ହୋଇଯିବ ବିଲ୍।
ଫାଣ୍ଟାସି ଗେମିଂ କମ୍ପାନୀ ୨୦୦୮ରେ ଡ୍ରମ୍-୧୧ ଗେମ୍ ଆରମ୍ଭ କରିଥିଲା। ଦେଖୁ ଦେଖୁ ଏହି ପ୍ଲାଟଫର୍ମରୁ ଲୋକପ୍ରିୟତା ଆକାଶ ଛୁଇଁଗଲା। ୨୮ କୋଟିରୁ ଅଧିକ ୟୁଜର ଏଥିରେ ଯୋଡ଼ି ହୋଇ ଭାରତର ଟପ୍ ଫାଣ୍ଟାସି ସ୍ପୋର୍ଟସ୍ ପ୍ଲାଟଫର୍ମ କରିଦେଲେ । ୨୦୨୪ରେ କମ୍ପାନୀ ପ୍ରାୟ ୯୬୦୦ କୋଟି ଟଙ୍କାର ରାଜସ୍ଵ ହାସଲ କରିଥିଲା। କମ୍ପାନୀକୁ ୯୦ ପ୍ରତିଶତ ରାଜସ୍ଵ କେବଳ ଡ୍ରିମ୍-୧୧ର ରିଅଲ୍ ମନି କଣ୍ଟେଷ୍ଟରୁ ଆସୁଥିଲା। ଏଥିରେ କ୍ରିକେଟ୍ ସମ୍ବନ୍ଧିତ ଗେମ୍ର ବଡ଼ ଯୋଗଦାନ ରହିଛି । ଏବେ ସରକାର ଗେମିଂ ବିଲ୍ ପାରିତ କରିବା ପରେ ଦେୟ ଭିତ୍ତିକ ଖେଳ ଜାରି ରଖିବାର କୌଣସି ଉପାୟ ନାହିଁ ବୋଲି କମ୍ପାନୀର ସିଇଓ ହର୍ଷ ଜୈନ କହିଛନ୍ତି। ତେବେ କମ୍ପାନୀରେ ତାଲା ପକାଇବା ନେଇ କୌଣସି ବିଧିବଦ୍ଧ ଘୋଷଣା ହୋଇନାହିଁ।
ଡ୍ରିମ୍-୧୧ ପ୍ଲାଟଫର୍ମରେ ୟୁଜରମାନେ ଟଙ୍କା ବାଜିରେ ଲଗାନ୍ତି। ଯାହାକି ଜୁଆ ଖେଳକୁ ପ୍ରୋତ୍ସାହିତ କରୁଛି। ଏଥିରେ ଟଙ୍କା ହରେଇବା ପରେ ୟୁଜରମାନେ ହତାଶ ହେଉଛନ୍ତି । ଏହି ଭଳି ଦେୟ ଯୁକ୍ତ ଗେମିଂ ପ୍ଲାଟଫର୍ମ ଉପରେ ଲଗାମ୍ ଲଗାଇବାକୁ ସରକାର ନୂଆ ଗେମିଂ ବିଲ୍ ଆଣୁଛନ୍ତି। ଏହି ବିଲ୍ ଆଇନରେ ପରିଣତ ହେଲେ ନିୟମ ଉଲ୍ଲଙ୍ଘନକାରୀଙ୍କୁ ୩ ବର୍ଷର ଜେଲ ଦଣ୍ଡ କିମ୍ଵା ଏକ କୋଟି ଟଙ୍କା ଜରିମାନା ଭରିବାକୁ ପଡ଼ିବ । ଏତଦ୍ ବ୍ୟତୀତ ବିଜ୍ଞାପନର ପ୍ରଚାର ପ୍ରସାର କଲେ ଦୁଇ ବର୍ଷ ଯାଏଁ ଜେଲ୍ ଦଣ୍ଡ ସହ ୫୦ ଲକ୍ଷ ଟଙ୍କାର ଜରିମାନା ଦେବାକୁ ପଡ଼ିବ। ଏହି ବିଲ୍ ଯୋଗୁଁ ଡ୍ରିମ୍-11, My11Circle ଏବଂ Winzo ଭଳି କମ୍ପାନୀଗୁଡ଼ିକର ସେୟାରରେ ହ୍ରାସ ଘଟିଛି। ଗେମିଂ ଶିଳ୍ପକୁ ୨୦ ହଜାର କୋଟିର କ୍ଷତି ସହିବାକୁ ପଡିବ ବୋଲି ଆକଳନ କରାଯାଇଛି।
ନୂଆ ଗେମିଂ ବିଲ୍ ଯୋଗୁଁ ୪୦୦ରୁ ଅଧିକ କମ୍ପାନୀ ପ୍ରଭାବିତ ହେବାର ଆଶଙ୍କା ରହିଛି। ୟୁଜରମାନେ ୱାଲେଟ୍ ମନି ଟ୍ରାନ୍ସଫର୍ କରିବାରେ ଲାଗି ପଡ଼ିଛନ୍ତି। ଅଚାନକ ଟଙ୍କା ଟ୍ରାନ୍ସଫର୍ ବଢିବା ଯୋଗୁଁ ବ୍ୟାଙ୍କ୍ ରନ୍ ସ୍ଥିତି ସୃଷ୍ଟି ହୋଇଛି। କାରଣ ସବୁ ପ୍ଲାଟଫର୍ମ ପାଖରେ ଏବେ ପର୍ଯ୍ୟାପ୍ତ ନଗଦ ଟଙ୍କା ମହଜୁଦ ନାହିଁ। ଏହି ସ୍ଥିତି ଅଧିକ ଦିନ ଯାଏଁ ଜାରି ରହିଲେ ୟୁଜରଙ୍କ ଟଙ୍କା ଫସି ରହିପାରେ ବୋଲି ବିଶେଷଜ୍ଞ ଆକଳନ କରୁଛନ୍ତି।
