ଝାରସୁଗୁଡ଼ା,୨୬/୮(ଆପ୍ର): ବିଧାୟକଙ୍କ ଘରୁ ଡିଭିଆର ବକ୍ସ ଚୋରି ଘଟଣାର ପର୍ଦ୍ଦାଫାଶ କରିବା ସହ ମୁଖ୍ୟ ଅଭିଯୁକ୍ତକୁ ଗିରଫ କରିଛି ଝାରସୁଗୁଡ଼ା ପୁଲିସ୍ l ଅଭିଯୋଗ ମତେ ଗତ ଜୁଲାଇ ୨୮ ତାରିଖ ବିଳମ୍ବିତ ରାତିରେ ଶାନ୍ତି ଆପାର୍ଟମେଣ୍ଟରେ ଫ୍ଲାଟ୍ ନଂ ୨୦୨ ରେ ଦୁବୃର୍ତ୍ତ ମାନେ ପଶି ସୁନା ଅଳଙ୍କାର ସହ ନଗଦ ୫୦୦୦ ଟଙ୍କା ଚୋରି କରିଥିଲେ। ଏହାପରେ ବିଧାୟକ ଟଙ୍କଧର ତ୍ରିପାଠୀଙ୍କ ଫ୍ଲାଟ୍ ନଂ ୨୦୫ର କବାଟ ଭାଙ୍ଗି ସିସିଟିଭିର ଡିଭିଆର ବକ୍ସ ନେଇ ଦୁବୃର୍ତ୍ତମାନେ ଫେରାର ହୋଇଯାଇଥିଲେ l

ଅଭିଯୋଗ ପରେ ପ୍ରାଥମିକ ତଦନ୍ତ କରି ଆପାର୍ଟମେଣ୍ଟ ନିକଟସ୍ଥ ଅଳିଆ ଗଦାରୁ ଚୋରି ହୋଇଥିବା ସିସିଟିଭି ଡିଭିଆର ବକ୍ସକୁ ପୁଲିସ୍ ଉଦ୍ଧାର କରିଥିଲା l ତଦନ୍ତ ପରେ ଆନ୍ତଃରାଜ୍ୟ ରାକେଟର ସଂପୃକ୍ତି ଥିବା ପ୍ରମାଣ ମିଳିଥିଲା l ମଧ୍ୟପ୍ରଦେଶ ଦାର ଅଞ୍ଚଳର ମୁଖ୍ୟ ଅଭିଯୁକ୍ତ କହ୍ନେୟା ପଲସିଆ(୪୬)କୁ ପୁଲିସ୍ ଗିରଫ କରିଥିବା ବେଳେ ଚୋରିରେ ସଂପୃକ୍ତ ଥିବା ଅନ୍ୟ ୫ ଜଣ ଫେରାର ଅଭିଯୁକ୍ତଙ୍କୁ ଧରିବା ପାଇଁ ଚଢ଼ାଉ ଜାରି ରଖିଛି। ଏନେଇ ସାମ୍ବାଦିକ ସମ୍ମିଳନୀରେ ପୁଲିସ୍ ଆରକ୍ଷୀ ଅଧିକ୍ଷକ ଗୁଣ୍ଡଲା ରେଡ୍ଡୀ ରାଘବେନ୍ଦ୍ର ସୂଚନା ଦେଇଛନ୍ତି l ମୁଖ୍ୟ ଅଭିଯୁକ୍ତ ନାଁରେ ୧୨ରୁ ଅଧିକ ଚୋରି ଅଭିଯୋଗ ଆନ୍ଧ୍ର ପ୍ରଦେଶର ବିଭିନ୍ନ ଥାନାରେ ରୁଜୁ ରହିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି l

ଅଭିଯୁକ୍ତ ମାନେ କେଉଁ କେଉଁ ଆପାର୍ଟମେଣ୍ଟ ମାନଙ୍କରେ ସୁରକ୍ଷା ବ୍ୟବସ୍ଥାରେ ତ୍ରୁଟି ଅଛି ପ୍ରଥମେ ରେକି କରୁଥୁଲେ l ରେକି କରିବା ପରେ ବନ୍ଦ ରହିଥିବା ଫ୍ଲାଟ୍ ରେ ଚୋରି କରି ଫେରାର ମାରୁଥିଲେ l ଏହି କ୍ରମରେ ଶାନ୍ତି ଆପାର୍ଟମେଣ୍ଟରେ ବନ୍ଦ ରହିଥିବା ୨ଟି ଫ୍ଲାଟରୁ ଚୋରି କରିବା ପରେ ବିଧାୟକ ଟଙ୍କଧର ତ୍ରିପାଠୀଙ୍କ ଫ୍ଲାଟରେ ପଶି ଡିଭିଆର ବକ୍ସକୁ ଚୋରି କରିଥିଲେ l ହେଲେ ମୁଖ୍ୟ ଗିରଫ ଅଭିଯୁକ୍ତ ଡିଭିଆର ବକ୍ସର ଆବଶ୍ୟକତା ନଥିବା କହିବାରୁ ଫେରାର ଅଭିଯୁକ୍ତ ମାନେ ଶାନ୍ତି ଆପାର୍ଟମେଣ୍ଟ ନିକଟ ଅଳିଆ ଗଦାରେ ଫିଙ୍ଗି ଫେରାର ମାରିଥିଲେ l