ଭୁବନେଶ୍ୱର, ୩୧/୦୫: ଖଣି ବ୍ୟବସାୟୀଙ୍କୁ ବ୍ଲାକ୍ମେଲ୍ କରି ଦେଢ଼ କୋଟି ଟଙ୍କା ମାଗୁଥିଲେ । ୧ କୋଟି ଟଙ୍କା ନେଇଥିଲେ । ବାକି ୫୦ ଲକ୍ଷ ମାଗୁଥିଲେ । ଦଲାଲଙ୍କ ମାଧ୍ୟମରେ ୨୦ ଲକ୍ଷ ଟଙ୍କା ନେଉଥିଲେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ର ଡେପୁଟି ଡାଇରେକ୍ଟର(ଡିଡି) ଚିନ୍ତନ ରଘୁବଂଶୀ । ଦଲାଲ ଜଗତସିଂହପୁରର ଭକ୍ତି ବିନୋଦ ବେହେରା ସହ ଶ୍ରୀ ରଘୁବଂଶୀଙ୍କୁ ଗୁରୁବାର ସିବିଆଇ ଗିରଫ କରିଥିଲା । ଶୁକ୍ରବାର ଉଭୟଙ୍କୁ କୋର୍ଟ ଚାଲାଣ କରାଯାଇଥିଲା । ଜାମିନ ନାମଞ୍ଜୁର ହେବାରୁ ସେମାନଙ୍କୁ ବିଚାର ବିଭାଗୀୟ ହାଜତ (ଝାରପଡା ଜେଲ୍)କୁ ପଠାଇ ଦିଆଯାଇଛି । ଶ୍ରୀ ରଘୁବଂଶୀ ଜେଲ୍ର ୧୧ ନମ୍ବର ସେଲ୍ରେ ଅଛନ୍ତି ।
୨୦୧୩ ବ୍ୟାଚ୍ର ଆଇଆରଏସ୍ ଅଧିକାରୀ ହେଉଛନ୍ତି ଶ୍ରୀ ରଘୁବଂଶୀ । ସେ ଭୁବନେଶ୍ୱର ଇଡି କାର୍ଯ୍ୟାଳୟର ଡିଡି ଭାବେ କାର୍ଯ୍ୟ କରୁଥିଲେ। ତାଙ୍କର ବଳଦି ହୋଇ ସାରିଥିଲା । ହେଲେ ଭୁବନେଶ୍ୱର ଅଫିସ୍ରେ ଆଉ ୧ ବର୍ଷ ରହିବା ପାଇଁ ବରିଷ୍ଠ ଅଧିକାରୀମାନଙ୍କୁ ଧରାଧରି କରି ଏଠାରେ ରହିଥିଲେ । ଖଣି ଦୁର୍ନୀତି ନେଇ କିଛି ବର୍ଷ ତଳେ ଢେଙ୍କାନାଳର ରତିକାନ୍ତ ରାଉତ ଓରଫ ଜୁଲୁଙ୍କ ଘର, ଅଫିସ୍, କୋଲକାତାରେ ଥିବା ହସ୍ପିଟାଲ୍ରେ ଇଡି ଚଢ଼ଉ କରିଥିଲା । ପରେ ଜୁଲୁ ଓ ତାଙ୍କ ସହଯୋଗୀଙ୍କର କୋଟି କୋଟି ଟଙ୍କାର ସମ୍ପତ୍ତି ଆଟାଚ କରିଥିଲା ।
ଶ୍ରୀ ରଘୁବଂଶୀ ଗତ କିଛି ମାସ ହେବ ଜୁଲୁଙ୍କୁ ଗିରଫ କରିବାକୁ ଧମକ ଦେଉଥିଲେ । ଗିରଫରୁ ବର୍ତ୍ତିବା ପାଇଁ ୨ କୋଟି ଟଙ୍କା ମାଗିଥିଲେ । ଟଙ୍କା ଭକ୍ତି ମାଧ୍ୟମରେ ନେବାକୁ କହିଥିଲେ । ବିଭିନ୍ନ ପର୍ଯ୍ୟାୟରେ ଜୁଲୁ ୧ କୋଟି ଟଙ୍କା ଦେଇଥିଲେ । ବାକି ୫୦ ଲକ୍ଷ ଟଙ୍କା ଜୁନ୍ ୫ ତାରିଖ ସୁଧା ଦେବାକୁ କହିଥିଲେ । ୧୦ ତାରିଖ ମଧ୍ୟରେ ଟଙ୍କା ନ ଦେଲେ ଗିରଫ କରି ଜେଲ୍ ପଠାଇ ଦେବେ ବୋଲି ରଘୁବଂଶୀ ଧମକ ଦେଇଥିଲେ । ତେବେ ଜୁଲୁ ଆଉ କିଛି ଉପାୟ ନ ପାଇ ଭୁବନେଶ୍ୱର ସିବିଆଇ ଏସ୍ପି ରାଜ ସିଂହଙ୍କୁ ଭେଟି ଅଭିଯୋଗ କରିଥିଲେ ।
ଟଙ୍କା ଆଦାୟ କରିବା କାମ ଦଲାଲ୍ ଭକ୍ତିଙ୍କ ଉପରେ ଛାଡିଥିଲେ ଶ୍ରୀ ରଘୁବଂଶୀ । ହେଲେ ଭକ୍ତି ନିଜକୁ ଇଡିର ଅଧିକାରୀ ବୋଲି ଭାବି ଦେଇଥିଲା। ଜୁଲୁଙ୍କୁ ଫୋନ୍ କରି ଧମକ ମଧ୍ୟ ଦେଉଥିଲା । ଜୁଲୁ ଏସବୁର ପ୍ରମାଣ ସିବିଆଇ ଅଧିକାରୀଙ୍କୁ ଦେଇଥିଲେ । ସିବିଆଇ ଗତ ୨୫ ତାରିଖରେ ମାମଲା ରୁଜୁ କରିଥିଲା । ଗତକାଲି ଭକ୍ତି ଜଣେ ବିଧାୟକଙ୍କ ପିଏଙ୍କ ମାଧ୍ୟମରେ ଜୁଲୁଙ୍କ ପାଖରୁ ୨୦ ଲକ୍ଷ ଟଙ୍କା ନେଇ ଶ୍ରୀ ରଘୁବଂଶୀଙ୍କ ପାଖକୁ ଯାଉଥିଲାବେଳେ ସିବିଆଇ ଭକ୍ତିକୁ ଗିରଫ କରିଥିଲା । ତେବେ ଘଟଣାସ୍ଥଳରୁ ବିଧାୟକଙ୍କ ପିଏ ଖସି ପଳାଇଥିଲେ ।
ଭକ୍ତି ଗିରଫ ହେବା ପରେ ସିବିଆଇ ଅଧିକାରୀମାନେ ଶ୍ରୀ ରଘୁବଂଶୀଙ୍କୁ ଧରିଥିଲେ । ଇଡି କାର୍ଯ୍ୟାଳୟରେ ଚଢ଼ଉ କରି ଜୁଲୁଙ୍କ ଖଣି ମାମଲାର ଫାଇଲ୍ ଆଣିଥିଲେ । ରାତି ସାରା ଶ୍ରୀ ରଘୁବଂଶୀ ଓ ଦଲାଲ୍ ଭକ୍ତିକୁ ଜେରା କରିଥିଲା ସିବିଆଇ । ଶନିବାର ଅପରାହ୍ଣରେ ଉଭୟଙ୍କ ଡାକ୍ତରୀ ମାଇନା ପାଇଁ ହସ୍ପିଟାଲ୍ ନିଆଯାଇଥିଲା । ତା’ପରେ କୋର୍ଟ ଚାଲାଣ କରାଯାଇଥିଲା । ଭକ୍ତି ଗିରଫ ହେବା ପରେ ସିବିଆଇ ଅଧିକାରୀମାନେ ବହୁ ବିସ୍ଫୋରକ ତଥ୍ୟ ପାଇଛନ୍ତି । ଭକ୍ତି ନିଜକୁ ୟୁପିଏସ୍ସି ଆଶାୟୀ ବୋଲି ପରିଚୟ ଦେଉଥିଲା । ଅନେକ ଆଇପିଏସ୍, ଆଇଆରଏସ୍, ଆୟକର ବିଭାଗର ଅଧିକାରୀଙ୍କ ସହ ଭକ୍ତିର ଟଙ୍କା ନେଣ ଦେଣ ଥିବା ପ୍ରମାଣ ମିଳିଛି । କିଛି ଅଫିସରଙ୍କ ସହ ଆଲୋଚନା ଅଡିଓ ପାଇଛି ସିବିଆଇ । ଘଟଣାର ଅଧିକ ତଦନ୍ତ ପାଇଁ ଭକ୍ତିକୁ ସିବିଆଇ ରିମାଣ୍ଡରେ ଆଣିବ ବୋଲି ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।
