ନୂଆଦିଲ୍ଲୀ: ଲୋକପ୍ରିୟ ଇ-କମର୍ସ ପ୍ଲାଟଫର୍ମ ମିନ୍ତ୍ରା (Myntra)କୁ ବଡ଼ ଝଟକା ଦେଇପାରେ ପ୍ରବର୍ତ୍ତନ ନିର୍ଦ୍ଦେଶାଳୟ । ଫେମା ଆଇନ୍ ଉଲ୍ଲଂଘନ ଅଭିଯୋଗ ମିନ୍ତ୍ରା ଏବଂ ଏହାର ସହଯୋଗୀ କମ୍ପାନିଗୁଡ଼ିକ ବିରୋଧରେ ଇଡି ମାମଲା ରୁଜୁ କରିଛି । ପ୍ରବର୍ତ୍ତନ ନିର୍ଦ୍ଦେଶାଳୟ (ED) ର ବେଙ୍ଗାଲୁରୁ ଜୋନାଲ ଅଫିସ୍ ଫରେନ୍ ଏକ୍ସଚେଞ୍ଜ ମ୍ୟାନେଜମେଣ୍ଟ ଆକ୍ଟ ୧୯୯୯ (FEMA) ର ଧାରା ୧୬(୩) ଆଧାରରେ ମାମଲା ରୁଜୁ କରିଛି ଇଡି । ତେବେ ୧୬୫୪.୩୫ କୋଟି ଟଙ୍କାର ହେରଫେର ହୋଇଥିବା ଅଭିଯୋଗ ହୋଇଛି ।
ଇଡି ସୂଚନା ପାଇଥିଲା ଯେ, ମିନ୍ତ୍ରା ଏବଂ ଏହାର ସହଯୋଗୀ କମ୍ପାନୀଗୁଡ଼ିକ ଭାରତରେ ପ୍ରଚଳିତ ବିଦେଶୀ ନିବେଶ ନୀତି (FDI)ର ଉଲ୍ଲଂଘନ କରି 'ହୋଲେସଲ୍ କ୍ୟାସ୍ ଆଣ୍ଡ୍ କ୍ୟାରି' ବ୍ୟବସାୟ ନାମରେ ମଲ୍ଟି-ବ୍ରାଣ୍ଡ୍ ରିଟେଲ୍ ଟ୍ରେଡିଂ କରୁଛନ୍ତି । ମିନ୍ତ୍ରା ପକ୍ଷରୁ କୁହାଯାଇଥିଲା ଏହା ପାଇକାରୀ ବ୍ୟବସାୟ କରୁଛି ଏବଂ ଏହି ଆଧାରରେ ୧୬୫୪ କୋଟିରୁ ଅଧିକ ବିଦେଶୀ ନିବେଶ ନିଆଯାଇଥିଲା । କିନ୍ତୁ ବାସ୍ତବରେ ମିନ୍ତ୍ରା ତାର ସମସ୍ତ ଉତ୍ପାଦ ଭେକ୍ଟର ଇ-କମର୍ସ ପ୍ରାଇଭେଟ୍ ଲିମିଟେଡକୁ ବିକ୍ରି କରିଥିଲା । ଯାହା ସେଗୁଡ଼ିକୁ ସାଧାରଣ ଗ୍ରାହକମାନଙ୍କୁ ଖୁଚୁରାରେ ବିକ୍ରି କରିଥିଲା ।
-Myntra ଏବଂ Vector ଉଭୟ ଗୋଟିଏ ଗୋଷ୍ଠୀର କମ୍ପାନୀ ।
-ଗୋଟିଏ କମ୍ପାନୀରୁ ଅନ୍ୟ କମ୍ପାନୀକୁ ସାମଗ୍ରୀ ପଠାଇ B2B (ବ୍ୟବସାୟରୁ ବ୍ୟବସାୟ) ଦର୍ଶାଯାଇଥିଲା ଏବଂ ତା’ପରେ ସମାନ ଗୋଷ୍ଠୀର ଅନ୍ୟ ଏକ କମ୍ପାନୀ ଏହାକୁ ସାଧାରଣ ଗ୍ରାହକଙ୍କୁ ବିକ୍ରୟ କରି B2C (ବ୍ୟବସାୟରୁ ଗ୍ରାହକ) ରେ ପରିଣତ କରିଥିଲା ।
-ଏହାର ଉଦ୍ଦେଶ୍ୟ ଆଇନଗତ ଭାବରେ ପାଇକାରୀ ବ୍ୟବସାୟ ଦେଖାଇବା ଥିଲା, କିନ୍ତୁ ବାସ୍ତବରେ ଖୁଚୁରା ବ୍ୟବସାୟ କରିବା ଥିଲା କମ୍ପାନୀର ଲକ୍ଷ୍ୟ ।
ଏଫଡିଆଇ ନୀତି ଅନୁଯାୟୀ, ଏକ ହୋଲସେଲ କମ୍ପାନୀ କେବଳ ୨୫% ପର୍ଯ୍ୟନ୍ତ ସାମଗ୍ରୀ ନିଜ ଗୋଷ୍ଠୀର ଅନ୍ୟ କମ୍ପାନୀଗୁଡ଼ିକୁ ବିକ୍ରି କରିପାରିବ। କିନ୍ତୁ ମିନ୍ତ୍ରା ଏହାର ୧୦୦% ସାମଗ୍ରୀ ନିଜ ଗୋଷ୍ଠୀ କମ୍ପାନୀ ଭେକ୍ଟରକୁ ବିକ୍ରି କରିଛି । ଏହା ଆଇନର ସିଧାସଳଖ ଉଲ୍ଲଂଘନ । ଏହିପରି ଭାବରେ, ମିନ୍ତ୍ରା ଏବଂ ଏହାର ସହଯୋଗୀ କମ୍ପାନୀଗୁଡ଼ିକ ଫେମା ଆଇନ୍ର ଧାରା ୬(୩)(ବି) ଏବଂ ଏଫଡିଆଇ ନୀତିର ଉଲ୍ଲଂଘନ କରିଛନ୍ତି । ଏହି କାରଣରୁ, ମିନ୍ତ୍ରା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଯାଉଛି ଇଡି ।
ପ୍ରକୃତରେ, ମିନ୍ତ୍ରା ନିୟମ ଉଲ୍ଲଂଘନ କରି ମଲ୍ଟି-ବ୍ରାଣ୍ଡ ଖୁଚୁରା ବ୍ୟବସାୟ କରିଥିଲା । କିନ୍ତୁ କମ୍ପାନୀ ଏହାକୁ ଏକ ହୋଲସେଲ ବ୍ୟବସାୟ କହି ୧୬୫୪ କୋଟିରୁ ଅଧିକ ବିଦେଶୀ ନିବେଶ ନେଇଥିଲେ। ବର୍ତ୍ତମାନ ED ଏହି ମାମଲାରେ ଆଇନଗତ କାର୍ଯ୍ୟାନୁଷ୍ଠାନ ଆରମ୍ଭ କରିଛି ।
