ନୂଆଦିଲ୍ଲୀ,୧୦/୦୭:ଖରାପ ଡାଲି ମିଳିବାରୁ ରାଗିଗଲେ ଏକନାଥ ସିନ୍ଦେଙ୍କ ଦଳର ବିଧାୟକ ସଞ୍ଜୟ ଗାୟକୱାଡ । ଯାହାପରେ କ୍ୟାଣ୍ଟିନ୍ ମାଲିକଙ୍କୁ ପିଟିଥିବା ଜଣାପଡ଼ିଛି। ତେବେ ମୁମ୍ବାଇର ଚର୍ଚ୍ଚଗେଟ୍ ସ୍ଥିତ ଆକାଶବାଣୀ ବିଧାୟକ ହଷ୍ଟେଲର କ୍ୟାଣ୍ଟିନରେ ଏହି ଘଟଣା ଘଟିଛି। ଯାହାର ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି। ତେବେ ଭିଡିଓରେ ବିଧାୟକଙ୍କ ଏଭଳି ଆଚରଣ ଉପରେ ପ୍ରଶ୍ନ ଉଠାଯାଉଛି, କିନ୍ତୁ ବିଧାୟକ ଗାୟକୱାଡ କେବଳ ତାଙ୍କ କାର୍ଯ୍ୟକୁ ସମର୍ଥନ କରିନଥିଲେ ବରଂ ଏହାକୁ 'ଶିବସେନା ଶୈଳୀ' ବୋଲି ମଧ୍ୟ କହିଛନ୍ତି।
ସୂଚନା ମୁତାବକ,ବୁଲଢାନାର ବିଧାୟକ ସଞ୍ଜୟ ଗାୟକୱାଡ ଆକାଶବାଣୀ ଏମଏଲଏ ହଷ୍ଟେଲ କ୍ୟାଣ୍ଟିନରେ ଏକ ଥାଳି ଅର୍ଡର କରିଥିଲେ। ଯେତେବେଳେ ତାଙ୍କୁ ଖାଦ୍ୟ ପରିବେଷଣ କରାଗଲା, ସେ ଦେଖିଲେ ଯେ ଡାଲି ଦୁର୍ଗନ୍ଧ କରୁଛି। ସେ ପୋଷାକ ନ ବଦଳାଇ ସିଧା କ୍ୟାଣ୍ଟିନକୁ ଗଲେ,ତାଙ୍କ ଅଣ୍ଟାରେ ଏକ ଗାମୁଛା ଗୁଡ଼ାଇ ଡାଲି କିଏ ତିଆରି କରିଛି ପଚାରିବାକୁ ଲାଗିଲେ। ଭିଡିଓରେ ସେ ଲୋକମାନଙ୍କୁ ଡାଲିର କିପରି ବାସ୍ନା ହେଉଛି ଦେଖିବାକୁ କହୁଥିଲେ । ସଞ୍ଜୟ ଗାୟକୱାଡ କହିଛନ୍ତି, ଡାଲି ଖାଇବା ପରେ ସେ ବାନ୍ତି କଲେ ଏବଂ ପେଟରେ ଯନ୍ତ୍ରଣା ଆରମ୍ଭ ହେଲା।ଯାହାକୁ ନେଇ ଗାୟକୱାଡ ରାଗିଯାଇ କ୍ୟାଣ୍ଟିନ୍ ମ୍ୟାନେଜରଙ୍କୁ ଡାକି ତାଙ୍କୁ ଡାଲିର ସୁଗନ୍ଧ ନେବାକୁ କହିଲେ। ଏହା ପରେ ତୁରନ୍ତ ସେ ତାଙ୍କୁ ଚାପୁଡ଼ା ମାରିଲେ ଏବଂ ତା’ପରେ ଆଉ ଦୁଇଥର ଚାପୁଡ଼ା ମାରିଲେ। ଯାହା ପରେ କ୍ୟାଣ୍ଟିନ ମାଲିକ ତଳେ ପଡ଼ିଗଲେ।
