ନୂଆଦିଲ୍ଲୀ ୩୧/୧୦: ପରିବାର ପରମ୍ପରାକୁ ବଦଳାଇବାକୁ ଯାଉଛନ୍ତି ବିଶ୍ୱର ଅନ୍ୟତମ ସବୁଠୁ ଧନୀ ବ୍ୟକ୍ତି ଏଲନ ମସ୍କ । ନିଜର ୧୧ ଜଣ ସନ୍ତାନ ଓ ସେମାନଙ୍କ ମା’ଙ୍କୁ ସେ ଗୋଟିଏ ଛାତ ତଳେ ରଖିବେ । ଏଥିପାଇଁ ସେ ଟେକ୍ସାସର ଅଷ୍ଟିନ୍ରେ ୧୪,୪୦୦ ବର୍ଗଫୁଟର ଏକ ପ୍ରାସାଦ ସହିତ ଆଉ ଏକ ୬ ଶୟନକକ୍ଷବିଶିଷ୍ଟ ଜାଗା କିଣିଛନ୍ତି । ଏହାର ମୂଲ୍ୟ ୩.୫ କୋଟି ଡଲାର । ଏହି ଭବ୍ୟ ପ୍ରାସାଦର ନିର୍ମାଣଶୈଳୀ ଟସ୍କାନ୍ ଡିଜାଇନ୍ ଦ୍ୱାରା ପ୍ରେରିତ । ମସ୍କଙ୍କ ଟେକ୍ସାସ ସ୍ଥିତ ଘରଠୁ ଏହା ମାତ୍ର ୧୦ ମିନିଟ୍ ଦୂରରେ ଅବସ୍ଥିତ ।
ମସ୍କଙ୍କ ବିଶ୍ୱାସ, ଏହି ଅଣପାରମ୍ପରିକ ପ୍ରବନ୍ଧନ ତାଙ୍କ ସନ୍ତାନଙ୍କୁ ପରସ୍ପରର ଜୀବନର ଅଂଶ ହେବାରେ ସାହାଯ୍ୟ କରିବ । ସେମାନଙ୍କୁ ସେ ସମୟ ମଧ୍ୟ ଦେଇପାରିବେ । ୨୦୦୨ ମସିହାରୁ ମସ୍କ ୧୨ ସନ୍ତାନଙ୍କ ବାପା ହୋଇଛନ୍ତି । ତେବେ ପ୍ରଥମ ପତ୍ନୀଙ୍କ ସହ ତାଙ୍କ ପ୍ରଥମ ସନ୍ତାନର ଜନ୍ମର ମାତ୍ର ୧୦ ସପ୍ତାହରେ ମୃତ୍ୟୁ ହୋଇଥିଲା । ଦମ୍ପତିଙ୍କ ବିବାହ ବିଚ୍ଛେଦ ପୂର୍ବରୁ ୨୦୦୮ ମସିହାରେ ଦୁହେଁ ଆଇଭିଏଫ୍ ଜରିଆରେ ୫ ସନ୍ତାନଙ୍କ ମାତାପିତା ହୋଇଥିଲେ ।
ଏହା ପରେ ବ୍ରିଟିଶ ଅଭିନେତ୍ରୀ ତଲୁଲାହ ରିଲେଙ୍କ ସହ ତାଙ୍କର ସମ୍ପର୍କ ସ୍ଥାପନ ହୋଇଥିଲା । ତାଙ୍କୁ ମସ୍କ ଦୁଇଥର ବିବାହ ଓ ଛାଡ଼ପତ୍ର ଦେଇଥିଲେ । ସେମାନଙ୍କର କୌଣସି ସନ୍ତାନ ନ ଥିଲେ । ୨୦୨୦- ୨୦୨୨ ମସିହା ମଧ୍ୟରେ ମସ୍କ ଓ ମ୍ୟୁଜିସିଆନ୍ ଗ୍ରାଇମ୍ସ ୩ ସନ୍ତାନଙ୍କର ଅଭିଭାବକ ହେଲେ । ଏବେ ଗ୍ରାଇମ୍ସ ଓ ମସ୍କଙ୍କ ମଧ୍ୟରେ ସନ୍ତାନଙ୍କ ହେପାଜତକୁ ନେଇ ନ୍ୟାୟିକ ଲଢ଼େଇ ଚାଲିଛି । ୨୦୨୧ ମସିହାରେ ଶିଭୋନ ଜିଲିସ୍ ଓ ମସ୍କ ଯମଜ ସନ୍ତାନଙ୍କର ମାତାପିତା ହୋଇଥିଲେ । ଶିଭୋନ୍ ମସ୍କଙ୍କ ବ୍ରେନ୍ ଟେକ୍ନୋଲୋଜି ଷ୍ଟାର୍ଟ-ଅପ୍ ନ୍ୟୁରାଲିଙ୍କ୍ରେ ଜଣେ କାର୍ଯ୍ୟନିର୍ବାହୀ ଅଛନ୍ତି । ଉଭୟଙ୍କର ୩ୟ ସନ୍ତାନ ଥିବା କଥା ମସ୍କ ଚଳିତ ବର୍ଷ ସ୍ପଷ୍ଟ କରିଥିଲେ ।
