ନୂଆଦିଲ୍ଲୀ:  ଲୋକପ୍ରିୟ ନ୍ୟୁଜ ଚ୍ୟାନେଲ୍‌ ଏନଡିଟିଭି ପରିବାରରେ ସାମିଲ ହେଲେ ବରିଷ୍ଠ ସାମ୍ବାଦିକ ରାହୁଲ କନୱାଲ। ଏନଡିଭିର ମୁଖ୍ୟ ସଂପାଦକ ଏବଂ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ଭାବରେ ସୋମବାର ଦାୟିତ୍ୱ ଗ୍ରହଣ କରିଛନ୍ତି ରାହୁଲ । ଏହା ପୂର୍ବରୁ ସେ ଟିଭି ଟୁଡେ ନେଟଓ୍ବର୍କର ନ୍ୟୁଜ୍ ନିର୍ଦ୍ଦେଶକ  ଏବଂ ବିଜନେସ୍‌ ଟୁଡେ୍‌ର କାର୍ଯ୍ୟନିର୍ବାହୀ ନିର୍ଦ୍ଦେଶକ ପଦରୁ ଇସ୍ତଫା ଦେଇଥିଲେ । ଇଣ୍ଡିଆ ଟୁଡେରେ ମେ’ ୨୩ ଥିଲା ତାଙ୍କର ଶେଷ କାର୍ଯ୍ୟ ଦିବସ । ଆଜି (ମେ’ ୨୬) ସେ ଏନଡିଟିଭିରେ ନିଜର କାର୍ଯ୍ୟଭାର ଗ୍ରହଣ କରିଛନ୍ତି । 

ଏପ୍ରିଲ ୨୫, ୨୦୨୫ରେ ଏନଡିଟିଭିରେ ଆୟୋଜିତ ଏକ ଉଚ୍ଚସ୍ତରୀୟ ବୈଠକରେ ରାହୁଲଙ୍କୁ  ମୁଖ୍ୟ ସଂପାଦକ ଏବଂ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ କରାଇବା ଉପରେ ସହମତି ହୋଇଥିଲା । ରାହୁଲ କନୱାଲ ସାମ୍ବାଦିକତା ଜଗତର ଏକ ଜଣାଶୁଣା ନାମ । ତାଙ୍କର ଏହି କ୍ଷେତ୍ରରେ ୨୫ ବର୍ଷରୁ ଅଧିକ ଅଭିଜ୍ଞତା ଅଛି । ଏପର୍ଯ୍ୟନ୍ତ ସେ 'ଇଣ୍ଡିଆ ଟୁଡେ' ଏବଂ 'ଆଜ ତକ୍'ରେ ନ୍ୟୁଜ୍ ନିର୍ଦ୍ଦେଶକ ଭାବରେ କାର୍ଯ୍ୟ କରୁଥିଲେ ଏବଂ 'ବିଜିନେସ୍ ଟୁଡେ'ର କାର୍ଯ୍ୟନିର୍ବାହୀ ନିର୍ଦ୍ଦେଶକ ମଧ୍ୟ ରହିସାରିଛନ୍ତି । ଏହା ବ୍ୟତୀତ ସେ 'ହେଡଲାଇନ୍ସ ଟୁଡେ' ଏବଂ 'ଜୀ ନ୍ୟୁଜ୍' ଭଳି ସଂଗଠନରେ ବରିଷ୍ଠ ସମ୍ପାଦକୀୟ ଭୂମିକା ଗ୍ରହଣ କରିଛନ୍ତି। ମେ ୨୩ ତାରିଖ ଥିଲା 'ଟିଭି ଟୁଡେ ନେଟୱାର୍କ'ରେ ତାଙ୍କର ଶେଷ କାର୍ଯ୍ୟ ଦିବସ। 

ନିଜ କାର୍ଯ୍ୟକାଳ ମଧ୍ୟରେ ରାହୁଲ କନୱାଲ ଇଣ୍ଡିଆ ଟୁଡେ ଗ୍ରୁପର ଖବର ସଂଗ୍ରହ ଏବଂ ପରିଚାଳନାକୁ ନୂତନ ଉଚ୍ଚତାରେ ପହଞ୍ଚାଇଥିଲେ। ସେ ଇଣ୍ଡିଆ ଟୁଡେର ପ୍ରମୁଖ ପ୍ରାଇମଟାଇମ୍ ଶୋ 'ନ୍ୟୁଜଟ୍ରାକ୍'ର ଚେହେରା ଥିଲେ ଏବଂ ତାଙ୍କର ସପ୍ତାହନ୍ତ ସାକ୍ଷାତକାର ଶୋ 'ଜବ୍ ୱି ମେଟ୍' ମଧ୍ୟ ଅତ୍ୟନ୍ତ ଲୋକପ୍ରିୟ ଥିଲା। ୧୪ ସେପ୍ଟେମ୍ବର ୧୯୮୦ରେ ମହାରାଷ୍ଟ୍ରର ଦେଓଲାଲିରେ ଜନ୍ମଗ୍ରହଣ କରିଥିବା ରାହୁଲ କନୱାଲ ଦିଲ୍ଲୀ ବିଶ୍ୱବିଦ୍ୟାଳୟରୁ ସାମ୍ବାଦିକତା ଅଧ୍ୟୟନ କରିଥିଲେ। ରାହୁଲ ହାର୍ଭାର୍ଡ ବିଜନେସ୍ ସ୍କୁଲର ଜେନେରାଲ ମ୍ୟାନେଜମେଣ୍ଟ ପ୍ରୋଗ୍ରାମର ପୂର୍ବତନ ଛାତ୍ର । 

ଦିଲ୍ଲୀ ବିଶ୍ୱବିଦ୍ୟାଳୟରୁ ସାମ୍ବାଦିକତା ଅଧ୍ୟୟନ କରିବା ପରେ, ସେ କାର୍ଡିଫ୍ ବିଶ୍ୱବିଦ୍ୟାଳୟରୁ ଅନ୍ତର୍ଜାତୀୟ ପ୍ରସାରଣ ସାମ୍ବାଦିକତାରେ ଏକ ପାଠ୍ୟକ୍ରମ ମଧ୍ୟ କରିଛନ୍ତି। ସେ ଚେଭେନିଂ ସ୍କଲାରସିପ୍ ଏବଂ ପ୍ରତିକୂଳ ପରିବେଶ ସାମ୍ବାଦିକତା ପାଇଁ ରୟ ପେକ୍ ଟ୍ରଷ୍ଟ ଗ୍ରାଣ୍ଟ ଭଳି ଅନେକ ସମ୍ମାନ ମଧ୍ୟ ପାଇଛନ୍ତି। ଏହା ବ୍ୟତୀତ, ସେ ରୋରି ପେକ୍ ଟ୍ରଷ୍ଟ ଗ୍ରାଣ୍ଟ ମଧ୍ୟ ପାଇଥିଲେ । 

ରାହୁଲ କନୱାଲଙ୍କ ସାମ୍ବାଦିକତା କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଅବଦାନ ରହିଛି ।  ସେ ଆଣ୍ଟି-ଫେକ୍ ନ୍ୟୁଜ୍ ୱାର ରୁମ୍  ପ୍ରତିଷ୍ଠା କରିଥିଲେ, ଯାହା ନକଲି ଖବର ଏବଂ ଭୁଲ ସୂଚନାକୁ ବନ୍ଦ କରିବା ପାଇଁ ତିଆରି କରାଯାଇଥିଲା । ଏହା ବ୍ୟତୀତ, ସେ ଓପନ୍ ସୋର୍ସ ଇଣ୍ଟେଲିଜେନ୍ସ ଡେସ୍କର ମୂଳଦୁଆ ମଧ୍ୟ ସ୍ଥାପନ କରିଥିଲେ । ଯାହା ତଥ୍ୟ-ଆଧାରିତ ସାମ୍ବାଦିକତାକୁ ସୁଦୃଢ଼ କରିବା ପାଇଁ କାର୍ଯ୍ୟ କରେ । ରାହୁଲ କନୱାଲ ସାମ୍ବାଦିକତାରେ ତାଙ୍କର ଉଲ୍ଲେଖନୀୟ ଅବଦାନ ପାଇଁ 'ଏକ୍ସଚେଞ୍ଜ ଫର ମିଡିଆ ନ୍ୟୁଜ୍ ବ୍ରଡକାଷ୍ଟିଂ ଆୱାର୍ଡ' (enba) ସମେତ ଅନେକ ପୁରସ୍କାର ଏବଂ ସମ୍ମାନ ପାଇଛନ୍ତି ।