ଗୋପାଳପୁର, ୨୩/୫ : ଗଞ୍ଜାମ ଜିଲ୍ଲା ବ୍ରହ୍ମପୁର ବିଶ୍ଵବିଦ୍ୟାଳୟ ଏବଂ ଆର୍ମି ଗେଟ୍ ବିଜୟ ଦ୍ଵାର ଛକ ନିକଟରୁ ଜବରଦଖଲ ଉଚ୍ଛେଦ। ଦୀର୍ଘ ବର୍ଷ ଧରି ପ୍ରାୟ ୬୫୦ ଡିସିମିଲ ସରକାରୀ ଜମିରେ ସହଦେବ ନାୟକ ଜବରଦଖଲ କରି ବସବାସ କରୁଥିଲେ। ତେଣୁ ରଙ୍ଗେଇଲୁଣ୍ଡା ବିମାନବନ୍ଦର ସମ୍ପ୍ରସାରଣରେ ବାଧା ସୃଷ୍ଟି ହେଉଥିଲା। ଆଜି କନିଷି ତହସିଲଦାର କବିରାଜ ପ୍ରଧାନ, ସହକାରୀ ତହସିଲଦାର ଚିତ୍ରସେନ ଦଳେଇ, କରାପଲ୍ଲୀ ଆରଆଇ ଫକୀର ମୋହନ ରାଉତ, ସୁପରଭାଇଜର ଦୀପକ ଗମାଙ୍ଗ, ଅନାଦି ବେହେରା, ଇରିଗେଶନ ଏସ୍ ଡି ଓ ସରୋଜ ପ୍ରହରାଜ ପ୍ରମୁଖ ଉପସ୍ଥିତ ରହି ଜବରଦଖଲ ଉଚ୍ଛେଦ କରିଛନ୍ତି।
ରଙ୍ଗେଇଲୁଣ୍ଡା ବିମାନ ବନ୍ଦର କାମ ଶେଷ ପର୍ଯ୍ୟାୟରେ ରହିଥିବା ବେଳେ କେନାଲ ନିର୍ମାଣ ପାଇଁ କାମ ଅଟକିଥିଲା। ୩ ମାସ ପୂର୍ବରୁ ଜବରଦଖଲ କରିଥିବା ସହଦେବଙ୍କୁ ଉଚ୍ଛେଦ ପାଇଁ ନୋଟିସ କରାଯାଇଥିଲା। ତାହା ସହ ବାରମ୍ବାର ଘର ଖାଲି କରିବାକୁ କୁହାଯାଉଥିଲା। କିନ୍ତୁ ସେ ନୋଟିସକୁ ଅବମାନନା କରି ରହି ଆସୁଥିଲେ। ଏନେଇ ସହଦେବଙ୍କ ସହ ଯୋଗାଯୋଗ ବେଳେ ଦୀର୍ଘ ବର୍ଷ ହେଲା ଏଠାରେ ରହି ପରିବାର ପୋଷି ଆସୁଥିଲି। ଆଜି ତହସିଲଦାରଙ୍କ ଉପସ୍ଥିତିରେ ଜବରଦଖଲ ଉଚ୍ଛେଦ କରାଯାଇଛି। ଆଇନ ଶୃଙ୍ଖଳା ପାଇଁ ଗୋପାଳପୁର ଥାନା ଅଧିକାରୀ ପ୍ରଶାନ୍ତ କୁମାର ମଲିକ, ଏଏସଆଇ ବି. ତ୍ରିପତି ରାଓଙ୍କ ସମେତ ପୁଲିସ କର୍ମଚାରୀ ଉପସ୍ଥିତ ଥିଲେ।
