ନୂଆଦିଲ୍ଲୀ,୦୩/୦୪: ଇପିଏଫ୍ଓ ସଦସ୍ୟଙ୍କ ପାଇଁ ଖୁସି ଖବର । ଏଣିକି ଇପିଏଫ କ୍ଲେମ୍ ସେଟେଲମେଣ୍ଟ ହେବ ଆହୁରି ସରଳ । କେବଳ ଏତିକି ନୁହେଁ, ଖୁବ୍ଶୀଘ୍ର ଏଟିଏମ୍ରୁ ପ୍ରୋଭିଡେଣ୍ଟ ଫଣ୍ଡ ବା ପିଏଫ ଟଙ୍କା ଉଠାଇବାର ସୁବିଧା ମଧ୍ୟ ମିଳିବ । ଆଉ ଏଥିପାଇଁ ଆରମ୍ଭ ହୋଇଯାଇଛି କାମ ।
କୋଟି କୋଟି EPF ସଦସ୍ୟ ଏବଂ ନିଯୁକ୍ତିଦାତାଙ୍କ ପାଇଁ କ୍ଲେମ୍ ପ୍ରକ୍ରିୟାକୁ ସରଳ କରିବା ପାଇଁ ଦୁଇଟି ପ୍ରମୁଖ ପରିବର୍ତ୍ତନ କରାଯାଇଛି । ପ୍ରଥମତଃ ଚେକ୍ ପତ୍ର / ପ୍ରମାଣିତ ବ୍ୟାଙ୍କ ପାସବୁକର ଫଟୋ ଅପଲୋଡ୍ କରିବାର ବ୍ୟବସ୍ଥାକୁ ହଟାଇ ଦିଆଯାଇଛି। ପୂର୍ବରୁ, ଯଦି ଆପଣଙ୍କୁ କ୍ଲେମ୍ କରିବାକୁ ପଡୁଥିଲା, ତେବେ ଆପଣଙ୍କୁ ପ୍ରଥମେ ଚେକ୍ କିମ୍ବା ପ୍ରମାଣିତ ବ୍ୟାଙ୍କ ପାସବୁକର ଫଟୋ ଅପଲୋଡ୍ କରିବାକୁ ପଡୁଥିଲା। ସରକାର ବିଶ୍ୱାସ କରନ୍ତି ଯେ ଏହି ପଦକ୍ଷେପ ଦ୍ୱାରା ପ୍ରାୟ ୮ କୋଟି ସଦସ୍ୟ ଉପକୃତ ହେବେ।
ଏହା ମଧ୍ୟ ପଢନ୍ତୁ- ୱାକଫ୍ ବିଲ୍ ବିରୁଦ୍ଧରେ ରାଜ୍ୟସଭାରେ ଭୋଟ ଦେବ ବିଜେଡି: ସଂସଦ ସସ୍ମିତ ପାତ୍ର
ସେହିପରି ଅନ୍ୟ ଏକ ପରିବର୍ତ୍ତନ ଅନୁଯାୟୀ ଏବେ ଜଣେ ସଦସ୍ୟଙ୍କୁ UAN (ୟୁନିଭର୍ସାଲ ଆକାଉଣ୍ଟ ନମ୍ବର) ସହିତ ବ୍ୟାଙ୍କ ଆକାଉଣ୍ଟ ସିଡ୍ କରିବା ପାଇଁ ନିଯୁକ୍ତିଦାତାଙ୍କ ଅନୁମୋଦନର ଆବଶ୍ୟକତା ନାହିଁ। ପୂର୍ବରୁ, ସଦସ୍ୟମାନେ ନିଯୁକ୍ତିଦାତାଙ୍କ ଅନୁମୋଦନ ବିନା ସେମାନଙ୍କ ବ୍ୟାଙ୍କ ଆକାଉଣ୍ଟ ସହିତ UAN ସିଡ୍ କରିପାରୁନ ଥିଲେ। ତେବେ ଏହି ସୁବିଧାରେ ପ୍ରାୟ ୧୫ ଲକ୍ଷ ସଦସ୍ୟଉପଲବ୍ଧ ହେବେ। ସରକାର EPFO ରୁ କ୍ଲେମ୍ କରିବାର ପ୍ରକ୍ରିୟାକୁ ଉନ୍ନତ କରିବା ପାଇଁ ନିରନ୍ତର କାର୍ଯ୍ୟ କରୁଛନ୍ତି।
