ନୂଆଦିଲ୍ଲୀ, ୮।୧୦: ଇଏସଏର ନିର୍ଦ୍ଦେଶକ ଜେନେରାଲ ଜୋସେଫ ଆସ୍ୱାଚରଙ୍କ ଅନୁଯାୟୀ, ଇଏସଏ ଖୁବଶୀଘ୍ର ଭାରତର ମହତ୍ୱାକାଂକ୍ଷୀ ନୂତନ ମହାକାଶ ଷ୍ଟେସନରେ ରହି କାମ କରିପାରିବ । ଜୋସେଫଙ୍କ ଅନୁଯାୟୀ, ସେ ସିଡନୀରେ ଅନ୍ତର୍ଜାତୀୟ ମହାକାଶ ବିଜ୍ଞାନ କଂଗ୍ରେସ ୨୦୨୫ ସମୟରେ ଇସ୍ରୋ ସହିତ କଥା ହୋଇଥିଲେ । ଇଏସଏ ଏବଂ ଇସ୍ରୋ ମଧ୍ୟରେ ମହାକାଶ ଗବେଷଣା, ପୃଥିବୀ ପର୍ଯ୍ୟବେକ୍ଷଣ, ଗଭୀର-ମହାକାଶ ଯୋଗାଯୋଗ ନେଟୱାର୍କର ବ୍ୟବହାର ଏବଂ ମହାକାଶ ବାଣିଜ୍ୟ ସମେତ ମାନବ ମହାକାଶ ଉଡ଼ାଣରେ ସହଯୋଗକୁ ସୁଦୃଢ଼ କରିବା ପାଇଁ ଆଲୋଚନା ଚାଲିଛି । ୟୁରୋପୀୟ ମହାକାଶଚାରୀମାନେ ଇସ୍ରୋର ଭାରତୀୟ ମହାକାଶ ଷ୍ଟେସନ ପରିଦର୍ଶନ ଏବଂ ଅନୁସନ୍ଧାନ କରିବାର ସୁଯୋଗ ପାଇପାରିବେ । ଏହି ଷ୍ଟେସନକୁ ଏକ ମଡ୍ୟୁଲାର ସୁବିଧା ଭାବରେ ନିର୍ମାଣ କରାଯାଉଛି ।
ଇଏସଏ ମୁଖ୍ୟ ଯୋଶେଫ କହିଛନ୍ତି ଯେ, ୟୁରୋପୀୟ ମହାକାଶଚାରୀମାନେ ଭାରତୀୟ ମହାକାଶ ଷ୍ଟେସନକୁ ଉଡ଼ାଣ ଭରିବେ । ସେ ଆହୁରି ମଧ୍ୟ କହିଛନ୍ତି, "ଆମେ ଖର୍ଚ୍ଚ, ଆର୍ଥିକ ସହାୟତା ଏବଂ କାର୍ଯ୍ୟ ସୂଚୀ ମଧ୍ୟ ବିଶ୍ଳେଷଣ କରୁଛୁ ।" ଇଏସଏର ସମ୍ପୃକ୍ତିରେ ବୈଜ୍ଞାନିକ ଅନୁସନ୍ଧାନ, ଆବଶ୍ୟକୀୟ ଭିତ୍ତିଭୂମିର ବିକାଶ ଏବଂ କାର୍ଗୋ ବିତରଣ ଅନ୍ତର୍ଭୁକ୍ତ ହୋଇପାରେ । ୨୦୨୮ ସୁଦ୍ଧା ଏହାର ପ୍ରଥମ ବିଏଏସ୍ ମଡ୍ୟୁଲ ଲଞ୍ଚ କରିବାକୁ ଲକ୍ଷ୍ୟ ରଖିଛି ଭାରତ । ୨୦୩୫ ସୁଦ୍ଧା ଷ୍ଟେସନ ସମ୍ପୂର୍ଣ୍ଣ ପ୍ରସ୍ତୁତ ହୋଇଯିବ ।
ବିଏଏସ୍ ଏବଂ ଗଗନଯାନ ମିଶନ ସହିତ ଭାରତର ମାନବ ମହାକାଶ ଉଡ଼ାଣ କ୍ଷମତା ଏବେ ବିସ୍ତାରିତ ହେଉଛି । ଏହି ସହଭାଗୀତା ଏକ ନୂତନ ଯୁଗର ଆରମ୍ଭ କରିପାରେ । ଏହି ନୂତନ ସହଭାଗୀତା ୟୁରୋପୀୟ ମହାକାଶଚାରୀମାନଙ୍କୁ ସେମାନଙ୍କର ଭାରତୀୟ ସହକର୍ମୀଙ୍କ ସହ ରହିବା ଏବଂ କାମ କରିବାର ସୁଯୋଗ ଦେବ । ଏହା ସମସ୍ତଙ୍କ ପାଇଁ ମହାକାଶ ବିଜ୍ଞାନ ଏବଂ ଗବେଷଣାକୁ ତ୍ୱରାନ୍ୱିତ କରିବ ।
