ମୁମ୍ବାଇ: ମହାରାଷ୍ଟ୍ରରେ ମନ୍ତ୍ରିମଣ୍ଡଳ ସଂପ୍ରସାରଣକୁ ନେଇ ରାଜନୀତି ଜୋର ଧରିଛି । ବିଜେପି ନେତାଙ୍କ ଅନୁସାରେ ଡିସେମ୍ବର ୧୪ରେ ମନ୍ତ୍ରିମଣ୍ଡଳ ସଂପ୍ରସାରଣ ହୋଇପାରେ । ଏହାକୁ ନେଇ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନବିସ୍ ଏବଂ ଉପମୁଖ୍ୟମନ୍ତ୍ରୀ ଅଜିତ ପାଓ୍ବାର ଦିଲ୍ଲୀ ଗସ୍ତ କରିଛନ୍ତି । କିନ୍ତୁ ଶିବସେନା ମୁଖ୍ୟ ଏବଂ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଦିଲ୍ଲୀ ଯିବାର କାର୍ଯ୍ୟକ୍ରମ ନାହିଁ ।
ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି ଯେ, ଫଡ଼ନବିସ୍ ମୁଖ୍ୟମନ୍ତ୍ରୀ ହେବା ପରେ ପ୍ରଥମ ଥର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ଉପରାଷ୍ଟ୍ରପତି ଜଗଦୀପ ଧନଖଡ଼ ସୌଜନ୍ୟମୂଳକ ସାକ୍ଷାତ କରିବେ । ଏହି ସମୟରେ ଜଣେ ବିଜେପି ନେତା କହିଛନ୍ତି ଯେ, ଶିବସେନାକୁ ଗୃହ ବିଭାଗ ମିଳିବ ନାହିଁ ଏବଂ ରାଜସ୍ବ ବିଭାଗ ଆବଣ୍ଟିତ ହେବାର କୌଣସି ସୂଚନା ନାହିଁ । ମହାୟୁତିରେ ୩ ଦଳ ଥିବାରୁ ଆଲୋଚନାରେ ବିଳମ୍ବ ହେଉଛି । କିନ୍ତୁ ଡିସେମ୍ବର ୧୪ ଭିତରେ ମନ୍ତ୍ରିମଣ୍ଡଳ ସଂପ୍ରସାରଣ ହେବାର ସମ୍ଭାବନା ରହିଛି ବୋଲି ସେ କହିଛନ୍ତି ।
ସୂଚନାଯୋଗ୍ୟ, ଏକନାଥ ସିନ୍ଦେ ମୁଖ୍ୟମନ୍ତ୍ରୀ ଥିବା ବେଳେ ଦେବେନ୍ଦ୍ର ଫଡ଼ନବିସ୍ ଉପମୁଖ୍ୟମନ୍ତ୍ରୀ ଥିଲେ ଏବଂ ତାଙ୍କ ପାଖରେ ଗୃହ ମନ୍ତ୍ରାଳୟ ଥିଲା । ଏବେ ଦେବେନ୍ଦ୍ର ଫଡ଼ନାଭିସ୍ ମୁଖ୍ୟମନ୍ତ୍ରୀ ଏବଂ ସିନ୍ଦେ ଉପମୁଖ୍ୟମନ୍ତ୍ରୀ ଅଛନ୍ତି । ଏକନାଥ ସିନ୍ଦେଙ୍କ ଦଳ ଶିବସେନା, ବିଜେପିକୁ ଗୃହ ମନ୍ତ୍ରାଳୟ ମାଗୁଥିବା କୁହାଯାଉଛି ।
ନାମ ପ୍ରଘଟ ନକରିବା ସର୍ତ୍ତରେ ବିଜେପି ନେତା କହିଛନ୍ତି, ଶିବସେନାକୁ ସହରୀ ବିକାଶ ମନ୍ତ୍ରାଳୟ ମିଳିପାରେ । କିନ୍ତୁ ରାଜସ୍ବ ବିଭାଗ ମିଳିବାର ସମ୍ଭାବନା ନାହିଁ । ବିଜେପିକୁ ୨୧ରୁ ୨୨ ମନ୍ତ୍ରୀ ମିଳିପାରନ୍ତି । ୪ରୁ ୫ଟି ମନ୍ତ୍ରୀ ପଦ ଖାଲି ରଖାଯାଇପାରେ । ମହାରାଷ୍ଟ୍ର ମନ୍ତ୍ରିମଣ୍ଡଳରେ ମୁଖ୍ୟମନ୍ତ୍ରୀଙ୍କ ସମେତ ଅଧିକରୁ ଅଧିକ ୪୩ ମନ୍ତ୍ରୀ ରହିପାରିବେ । ତେବେ ଡିସେମ୍ବର ୫ରେ ଦେବେନ୍ଦ୍ର ଫଡ଼ନାଭିସ୍, ସିନ୍ଦେ ଏବଂ ଏନସିପି ନେତା ଅଜିତ ପାଓ୍ବାରଙ୍କ ସହ ଶପଥ ନେଇଥିଲେ ।
