ନୂଆଦିଲ୍ଲୀ ୧୯/୦୫: ଗୁଜରାଟ ଜାମନଗର ଜିଲ୍ଲାର ଫଲ୍ଲା ଗାଁ ଏବେ ଚର୍ଚ୍ଚାରେ। ପାକିସ୍ତାନର ସାମୁଦ୍ରିକ ସୀମା ନିକଟରେ ଥିବା ଏହି ଗାଁର ଜନସଂଖ୍ୟା ହେଉଛି ପ୍ରାୟ ୬୦୦୦। ଶତ୍ରୁ ଦେଶର ନିକଟରେ ସମ୍ବେଦନଶୀଳ ସ୍ଥାନରେ ଥିବାରୁ ଗାଁଟି ନିଜସ୍ୱ ସୁରକ୍ଷା ଭିତ୍ତିଭୂମି ବିକଶିତ କରିଛି । ସେଥିମଧ୍ୟରେ ସିସିଟିଭି କ୍ୟାମେରା, ଜରୁରିକାଳୀନ ସାଇରନ୍, ଲାଉଡ୍ସ୍ପିକର ଓ ୱାକିଟକି ଲଗାଇବା ଭଳି ବ୍ୟବସ୍ଥା ସାମିଲ । ଏହି ଅତ୍ୟାଧୁନିକ ଉପକରଣ ଗାଁକୁ ଏକ ଅଭେଦ୍ୟ ଦୁର୍ଗରେ ପରିଣତ କରିଛି ।
ଏହାର ସମସ୍ତ ଶ୍ରେୟ ସେଠାକାର ବାସିନ୍ଦାମାନଙ୍କୁ ଯାଇଥାଏ । ଗ୍ରାମବାସୀ ମିଳିମିଶି ଗାଁକୁ ଜଗିଥାନ୍ତି । ରାତି ସମୟରେ ପାଟ୍ରୋଲିଂ କରିଥାନ୍ତି । କୌଣସି ପ୍ରକାର ବିପଦପୂର୍ଣ୍ଣ ସ୍ଥିତିର ମୁକାବିଲା ଲାଗି ସେଠାରେ ସମୟ ସମୟରେ ସଚେତନତାମୂଳକ କାର୍ଯ୍ୟକ୍ରମ ମଧ୍ୟ ଆୟୋଜିତ ହୋଇଥାଏ ।
ଗାଁରେ ପ୍ରାୟ ୨୦ଟି ସିସିଟିଭି କ୍ୟାମେରା, ୩ଟି ଜରୁରିକାଳୀନ ସାଇରନ୍, ଲାଉଡ୍ସ୍ପିକର ଓ ୬ଟି ୱାକିଟକି ଲାଗିଛି । ଗ୍ରାମବାସୀଙ୍କ ମଧ୍ୟରୁ ପାଳିକରି କିଛି ୱାକିଟକିର ଅପରେସନ୍ ସମ୍ଭାଳିଥାନ୍ତି । ଅନ୍ୟ କେଇଜଣ ସାଇରନ୍ ଓ ଲାଉଡ୍ସ୍ପିକରରେ ଘୋଷଣାର ଦାୟିତ୍ୱ ନେଇଥାନ୍ତି । ନିକଟରେ ଭାରତ-ପାକିସ୍ତାନ ମଧ୍ୟରେ ଉତ୍ତେଜନା ସମୟରେ ଏହି ଗାଁକୁ ବ୍ଲାକଆଉଟ୍ କରାଯାଇଥିଲା । ସେତେବେଳେ ଗାଁ ଲୋକେ ମିଶି ଲକ୍ଷେ ଟଙ୍କା ଯୋଗାଡ଼ କରିଥିଲେ । ସେହି ଟଙ୍କାରେ ଇନ୍ଭର୍ଟର ଓ ଅତିରିକ୍ତ ଲାଉଡ୍ସ୍ପିକର କିଣାଯାଇଥିଲା ।
