ମହିଳା ମୃତ, ହତ୍ୟା ଅଭିଯୋଗ ଆଣିଲେ ବାପ ଘର ଲୋକେ
ନୀଳଗିରି,୧୮/୩: ବରହମପୁର ଥାନା ଅନ୍ତର୍ଗତ ଗରଡ଼ିହି ଗାଁର ଜଣେ ମହିଳାଙ୍କ ମୃତ୍ୟୁ ଘଟିଛି। ପରକ୍ରିୟା ପ୍ରୀତିକୁ ନେଇ ହତ୍ୟା କରାଯାଇଛି ବୋଲି ମହିଳାଙ୍କ ବାପାଘର ଲୋକେ ଅଭିଯୋଗ କରିଛନ୍ତି। ମୃତ ମହିଳା ଜଣକ ହେଲେ ସବିତା ମଣ୍ଡଳା।
ମୟୁରଭଞ୍ଜ ଜିଲ୍ଲା କପ୍ତିପଦା ଥାନା ଅନ୍ତର୍ଗତ ପ୍ରଶାନ୍ତ ମଣ୍ଡଳଙ୍କ ଝିଅ ସବିତା ମଣ୍ଡଳଙ୍କୁ ବରହମପୁର ଥାନା ଅନ୍ତର୍ଗତ ଗରଡ଼ିହି ଗାଁର ମୁରଲୀଧର ବେହେରାଙ୍କ ପୁଅ ଦୀପ୍ତି କିଶୋର ୨୦୧୮ ବିବାହ କରିଥଲେ। ହେଲେ ବାହାଘରର କିଛିମାସ ପରେ ଦୀପ୍ତିଙ୍କ ବାପା ମା ସମେତ ପରିବାର ଲୋକେ ଅଧିକ ଯୌତୁକ ଦାବିକରି ପିଟାମରା କରିଆସୁଥିବା ଅଭିଯୋଗ ହୋଇଛି। ସବିତାଙ୍କ ଘର ଲୋକେ ଏହା ଜାଣିବା ପରେ ବହୁବାର ବୁଝାସୁଝା କରିଥିଲେ।ହେଲେ କୌଣସି ସୁଫଳ ନମିଳିବାରୁ ୨୦୨୦ ମସିହାରେ ବରହମପୁର ଥାନାରେ ଉଭୟଙ୍କ ମଧ୍ୟରେ ଥାନାରେ ବୁଝାମଣା ହୋଇଥିଲା।
ପରେ ଦୀପ୍ତିଙ୍କ ସହ ଅନ୍ୟଜଣେ ମହିଳାଙ୍କ ସହ ପ୍ରେମ ସମ୍ପର୍କ ଗଢି ଉଠିଥିଲା। ଯାହାକୁ ବିରୋଧ କରୁଥିଲେ ସବିତା। ବହୁବାର ସବିତା ଓ ଦୀପ୍ତିଙ୍କ ମଧ୍ୟରେ ଝଗଡ଼ା ହେଉଥିଲା। ଶୁକ୍ରବାର ଦୀପ୍ତିଙ୍କ ପ୍ରେମିକା ତାଙ୍କ ଘରକୁ ଆସିବା ଫଳରେ ପାଟିତୁଣ୍ଡ ହୋଇଥିଲା।ପରେ ଏହା ଉଗ୍ରରୂପ ନେଇଥିଲା।ସବିତାଙ୍କୁ ମାଡ଼ପିଟ ପରେ ତାଙ୍କର ମୃତ୍ୟୁ ହୋଇଥିବା ବେଳେ ଏହାକୁ ଆତ୍ମହତ୍ୟାର ରୂପଦେବାକୁ ଚେଷ୍ଟା କରିଥିବା ଅଭିଯୋଗ ହୋଇଛି। ଅଭିଯୋଗ ଅନୁସାରେ ଝିଅ ବିଷ ଖାଇ ଦେଇଛି ବୋଲି ଦିପ୍ତି ଫୋନରେ କହିବା ସହ ବାଲେଶ୍ଵର ହସ୍ପଟାଲରେ ଭର୍ତି ଅଛି ବୋଲି କହିଥିଲେ। ଝିଅ ମୃତଦେହ ଦେଖି ବରହମପୁର ଥାନାରେ ସବିତା ବାପଘର ଲୋକେ ଲିଖିତ ଅଭିଯୋଗ କରିଥିଲେ।
