ନୂଆଦିଲ୍ଲୀ, ୧୧/୧୧: ଆଜିଠୁ ଫିଡେ ବିଶ୍ୱକପ୍ରେ ଚତୁର୍ଥ ରାଉଣ୍ଡ୍ ମୁକାବିଲା ଆରମ୍ଭ ହେବ । ଏଥିରେ ରାଉଣ୍ଡରେ ୫ଜଣ ଭାରତୀୟ ଗ୍ରାଣ୍ଡମାଷ୍ଟରଙ୍କ ଉପରେ ସମସ୍ତଙ୍କ ନଜର ରହିବ । ସେମାନେ ହେଲେ ଗତ ସଂସ୍କରଣର ରନର୍ସ ଆର୍. ପ୍ରଜ୍ଞାନନ୍ଦା, ଦ୍ୱିତୀୟ ସିଡ୍ ଅର୍ଜୁନ ଏରିଗାଇସି, ପେଣ୍ଟାଲା ହରିକ୍ରିଷ୍ଣା, ଭି. ପ୍ରଣବ ଓ କାର୍ତ୍ତିକ ଭେଙ୍କଟରମଣ । ବିଶ୍ୱ ଚେସ୍ ଚାମ୍ପିଅନସିପ୍ ଚାମ୍ପିଅନ୍ ଡି. ଗୁକେଶ ବିଦାୟ ନେବାପରେ ପ୍ରଜ୍ଞାନନ୍ଦା ଓ ଏରିଗାଇସିଙ୍କ ଉପରେ ଦେଶବାସୀଙ୍କ ନଜର ରହିବ । ଚତୁର୍ଥ ରାଉଣ୍ଡରେ ଏରିଗାଇସି ହଙ୍ଗେରୀର ଭେଟେରାନ ଖେଳାଳି ପିଟର ଲେକୋଙ୍କୁ ସାମ୍ନା କରିବେ ।
ସେହିପରି ପ୍ରଜ୍ଞାନନ୍ଦା ରୁଷିଆର ଡାନିଏ ଡୁବୋଭଙ୍କୁ ଭେଟୁଥିବାବେଳେ ହରିକ୍ରିଷ୍ଣା ସ୍ୱିଡେନର ନିଲ୍ସ ଗ୍ରାଣ୍ଡେଲିଉସ୍ଙ୍କୁ, ପ୍ରଣବ ଉଜବେକିସ୍ତାନର ନୋଡିରବେକ ୟାକୁବବୋଏଭଙ୍କୁ ଏବଂ କାର୍ତ୍ତିକ ଭିଏତନାମର ଲି କୁଆଙ୍ଗ୍ ଲିମ୍ଙ୍କୁ ଭେଟିବେ । ପ୍ରଥମ ରାଉଣ୍ଡ ବାଇ ପାଇଥିବା ଏରିଗାଇସି ଚମତ୍କାର ପ୍ରଦର୍ଶନ ଜାରି ରଖିଛନ୍ତି । ସେ ଦ୍ୱିତୀୟ ଓ ତୃତୀୟ ରାଉଣ୍ଡରେ ୨ଟି ଯାକ କ୍ଲାସିକାଲ ଗେମ୍ ମଧ୍ୟରେ ବିଜୟ ହାସଲ କରିଥିଲେ । ପ୍ରଜ୍ଞାନନ୍ଦା ଦ୍ୱିତୀୟ ରାଉଣ୍ଡରେ ଅଳ୍ପକେ ପରାଜୟରୁ ବର୍ତ୍ତିଥିଲେ । ସେ ୫-୩ରେ ଅଷ୍ଟ୍ରେଲିଆ ଖେଳାଳିଙ୍କୁ ହରାଇଥିଲେ । ଏହାପରେ ତୃତୀୟ ରାଉଣ୍ଡରେ ଉଭୟ କ୍ଲାସିକାଲ ଗେମ୍ ମଧ୍ୟରେ ବିଜୟ ହାସଲ କରିଥିଲେ ।
