ନୂଆଦିଲ୍ଲୀ, ୨୦/୦୧ : କ୍ରୁର ହେବାକୁ ଯାଉଛି ମୋରକ୍କୋ । ଫିଫା ବିଶ୍ଵକପ୍ ୨୦୩୦ ପାଇଁ ବଳି ପଡ଼ିବେ ଲକ୍ଷାଧିକ କୁକୁର। ସ୍ଵଚ୍ଛତା ଆଳରେ କଠୋର ହେବାକୁ ଯାଉଛି ମୋରକ୍କୋ। ବିଶ୍ଵକପ୍ ମେଗା ଇଭେଣ୍ଟ ପାଇଁ ଆରମ୍ଭ କରିସାରିଲାଣି ପ୍ରସ୍ତୁତି। ବୁଲା କୁକୁରଙ୍କୁ ବଳି ପକାଇବାକୁ ଯାଉଛନ୍ତି ମୋରକ୍କୋ ସରକାର।ଏପରି ନିଷ୍ପତ୍ତିକୁ ନେଇ ଉଠିଛି ପ୍ରତିବାଦର ସ୍ଵର।
ମୋରକ୍କୋ, ସ୍ପେନ ଏବଂ ପର୍ତ୍ତୁଗାଲର ମିଳିତ ଆୟୋଜନରେ ଖେଳାଯିବ ଫିଫା ବିଶ୍ଵକପ୍ ୨୦୩୦। ମ୍ୟାଚ୍ ଦେଖିବାକୁ ବିଭିନ୍ନ ଦେଶ ବିଦେଶରୁ ଆସିବେ ଲକ୍ଷାଧିକ ଫ୍ୟାନ୍ସ। ସେମାନଙ୍କ ସୁରକ୍ଷା ଦୃଷ୍ଟିରୁ କଠୋର ନିଷ୍ପତ୍ତି ନେଇଛନ୍ତି ମୋରକ୍କୋ ସରକାର। ଅତିଥିଙ୍କୁ ଯେପରି କୌଣସି ଅସୁବିଧା ନହେବ ସେଥିପାଇଁ ୩୦ ଲକ୍ଷ ବୁଲା କୁକୁରଙ୍କୁ ଅମାନବୀୟ ଭାବେ ହତ୍ୟା କରିବ ପ୍ରଶାସନ। ବୁଲା କୁକୁରଙ୍କୁ ମାରାତ୍ମକ ବିଷ ଦେଇ କିମ୍ଵା ଗୁଳି କରି ହତ୍ୟା କରିବାକୁ କରାଯାଇଛି ଯୋଜନା। କେବଳ ସେତିକି ନୁହେଁ ସେମାନଙ୍କୁ ଅତି ନୃଶଂସ ଭାବେ ଫାଉଡ଼ାରେ ପିଟିପିଟି ହତ୍ୟା କରିବାକୁ ମଧ୍ୟ ନିଆଯାଇଛି ନିଷ୍ପତ୍ତି। ତେବେ ଏହି ଖବର ଚର୍ଚ୍ଚାକୁ ଆସିବା ପରେ ଏହାକୁ ତୀବ୍ର ବିରୋଧ କରୁଛନ୍ତି ଆନିମଲ୍ ରାଇଟସ୍ ଆକ୍ଟିଭିଷ୍ଟ। ସେପଟେ ଏହି ଜଘନ୍ୟ ହତ୍ୟାକାଣ୍ଡ ଅଟକାଇବାକୁ ଫିଫା ମହାସଚିବଙ୍କୁ ଅପିଲ୍ କରିଛନ୍ତି ପଶୁ ସୁରକ୍ଷା ଅଧିକାର ଆଇନଜୀବୀ ଜୈନ ଗୁଡଲ। ଯଦି ମୋରକ୍କୋ ସରକାର ତାଙ୍କର ଏହି କ୍ରୁର ନିଷ୍ପତ୍ତି ନବଦଳାନ୍ତି ତାହେଲେ ତାଙ୍କ ଠାରୁ ଆୟୋଜନର ଅଧିକାର ପ୍ରତ୍ୟାହାର କରିବାକୁ କହିଛନ୍ତି ଜୈନ।
ଏକ ରିପୋର୍ଟ ଅନୁସାରେ, ମୋରକ୍କୋରେ ବୁଲା କୁକୁରଙ୍କ ହତ୍ୟା ଉପରେ ରୋକ୍ ଲଗାଇବା ପାଇଁ ଆଇନ ରହିଛି, କିନ୍ତୁ ପ୍ରଶାସନ ଏହାକୁ ବେଆଇନ ଭାବେ କରୁଛି। ସେପଟେ କୁକୁର ହତ୍ୟା ରୋକି ଦେଇଥିବା ୨୦୨୪ ଅଗଷ୍ଟରେ ଫିଫାକୁ କହିଥିଲା ମୋରକ୍କୋ। ଏହାକୁ ଆଖି ବନ୍ଦ କରି ବିଶ୍ଵାସ କରୁଛି ଫିଫା। ଫୁଟବଲ ଗଭର୍ଣ୍ଣିଂ ବଡି ମଧ୍ୟ ଏହି ପ୍ରସଙ୍ଗରେ ନୀରବ ରହିଛନ୍ତି। ସେହିପରି ଫିଫା ମୋରକ୍କୋ ଉପରେ ତୀକ୍ଷ୍ଣ ଦୃଷ୍ଟି ରଖିଛି ବୋଲି ଆଉ କିଛି ରିପୋର୍ଟରେ ଦାବି କରାଯାଇଛି।
