ଜଳେଶ୍ଵର/ଭୋଗରାଇ, ୨୩/୬ : କମୁଛି ସୁବର୍ଣ୍ଣରେଖା ନଦୀର ଜଳସ୍ତର। ହେଲେ କମିନି ଦୁର୍ଦ୍ଦଶା। ଏବେବି ଗାଁ ଦାଣ୍ଡରେ ଲହଡ଼ି ମାରୁଛି ବନ୍ୟାଜଳ। ବନ୍ୟାପାଣି ଛାଡ଼ି ନଥିବାରୁ ତଳିଆ ଅଞ୍ଚଳବାସୀ ହନ୍ତସନ୍ତ ହେଉଛନ୍ତି। ବାଲେଶ୍ଵର ଜିଲ୍ଲା ଭୋଗରାଇ ବ୍ଲକର ୧୫ ଉର୍ଦ୍ଧ୍ଵ ପଞ୍ଚାୟତ ପ୍ରଭାବିତ ହୋଇଛନ୍ତି। ବିଶେଷ କରି କୁମ୍ଭୀରଗଡି, ମନୁ ନଗର, ଖୋଲାବାଡ଼ିଆ, ଆରୁହାବର୍ତି, କୁଲ୍ହା, କୁସୁଡ଼ା ଗବଗାଁ, ଆଦି ଗାଁରେ ଏବେବି ଲୋକଙ୍କ ଘର ଦ୍ୱାର ବନ୍ୟା ପାଣିରେ ବୁଡ଼ି ରହିଛି। ୧୧୦ ହେକ୍ଟର ପରିବା ଚାଷ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ଲୋକମାନେ ଉଚ୍ଚା ସ୍ଥାନରେ ପଲିଥିନ୍ ତଳେ ସାହାରା ନେଇଛନ୍ତି। କେତେକ ସ୍ଥାନରେ ରିଲିଫ୍ ସାମଗ୍ରୀ ପହଞ୍ଚି ନଥିବା କାରଣରୁ ଅସନ୍ତୋଷ ପ୍ରକାଶ ପାଇଛି।
ସେହିପରି ବାଳିଆ ବ୍ଲକର ୬ଟି ପଞ୍ଚାୟତ ବିଷ୍ଣୁପୁର, ଅସ୍ତି, ମଧୁପୁରା, ବାଲିଆପାଳ, ଜାମକୁଣ୍ଡାର ୨୦ରୁ ଅଧିକ ଗାଁ ପ୍ରଭାବିତ ହୋଇଛି। ଏବେବି ଚୌଧୁରୀକୁଦ, ବିଷ୍ଣୁପୁର, ଚଢ଼ବସ୍ତ କଳାରୁହି, ପାଳଚାମ୍ପି, ଜାମକୁଣ୍ଡା, କୁହ୍ଲାଚଢ଼, ତାଳପଡା, ବଡ଼ତାଳପଦା ଆଦି ଗାଁ ବାହ୍ୟ ଜଗତରୁ ବିଛିନ୍ନ ରହିଛି। ହେକ୍ଟର ହେକ୍ଟର ଚାଷ ଜମିରେ ବନ୍ୟା ଜଳ ଲହଡ଼ି ମାରୁଛି। ପରିବା ଓ ଲଳିତା ଚାଷ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ରାଜଘାଟ ଠାରେ ସତର୍କ ସୂଚନା ତଳେ ସୁବର୍ଣ୍ଣରେଖା ନଦୀ ଜଳ ପ୍ରବାହିତ ହେଉଛି। ସତର୍କ ସୂଚନା ୯. ୪୫ମିଟର ଥିଲା ବେଳେ ସକାଳ ୬ଟା ସୁଦ୍ଧା ଜଳସ୍ତର ୮. ୯୧ ମିଟର ରହିଛି।
