ଗୁଆହାଟୀ,୨୦/୫ : ଆସାମରେ ବନ୍ୟା ପରିସ୍ଥିତି ଗମ୍ଭୀର ହୋଇଛି । ତେବେ ବନ୍ୟା ପ୍ରଭାବିତ ହୋଜାଇ ଅଞ୍ଚଳକୁ ସ୍ଥିତି ଅନୁଧ୍ୟାନ କରିବାକୁ ଯାଇଥିବା ଲୁମଡିଙ୍ଗର ବିଜେପି ବିଧାୟକ ଶିବୁ ମିଶ୍ରଙ୍କୁ ଜଣେ ରିଲିଫ କର୍ମୀ ପିଠିରେ ବୋହି ବୋଟ୍‌ ପର୍ଯ୍ୟନ୍ତ ନେବାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଯେଉଁଥି ପାଇଁ ବିଧାୟକଙ୍କୁ ବିଭିନ୍ନ ମହଲରୁ କଡା ସମାଲୋଚନା କରାଯାଇଛି ।

 ସେପଟେ ବନ୍ୟା ଯୋଗୁ ୨୭ଟି ଜିଲ୍ଲାର ୬ ଲକ୍ଷ ୨୭ ହଜାରରୁ ଅଧିକ ଲୋକ ପ୍ରଭାବିତ ହୋଇଛନ୍ତି । ବନ୍ୟା ଓ ଭୂସ୍ଖ୍‌ଳନ ଯୋଗୁ ଏପର୍ଯ୍ୟନ୍ତ ୯ ଜଣଙ୍କର ମୃତ୍ୟୁ ଘଟିଲାଣି । ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଙ୍କ ସୂଚନା ଅନୁସାରେ ୧୪୧୩ଟି ଗ୍ରାମ ବନ୍ୟା ଜଳରେ ବୁଡି ରହିଛି । ବନ୍ୟା ଯୋଗୁ ନଗାଓଁ ଜିଲ୍ଲା ସର୍ବାଧିକ ପ୍ରଭାବିତ ହୋଇଛି । ଏହି ଜିଲ୍ଲାରେ ୨ ଲକ୍ଷ ୮୮ ହଜାର ଲୋକ କ୍ଷତିଗ୍ରସ୍ତ ହୋଇଥିଲା ବେଳେ କାଚ୍ଚାର ଜିଲ୍ଲାରେ ୧ ଲକ୍ଷ ୨୦ ହଜାର ଓ  ହେଜାଇ ଜିଲ୍ଲାରେ ୧ ଲକ୍ଷ ୭ ହଜାରରୁ ଅଧିକ ଲୋକ ପ୍ରଭାବିତ ହୋଇଛନ୍ତି ।

 ଅଧିକ ପ୍ରଭାବିତ ୧୪ଟି ଜିଲ୍ଲାରେ ୨୪୮ଟି ରିଲିଫ କେନ୍ଦ୍ର ପ୍ରତିଷ୍ଠା କରାଯାଇଛି । ସେଥରେ ୪୮ ହଜାରରୁ ଅଧିକ ଲୋକଙ୍କୁ ଆଶ୍ରୟ ଦିଆଯାଇଛି । ଉଦ୍ଧାର କାର୍ଯ୍ୟରେ ଏନ୍‌ଡିଆରଏଫ ଟିମକୁ ମଧ୍ୟ ନିୟୋଜିତ କରାଯାଇଛି ।