ପୁରୀ: ମହାପ୍ରଭୁଙ୍କ ରତ୍ନଭଣ୍ଡାର ସମ୍ପୂର୍ଣ୍ଣ ଭାବେ ସୁରକ୍ଷିତ । ଆସନ୍ତା ନୀଳାଦ୍ରି ବିଜେ ସୁଦ୍ଧା ସମସ୍ତ କାର୍ଯ୍ୟ ଶେଷ ହେବ । ରତ୍ନଭଣ୍ଡାର ମରାମତି କାର୍ଯ୍ୟ ଯାଞ୍ଚ ପରେ ପ୍ରତିକ୍ରିୟା ରଖିଛନ୍ତି ଗଜପତି ମହାରାଜ । ସେ କହିଛନ୍ତି, ମହାପ୍ରଭୁଙ୍କ ରତ୍ନଭଣ୍ଡାର ସମ୍ପୂର୍ଣ୍ଣ ଭାବେ ସୁରକ୍ଷିତ ଅଛି । ମରାମତି କାର୍ଯ୍ୟ ପରେ ଅତି ସୁନ୍ଦର ଦିଶୁଛି । ମନ୍ଦିର ନିର୍ମାଣ ଶୈଳୀରେ ସମସ୍ତ ମରାମତି କାର୍ଯ୍ୟ ହୋଇଛି । ଏଥିରେ ପ୍ରାୟ ୬ଶହ ନୂଆ ପଥର ଲାଗିଛି । ଅନ୍ୟପଟେ ଶ୍ରୀଜିଉ ରତ୍ନ ସିଂହାସନକୁ ଆସିଲା ପରେ ଗଣତି-ମଣତି ହେବ । ରାଜ୍ୟ ସରକାରଙ୍କ ପରାମର୍ଶରେ ଆତିଶୀଘ୍ର କାମ ଆରମ୍ଭ ହେବା ବୋଲି ଗଜପତି ମହାରାଜ କହିଛନ୍ତି ।
ସୂଚନା ଅନୁଯାୟୀ, ମହାପ୍ରଭୁ ଶ୍ରୀଜଗନ୍ନାଥ ଭାଇ-ଭଉଣୀଙ୍କ ସହିତ ନବଦିନାତ୍ମକ ଯାତ୍ରା ଅଛନ୍ତି । ଏହି ସମୟରେ ଗଜପତି ମହାରାଜା ଦିବ୍ୟସିଂହ ଦେବ ଶ୍ରୀମନ୍ଦିରରେ ରତ୍ନଭଣ୍ଡାର ଅନୁଧ୍ଯାନ କରିଛନ୍ତି । ରତ୍ନଭଣ୍ଡାର ମରାମତି କାର୍ଯ୍ୟ ପ୍ରାୟ ଶେଷ ପର୍ଯ୍ୟୟରେ ପହଞ୍ଚିଛି । ଏହାକୁ ମନ୍ଦିର ଶୈଳୀରେ ନିର୍ମାଣ କରାଯାଇଛି । ଏଥିରେ ୬ ଶହରୁ ଅଧିକ ପଥର ବଦଳା ଯାଇ ସମସ୍ତ ବିମକୁ ମଜଭୁତ କରଯାଇଛି । ଭଣ୍ଡାରର ବାହାର ଓ ଭିତର ଅଂଶରେ ରସାୟନିକ ପ୍ରଲେପ ଦିଆଯାଇ ସଂରକ୍ଷିତ କରାଯାଉଛି ।
ଏଥିସହ ରତ୍ନଭଣ୍ଡାର କାର୍ଯ୍ୟରେ ୮୦ରୁ ଅଧିକ କୁଶଳୀ କାରିଗର ପର୍ଯ୍ୟାୟ କ୍ରମେ ନିର୍ମାଣ କାର୍ଯ୍ୟ କରୁଛନ୍ତି । ଶ୍ରୀମନ୍ଦିରର ସମସ୍ତ ରୂପ ଦ୍ୱାରକୁ ପରିସ୍କାର କରାଯାଇଥିବା ବେଳେ ବାକି ଦ୍ୱାରକୁ ବର୍ମାଟିକ କାଠରେ ତିଆରି ନୂଆ କବାଟ ଲଗାଯିବ । ଗର୍ଭଗୃହର କାଠ ନିର୍ମିତ କନକ ମୁଣ୍ଡିକୁ ବଦଳାଯାଇ ସ୍ଟେନଲେସ ଷ୍ଟିଲ୍ କନକ ମୁଣ୍ଡି ଲଗାଯାଉଅଛି । ସେପଟେ ରତ୍ନଭଣ୍ଡାର ମରାମତି ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ବି ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ଗଜପତି ନିଜେ ତଦାରଖ କରି ବୈଷୟିକ କମିଟିକୁ ଧନ୍ୟବାଦ ଦେଇଛନ୍ତି । ଭିତର ରତ୍ନଭଣ୍ଡାର ମରାମତି କାମ ପ୍ରାୟତଃ ଶେଷ ହୋଇଛି । ବାହାର ରତ୍ନଭଣ୍ଡାର କାମ ଦିନେ ଦୁଇ ଦିନ ଭିତରେ ଶେଷ ହେବ ।
