ମାଣ୍ଡୋଲି ଜେଲକୁ ସ୍ଥାନାନ୍ତର ହେଲା ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇ, ତିହାରରେ ଗ୍ୟାଙ୍ଗ ଓ୍ବାର୍ ପରେ କଡା ପଦକ୍ଷେପ
ନୂଆଦିଲ୍ଲୀ୨୫/ ୦୫: ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇକୁ ଗୁରୁବାର ସକାଳୁ ଅହମଦାବାଦର ସାବରମତି ସେଣ୍ଟ୍ରାଲ ଜେଲରୁ ଦିଲ୍ଲୀ ଜେଲକୁ ସ୍ଥାନାନ୍ତର କରାଯାଇଛି । ଗୁଜରାଟ ପୋଲିସର ସ୍ବତନ୍ତ୍ର ଟିମ୍ ଲରେନ୍ସ ବିଷ୍ଣୋଇକୁ କଡା ସୁରକ୍ଷା ବଳୟ ମଧ୍ୟରେ ଦିଲ୍ଲୀ ଆଣିଛନ୍ତି । ସୀମା ପାର୍ ଡ୍ରଗ୍ସ ସ୍ମଗଲିଂ ମାମଲାରେ ଗୁଜରାଟର ଆଣ୍ଟି ଟେରରିଷ୍ଟ ସ୍କ୍ବାଡ୍ (ATS) ଟିମ୍ ଗତ ଏପ୍ରିଲ ମାସରେ ଲରେନ୍ସ ବିଷ୍ଣୋଇକୁ ଦିଲ୍ଲୀରୁ ଅହମଦାବାଦ ଆଣିଥିଲେ ।
ଡ୍ରଗ୍ସ ମାମଲାରେ ଲରେନ୍ସ ବିଷ୍ଣୋଇକୁ ୧୪ ଦିନିଆ ହେପାଜତକୁ ନେବା ପାଇଁ, ଗତ ଏପ୍ରିଲ ମାସରେ ଗୁଜରାଟ ଏଟିଏସ୍କୁ ଅନୁମତି ଦେଇଥିଲେ କଚ୍ଚ ମାଜିଷ୍ଟ୍ରେଟ୍ କୋର୍ଟ । ୧୪ ଦିନିଆ ରିମାଣ୍ଡ ଶେଷ ହେବା ପରେ ତାକୁ ଗୁଜରାଟର ସାବରମତି ଜେଲରେ ରଖାଯାଇଥିଲା । ଗୁରୁବାର ସକାଳୁ ପୁଣି ତାକୁ ଦିଲ୍ଲୀ ଅଣାଯାଇଛି । ପଞ୍ଜାବୀ ଗାୟକ ସିଦ୍ଧୁ ମୁସେଓ୍ବାଲା ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ହେଉଛି ଉରେନ୍ସ ବିଷ୍ଣୋଇ । ତା’କୁ ଗତ ବର୍ଷ ଗିରଫ କରିଥିଲା ପଞ୍ଜାବ ପୋଲିସ ।
#WATCH | Gangster Lawrence Bishnoi brought to Delhi from Ahmedabad's Sabarmati Central Jail
— ANI (@ANI) May 24, 2023
He was taken to Gujarat by Gujarat Anti-Terrorist Squad (ATS) in connection with a case of cross-border smuggling of drugs. pic.twitter.com/bXLrG0Sg8l
ମିଳିଥିବା ସୂଚନା ଅନୁଯାୟୀ, ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇକୁ ସୁରକ୍ଷା ଦୃଷ୍ଟିରୁ ମାଣ୍ଡୋଲୀ ଜେଲକୁ ନିଆଯାଇଛି । ତାକୁ ସେଲ୍ ନମ୍ବର ୧୫ରେ ହାଇ ସିକ୍ୟୁରିଟି କ୍ୟାମେରା ଓ କଡା ସୁରକ୍ଷା ମଧ୍ୟରେ ରଖାଯାଇଥିଲା ସୂଚନା ମିଳିଛି । ତିହାର ଜେଲରେ ଦୁର୍ଦ୍ଦାନ୍ତ ଗ୍ୟାଙ୍ଗଷ୍ଟର ଟିଲୁ ତାଜପୁରିୟାକୁ ଅତି ନିର୍ମମ ଭାବେ ହତ୍ୟା କରାଯିବା ପରେ ଲରେନ୍ସ ବିଷ୍ଣୋଇକୁ ପୁଣି ସେହି ଜେଲକୁ ନିଆଯାଇ ନାହିଁ । ଜେଲ କର୍ତ୍ତୃପକ୍ଷଙ୍କ ନିଷ୍ପତ୍ତି ପରେ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇକୁ ମାଣ୍ଡୋଲୀ ଜେଲକୁ ନିଆଯାଇଛି ।
ସୂଚନା ଯେ, ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇ ନାଁ ରେ ୧୨ରୁ ଉର୍ଦ୍ଧ୍ବ ମାମଲା ରହିଛି । ଏକାଧିକ ହତ୍ୟାରେ ସଂପୃକ୍ତି, ଲୁଟ୍ ଓ ଦାଦା ବଟି ଆଦାୟ ଭଳି ମାମଲାରେ ସଂପୃକ୍ତ ରହିଥିଲା ଲରେନ୍ସ । ଗତ ବର୍ଷ ପଞ୍ଜାବୀ ଗାୟକ ସିଦ୍ଧୁ ମୁସେଓ୍ବାଲା ହତ୍ୟାକାଣ୍ଡ ମାମଲାରେ ମାଷ୍ଟର ମାଇଣ୍ଡ ଥିଲା ଲରେନ୍ସ ବିଷ୍ଣୋଇ ।
