ଭାପୁର, ୧୯।୧୧ (ଆପ୍ର): ଭାପୁର ଠାରୁ କଳାପଥର ବାଇପାସ୍ ରାସ୍ତା ନିକଟରେ ଏକ ଅଟୋରୁ  ଫତେଗଡ ପୋଲିସ ଗଞ୍ଜେଇ ଜବତ କରିବା ସହ ୩ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଫତେଗଡ ଥାନା ଅନ୍ତର୍ଗତ ବାହାଡା ଗ୍ରାମର  ଧନୁ ଦଳେଇ , ମନୋଜ କୁମାର ନାୟକ ଓ କୁସୁମତୀ ଗ୍ରାମର ସତ୍ୟନାରାୟଣ ସାହୁ।‌ 

ଭାପୁର ବିଟ୍ ହାଉସ ଅଧିକାରୀ ସଞ୍ଜୟ କୁମାର ପରିଡ଼ା, ଏଏସଆଇ ଭାବଗ୍ରାହୀ ମଲ୍ଲିକ ଓ ପୋଲିସ କର୍ମଚାରୀ ପେଟ୍ରୋଲ° କରୁଥିବା ବେଳେ ବାହାଡା ନିକଟରେ ଏକ ଅଟୋ ଗାଡି ଦ୍ରୃତଗତିରେ ଯାଉଥିବା ଦେଖିବାକୁ ପାଇଥିଲେ। ଗାଡ଼ି ଉପରେ ସନ୍ଦେହ ହେବାରୁ ପିଛାକରି ଭାପୁର ଠାରୁ କଳାପଥର ବାଇପାସ୍ ରାସ୍ତା ନିକଟରେ ଅଟକ ରଖି ତନଖି ବେଳେ ଗାଡ଼ି ଭିତରେ ଗଞ୍ଜେଇ ଥିବା ଜଣାପଡିଥିଲା। ଅଟୋ ଭିତରୁ ୧୭ କେଜି ୭ଶହ ଗ୍ରାମ ଗଞ୍ଜେଇ ସହ ଅଟୋ ଗାଡ଼ି, ତିନିଗୋଟି ମୋବାଇଲ ଓ ୧୬ ଶହ ଟଙ୍କା ଜବତ କରିଥିଲେ। ମାଜିଷ୍ଟ୍ରେଟ ତହସିଲଦାର ଅର୍ଜୁନ କୁମାର ପ୍ରଧାନଙ୍କ ଉପସ୍ଥିତରେ ଗଞ୍ଜେଇ ଓଜନ ହୋଇଥିଲା। ଏହି ଘଟଣାରେ ଫତେଗଡ ଥାନାଧିକାରୀ ପଞ୍ଚାନନ ପରିଡ଼ା କେସ ନଂ ୨୯୨ /୨୪ ମାମଲା ରୁଜୁ କରି ଧନୁ, ମନୋଜ ଓ ସତ୍ୟନାରାୟଣଙ୍କୁ କୋର୍ଟ ଚାଲାଣ କରିଥିବା ସୂଚନା ମିଳିଛି। କିଛି ଦିନ ତଳେ ଫତେଗଡ ପୋଲିସ ମାଧପୁର ଛକରୁ କାର ଗାଡି ସହିତ ଛଅ କିଲୋ ଗଞ୍ଜେଇ ଜବତ କରିବା ସହ ଦୁଇଜଣ ଯୁବକଙ୍କୁ ଗିରଫ  କରିଥିଲେ।