ଜି.ଉଦୟଗିରି,୨/୦୩: ଦିନକୁ ଦିନ ବଢିବାରେ  ଲାଗିଛି ଚୋରଙ୍କ ଉତ୍ପାତ । ଘରେ ବସି ବୁଲାଉଛନ୍ତି କଳାକନା । ଆସିକା ଅତିରିକ୍ତ ଗୋଷ୍ଠୀ ଶିକ୍ଷାଧିକାରୀଙ୍କ ଘରୁ ଲକ୍ଷାଧିକ ଟଙ୍କାର ସୁନା ଗହଣା ଚୋରି ହୋଇଛି । ତାଲା ଭାଙ୍ଗି ଘରେ ପଶି ଚୋରି କରି ନେଇଛନ୍ତି ଦୁର୍ବୃତ୍ତ ।

ସୂଚନା ଅନୁସାରେ, ଆସିକା ଅତିରିକ୍ତ ଗୋଷ୍ଠୀ ଶିକ୍ଷାଧିକାରୀ ବିଭୁନନ୍ଦନ ପଣ୍ଡାଙ୍କ ଜି.ଉଦୟଗିରି ସ୍ଥିତ ବାସଭବନରୁ ଲକ୍ଷାଧିକ ଟଙ୍କାର ସୁନା ଗହଣା ଚୋରି ହୋଇଛି । ପ୍ରଧାନ କଲୋନୀ ସ୍ଥିତ ତାଙ୍କ ବାସଭବନର ସାମ୍ନା ପଟୁ ତାଲା ଭାଙ୍ଗି ସୁନା ଅଳଙ୍କାର ଚୋରି କରି ନେଇଛନ୍ତି ଦୁର୍ବୁତ୍ତ । ବିଭୁନନ୍ଦନ ପଣ୍ଡା ଆସିକା ଗୋଷ୍ଠୀ ଶିକ୍ଷା ଅଧିକାରୀଙ୍କ କାର୍ଯ୍ୟଳୟରେ କାମ ସାରି ଶନିବାର ଅପରାହ୍ନ ପ୍ରାୟ ୫ଟା ବେଳେ ଘରକୁ ଫେରିଥିଲେ । ଏହାପରେ ସେ ସାମ୍ନା କବାଟ ଖୋଲା ଥିବା ଦେଖିବାକୁ ପାଇଥିଲେ । ଘର ଭତରକୁ ଯାଇ ଦେଖନ୍ତି ତ ଜିନିଷ ପତ୍ର ଏଣେତେଣ ପଡିଛି । ଆଲମିରା ତଡା ହୋଇଛି । ସେଥିରେ ଥିବା ସୁନା ଗହଣା ଚୋରି ହୋଇଥିବା ଦେଖିବାକୁ ପାଇଥିଲେ । ଚୋରି ସୁନାଗହଣାର ଦାମ ଲକ୍ଷାଧିକ ହେବ ବୋଲି ଅନୁମାନ କରାଯାଉଛି । 

ତୁରନ୍ତ ଜି.ଉଦୟଗିରି ଥାନାରେ ଖବର ଦେଇଥିଲେ I ଥାନା ଅଧିକାରୀ ବିଜୟ କୁମାର ସ୍ୱାଇଁ ପହଞ୍ଚି ଛାନଭିନ କରିଛନ୍ତି ।  ଏ ନେଇ ଜି.ଉଦୟଗିରି ଥାନାରେ ୪୦/୨୫ ରେ ଏକ ମାମଲା ରୁଜୁ ହୋଇ ତଦନ୍ତ ଚାଲିଥିବା ଥାନା ଅଧିକାରୀ କହିଛନ୍ତି ।  ଲକ୍ଷାଧିକ ଟଙ୍କାର ସୁନା ଗହଣା ଚୋରି ହୋଇଥିବା ଅଭିଯୋଗକାରୀ ପ୍ରକାଶ କରିଛନ୍ତି ।