ନାଭି ମୁମ୍ବାଇ: ଶୁକ୍ରବାର ମଧ୍ୟରାତ୍ରୀରେ ନାଭି ମୁମ୍ବାଇର ବେଲାପୁର ଅଞ୍ଚଳରେ ଏକ ଅଡି କାର ଗୁଗଲ୍ ମ୍ୟାପ୍ସ୍ ନିର୍ଦ୍ଦେଶ ଅନୁସରଣ କରି ଏକ ଖାଇରେ ଖସିପଡ଼ିଥିବାର ଖବର ମିଳିଛି। ଘଟଣାଟି ରାତି ପ୍ରାୟ ୧ଟା ସମୟରେ ଘଟିଥିଲା, ଯେତେବେଳେ ଜଣେ ମହିଳା ବେଲାପୁରରୁ ଉଲୱେ ଅଭିମୁଖେ ଯାତ୍ରା କରୁଥିଲେ।
ସୂଚନା ଅନୁଯାୟୀ, ଗୁଗଲ୍ ମ୍ୟାପ୍ସ୍ ତାଙ୍କୁ ବେଲାପୁରରେ ଥିବା ବେ ବ୍ରିଜ୍ ଉପରେ ଯିବା ପରିବର୍ତ୍ତେ ବ୍ରିଜ୍ ତଳେ ଥିବା ଏକ ରାସ୍ତା ଦେଇ ଧ୍ରୁବତାରା ଜେଟି ଆଡ଼କୁ ନେଇଥିଲା। ଏହି ରାସ୍ତା ଅନୁସରଣ କରି ମହିଳା ଜଣଙ୍କ ଗାଡି ଚଲାଉଥିବାରୁ ତାଙ୍କ ଗାଡ଼ି ସିଧାସଳଖ ଯାଇ ଏକ ଖାଇରେ ଖସିପଡ଼ିଥିଲା। ସୌଭାଗ୍ୟବଶତଃ, ନିକଟସ୍ଥ ମେରାଇନ୍ ସିକ୍ୟୁରିଟି ଫୋର୍ସ ଏହି ଘଟଣା ଦେଖି ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ।
ସହକାରୀ ପୁଲିସ ଇନ୍ସପେକ୍ଟର ନାରାୟଣ ପାଲମପାଲେ କହିଛନ୍ତି, "ରାତି ପ୍ରାୟ ୧ଟା ସମୟରେ ଆମକୁ ବେଲାପୁର ଖାଇରେ ଏକ ଅଡି ଗାଡ଼ି ଖସିପଡ଼ିଥିବା ସୂଚନା ମିଳିଥିଲା। ଆମ ଟିମ୍ ମେରାଇନ୍ ସିକ୍ୟୁରିଟି ଗାର୍ଡ ଓ ସ୍ଥାନୀୟ ପୁଲିସ ସହାୟତାରେ ଘଟଣାସ୍ଥଳରେ ପହଞ୍ଚି ଜାଣିପାରିଥିଲୁ ଯେ ମହିଳା ଜଣଙ୍କ ଗୁଗଲ୍ ମ୍ୟାପ୍ସ୍ ଅନୁସରଣ କରି ଉଲୱେ ଯାଉଥିଲେ। ଏହି କାରଣରୁ ବ୍ରିଜ୍ ଉପରେ ଯିବା ପରିବର୍ତ୍ତେ ତାଙ୍କ ଗାଡ଼ି ତଳେ ରାସ୍ତା ଦେଇ ଖାଇରେ ପଡ଼ିଯାଇଥିଲା।"
ମେରାଇନ୍ ସିକ୍ୟୁରିଟି ଟିମର ନୌକା ସାହାଯ୍ୟରେ ମହିଳା ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା। ଦୁର୍ଘଟଣାରେ ତାଙ୍କୁ କୌଣସି ଆଘାତ ଲାଗି ନଥିବା ବେଳେ ତାଙ୍କୁ ସୁରକ୍ଷିତ ଭାବେ ଘରକୁ ପଠାଯାଇଥିଲା। ପରେ ଏକ କ୍ରେନ୍ ସାହାଯ୍ୟରେ ଗାଡ଼ିଟିକୁ ଖାଇରୁ ବାହାର କରାଯାଇଥିଲା। ଘଟଣାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି, ଯେଉଁଥିରେ କ୍ରେନ୍ ସାହାଯ୍ୟରେ ଧଳା ରଙ୍ଗର ଅଡି କାରକୁ ବାହାର କରାଯାଉଥିବା ଦେଖାଯାଇଛି।
ସେହିଭଳି ଗତକାଲି ରାତିରେ ଉତ୍ତର ପ୍ରଦେଶର ଅମରାହୋ ଜିଲ୍ଲାରେ ଚାରିଜଣ ଯୁବକ ଗୁଗଲ୍ ମ୍ୟପ୍ସ ଦେଖି ଘରକୁ ଫେରୁଥିବା ସମୟରେ ଭୁଲରେ ଏକ ଗାଁରେ ପଶିଯାଇଥିଲେ। ତେବେ ଗ୍ରାମିଣ ଇଲାକାରେ ସେମାନେ ରାସ୍ତା ନେଇ ଲୋକହ୍କୁ ପ୍ରଶ୍ନ କରିଥିଲେ। ହେଲେ ଏତେ ରାତିରେ ଗାଁ ଇଲାକାରେ ଚାରିଜଣ ଯୁବକଙ୍କୁ ଦେଖି ସନ୍ଦେହ ପ୍ରକାଶ କରିଥିଲେ। ଏହାପରେ କାରକୁ ଅଟକାଇ ଚାରିଜଣ ଯୁବକଙ୍କୁ ନିର୍ଧୁମ ଛେଚିଥିଲେ। ପରେ ଅବଶ୍ୟ ସତକଥା ଜଣାପଡିଥିଲା। ହେଲେ ମାଡ ଯୋଗୁଁ ଦୁଇ ଯୁବକଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ସ୍ଥାନିୟ ଡାକ୍ତରଖାନାରେ ଭର୍ତ୍ତୀ କରାଯାଇଥିଲା।
ଏହା ପ୍ରଥମ ଘଟଣା ନୁହେଁ ଯେଉଁଠାରେ ଗୁଗଲ୍ ମ୍ୟାପ୍ସ୍ ନିର୍ଦ୍ଦେଶ ଯୋଗୁଁ ଏଭଳି ଦୁର୍ଘଟଣା ଘଟିଛି। ଗତ ବର୍ଷ ଉତ୍ତର ପ୍ରଦେଶର ବଦାୟୁଁ ଜିଲ୍ଲାରେ ସମାନ କାରଣ ପାଇଁ ତିନି ଜଣଙ୍କ ମୃତ୍ୟୁ ହୋଇଥିଲା। ଖବର ମୁତାବକ ସେମାନଙ୍କ ଗାଡ଼ି ଗୁଗଲ୍ ମ୍ୟାପ୍ସ୍ ନିର୍ଦ୍ଦେଶ ଅନୁସାରେ ଏକ ଭଙ୍ଗା ବ୍ରିଜ୍ ଉପରେ ଯାଇ ୫୦ ଫୁଟ ତଳେ ଥିବା ନଦୀରେ ଖସିପଡ଼ିଥିଲା। ଅନ୍ୟ ଏକ ଘଟଣାରେ, କେରଳରୁ ହାଇଦ୍ରାବାଦକୁ ଆସୁଥିବା ପର୍ଯ୍ୟଟକମାନେ ଗୁଗଲ୍ ମ୍ୟାପ୍ସ୍ ଅନୁସରଣ କରି ଏକ ନଦୀ ଭିତରେ ପଶି ଯାଇଥିଲେ।
