ନୂଆଦିଲ୍ଲୀ,୧୦/୦୮: ଖୁବ୍ଶୀଘ୍ର ଗୁଗୁଲ୍ ବନ୍ଦ କରିବାକୁ ଯାଉଛି ଆଉ ଏକ ସ୍ୱତନ୍ତ୍ର ସେବା। ସମସ୍ୟାର ସମ୍ମୁଖୀନ ହୋଇପାରନ୍ତି ଲକ୍ଷ ଲକ୍ଷ ଗେମିଂ ୟୁଜର । ଟେକ୍ କମ୍ପାନୀ କ୍ରୋମବୁକ୍ ବିଟା ପାଇଁ ଷ୍ଟିମ୍କୁ ସମର୍ଥନ କରିବା ବନ୍ଦ କରିବାକୁ ଯାଉଛି। ଜାନୁଆରୀ ୧, ୨୦୨୬ରୁ ୟୁଜରମାନେ ଏହାର ସମର୍ଥନ ପାଇବେ ନାହିଁ। ଏହି ସେବା ବନ୍ଦ ହେବା ସହିତ ୟୁଜରମାନେ ଷ୍ଟିମ୍ ମାଧ୍ୟମରେ କ୍ରୋମବୁକ୍ରେ ଗେମ୍ ଖେଳିପାରିବେ ନାହିଁ। ପୂର୍ବରୁ ଇନଷ୍ଟଲ ଥିବା ଗେମ୍ ଗୁଡ଼ିକ ମଧ୍ୟ ସ୍ୱୟଂଚାଳିତ ଭାବରେ ହଟିଯିବ। ତଥାପି କମ୍ପାନୀ ଏହି ସେବା ବନ୍ଦ କରିବାର କାରଣ ଦେଇନାହିଁ।
9to5Googleର ରିପୋର୍ଟ ଅନୁଯାୟୀ,ଗୁଗୁଲ ଏଥିପାଇଁ Chromebook ୟୁଜରଙ୍କୁ ଏକ ବାର୍ତ୍ତା ପଠାଇଛି। ବାର୍ତ୍ତାରେ, ୟୁଜରମାନଙ୍କୁ କୁହାଯାଇଛି ଯେ ସେମାନେ Steam ମାଧ୍ୟମରେ ଖେଳ ଖେଳିପାରିବେ ନାହିଁ। ଜାନୁଆରୀ ୧, ୨୦୨୬ରୁ, ସେମାନେ Steam ଲଞ୍ଚ କରିପାରିବେ ନାହିଁ କିମ୍ବା କୌଣସି ଖେଳ ଇନଷ୍ଟଲ କରିପାରିବେ ନାହିଁ। ତଥାପି, ଏହି ବିଟା ଆପ୍ ଡିସେମ୍ବର ୩୧, ୨୦୨୫ ପର୍ଯ୍ୟନ୍ତ ସଠିକ୍ ଭାବରେ କାମ କରିବ ଏବଂ ୟୁଜରମାନେ ଏହାକୁ ବ୍ୟବହାର କରିପାରିବେ।
ତେବେ ଷ୍ଟିମ୍ ଏକ ପିସି ଗେମିଂ ପ୍ଲାଟଫର୍ମ ଯାହା ମାଧ୍ୟମରେ ଆପଣ ପିସି ଅର୍ଥାତ୍ କମ୍ପ୍ୟୁଟରରେ ଖେଳାଯାଉଥିବା ଗେମ୍ ଡାଉନଲୋଡ୍ କରିପାରିବେ। ଏହା ମାଧ୍ୟମରେ ଆପଣ ଗେମ୍ ଭଡା ନେଇପାରିବେ ଏବଂ ଏହାକୁ କିଣି ଡାଉନଲୋଡ୍ ମଧ୍ୟ କରିପାରିବେ। ଏଥିପାଇଁ ଆପଣଙ୍କୁ ଆପଣଙ୍କ ପିସିରେ ଷ୍ଟିମ୍ ଆପ୍ ଡାଉନଲୋଡ୍ କରିବାକୁ ପଡିବ। ୨୦୨୨ରେ, ଗୁଗୁଲ୍ ଷ୍ଟିମ୍ ସହିତ ମିଶି କ୍ରୋମବୁକ୍ ୟୁଜରଙ୍କ ପାଇଁ ଏହାର ବିଟା ସଂସ୍କରଣ ଆରମ୍ଭ କରିଥିଲା, ଯାହା ୩୧ ଡିସେମ୍ବର ୨୦୨୫ ପର୍ଯ୍ୟନ୍ତ କାମ କରିବ। ଏହା ପରେ, କ୍ରୋମବୁକ୍ ୟୁଜରମାନେ ଷ୍ଟିମ୍ ସମର୍ଥନ ପାଇବେ ନାହିଁ।ଗୁଗୁଲ୍ କ୍ରୋମ୍ବୁକ୍ରେ,ୟୁଜରମାନେ ଷ୍ଟିମ୍ ମାଧ୍ୟମରେ ୯୯ଟି ଭିନ୍ନ ଭିନ୍ନ ଗେମିଂ ଟାଇଟଲ୍ ଖେଳିପାରୁଥିଲେ। ତଥାପି, ୟୁଜରମାନେ ଜାନୁଆରୀରୁ ଆଣ୍ଡ୍ରଏଡ୍ ପ୍ଲାଟଫର୍ମରେ ଏହି ଖେଳଗୁଡ଼ିକ ଖେଳିପାରିବେ। ୟୁଜରମାନଙ୍କୁ ଷ୍ଟିମ୍ ବଦଳରେ ଗୁଗୁଲ୍ ପ୍ଲେ ଷ୍ଟୋରରୁ ଖେଳକୁ ଡାଉନଲୋଡ୍ କରିବାକୁ ପଡିବ।
