ନୂଆଦିଲ୍ଲୀ, ୨୨/୦୪ : ଭାରତରୁ ଶେଷ ହେଲା ଗୁଗୁଲର ଏକଚାଟିଆ ନୀତି। ଗୁଗୁଲକୁ ୨୦ କୋଟିର ଜରିମାନା। ଆଗାମୀ ଦିନରେ, ପ୍ଲେ ଷ୍ଟୋର ଏବଂ ପ୍ଲେ ସର୍ଭିସେସ୍ ପାଇଁ ନେବାକୁ ପଡିବ ପୃଥକ ପୃଥକ ଲାଇସେନ୍ସ । ଏବେ ଟିଭି ନିର୍ମାତାମାନଙ୍କୁ ଗୁଗୁଲ୍ ଦ୍ୱାରା ସେଟ୍ କରାଯାଇଥିବା ଡିଫଲ୍ଟ ଆପ୍ସକୁ ପ୍ରି-ଇନଷ୍ଟଲ୍ କରିବାକୁ ବାଧ୍ୟ କରାଯିବ ନାହିଁ। ଏଭଳି ନିଷ୍ପତ୍ତି ନେଇଛି ଭାରତୀୟ ପ୍ରତିଯୋଗିତା ଆୟୋଗ (CCI)। 

ଗୁଗୁଲ ଏବେ ସାରା ଦୁନିଆରେ ଆଣ୍ଟିଟ୍ରଷ୍ଟ ମାମଲାର ସାମ୍ନା କରୁଛି। ଭାରତରେ ମଧ୍ୟ ସମାନ ମାମଲା ରୁଜୁ ହୋଇଥିଲା। ଗୁଗୁଲ "ତାର ପ୍ରଭାବଶାଳୀ ସ୍ଥିତିର ଅପବ୍ୟବହାର କରିଛି" ଏବଂ ପ୍ରତିଯୋଗୀମାନଙ୍କୁ ବାହାର କରିବା ପାଇଁ ନିୟମର ଅପବ୍ୟବହାର କରୁଥିବା ଅଭିଯୋଗ ହୋଇଥିଲା। ଏନେଇ ଏବେ ଭାରତୀୟ ପ୍ରତିଯୋଗିତା ଆୟୋଗ କହିଛନ୍ତି ଯେ, ଭାରତରେ ଗୁଗୁଲର ଅପରେଟିଂ ସିଷ୍ଟମ୍ (OS), ଗୁଗୁଲ୍ ପ୍ଲେ ଷ୍ଟୋର ଏବଂ ଅନ୍ୟାନ୍ୟ ପୂର୍ବରୁ ଡିଫଲ୍ଟ ଆପ୍ସ ଡାଉନଲୋଡ କରିବା ପାଇଁ ଆଣ୍ଡ୍ରଏଡ୍ ଟିଭି ନିର୍ମାତା ବାଧ୍ୟକ ହେବେ ନାହିଁ। 

କେବଳ ସେତିକି ନୁହେଁ, ଗୁଗୁଲକୁ ଭାରତର ନୂଆ ନିୟମ ମାନିବାକୁ ପଡ଼ିବ। ଏଥିପାଇଁ ଗୁଗୁଲ ଏକ ସେଟଲମେଣ୍ଟ ଆପ୍ଲିକେସନ୍ ଦାଖଲ କରିଛି। ଏହି ଚୁକ୍ତିକୁ ନ୍ୟୁ ଇଣ୍ଡିଆ ଏଗ୍ରିମେଣ୍ଟ କୁହାଯାଉଛି। ଏହି ଚୁକ୍ତି ଆନୁସାରେ ଗୁଗୁଲ୍ ଏବେ ଭାରତରେ ଆଣ୍ଡ୍ରଏଡ୍ ଆଧାରିତ ସ୍ମାର୍ଟ ଟିଭି ପାଇଁ ଏହାର ପ୍ଲେ ଷ୍ଟୋର ଏବଂ ପ୍ଲେ ସର୍ଭିସ୍ ପାଇଁ ପୃଥକ ଲାଇସେନ୍ସ ପ୍ରଦାନ କରିବ। କେବଳ ଭାରତରେ ନୁହେଁ, ଆମେରିକାରେ ମଧ୍ୟ ଗୁଗୁଲ୍ ଉପରେ ମାମଲା ଚାଲିଛି। ଆମେରିକାର ଏକ କୋର୍ଟ ସମ୍ପ୍ରତି ରାୟ ଦେଇଛନ୍ତି ଯେ, ଗୁଗୁଲ୍ ଡିଜିଟାଲ୍ ବିଜ୍ଞାପନ କ୍ଷେତ୍ରରେ ବେଆଇନ ଭାବରେ ଏହାର ଏକାଧିକାର ବଜାୟ ରଖିଛି।