ଭୁବନେଶ୍ୱର,୧୩/୧୧ : ରାଜ୍ୟ ସରକାର ୨୦୨୫ କ୍ୟାଲେଣ୍ଡର ବର୍ଷ ପାଇଁ ସରକାରୀ ଛୁଟି ତାଲିକା ଜାରି କରିଛନ୍ତି । ରାଜ୍ୟ ସରକାରୀ କର୍ମଚାରୀମାନେ ସବୁ ରବିବାର, ଦ୍ୱିତୀୟ ଶନିବାର ଓ ଚତୁର୍ଥ ଶନିବାରକୁ ଛାଡ଼ି ବର୍ଷକରେ ମୋଟ ୨୭ ଦିନ ସରକାରୀ ଛୁଟି ପାଇବେ । ତେବେ ୮ଟି ସରକାରୀ ଛୁଟି ଦିବସ ରବିବାର/ଦ୍ୱିତୀୟ ଶନିବାର ପଡୁଥିବାରୁ ସେମାନେ ଛୁଟି ହରାଇବେ ।
ଚଳିତ ବର୍ଷ ଦୁଇଦିନିଆ ରଜ ଛୁଟି ମାଡ଼ ଖାଇଯିବ। ତା ସହିତ ରାମନବମୀ, ସରସ୍ୱତୀ ପୂଜା ଛୁଟି ବି ଧୋଇଯିବ । ରାଜ୍ୟ ସରକାରୀ କର୍ମଚାରୀମାନେ ସାଧାରଣତନ୍ତ୍ର ଦିବସ, ବସନ୍ତ ପଞ୍ଚମୀ, ଶ୍ରୀରାମନବମୀ, ପହିଲି ରଜ, ରଜ ସଂକ୍ରାନ୍ତି, ମହରମ୍ ଝୁଲଣ ପୂର୍ଣ୍ଣିମା ଓ ମହାଳୟା ଭଳି ତାଲିକାଭୁକ୍ତ ସରକାରୀ ଛୁଟି ହରାଇବେ । ଏହି ସମସ୍ତ ୮ଟି ଛୁଟି ରବିବାର/ଦ୍ୱିତୀୟ ଶନିବାରକୁ ପଡୁଛି । ସେମାନେ ୨୬ଟି ଛୁଟିକୁ ଛାଡ଼ି ଗୋଟିଏ ଅତିରିକ୍ତ ଛୁଟି (ଅପ୍ସନାଲ ହଲି ଡେ) ନେଇପାରିବେ ।
ଆସନ୍ତା ବର୍ଷ ପାଇଁ ମୋଟ ୮ଟି ଅତିରିକ୍ତ ସରକାରୀ ଛୁଟି ଦିବସର ତାଲିକା ଜାରି ହୋଇଛି । ସରକାରୀ କର୍ମଚାରୀଙ୍କ ସମେତ ରାଜ୍ୟରେ ଥିବା ସମସ୍ତ ବ୍ୟାଙ୍କ ଓ ଅଣବ୍ୟାଙ୍କିଙ୍ଗ କର୍ମଚାରୀଙ୍କ ପାଇଁ ମଧ୍ୟ ସରକାରୀ ଛୁଟି ଘୋଷଣା ହୋଇଛି । ସେମାନେ ୨୦ଟି ଛୁଟି ପାଇବେ । ୫ଟି ଛୁଟିଦିବସ ରବିବାର ଓ ଦ୍ୱିତୀୟ ଶନିବାର ପଡୁଥିବାରୁ ଏହି ଛୁଟି ସେମାନେ ହରାଇବେ । ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଆଜି ଏହି ସରକାରୀ ଛୁଟିଦିବସର ତାଲିକା ଜାରି ହୋଇଛି ।
