ନୂଆଦିଲ୍ଲୀ: ଅହମ୍ମଦାବାଦ ବିମାନ ଦୁର୍ଘଟଣାରେ ପରେ ବିମାନରେ ଯାନ୍ତ୍ରିକ ତ୍ରୁଟି ନେଇ ଅନେକ ଖବର ସାମ୍ନାକୁ ଆସିଛି । ଫଳରେ ବିମାନ ଉଡ଼ାଣ ମଧ୍ୟ ବାତିଲ କରିବାକୁ ପଡ଼ୁଛି ।  ଚଳିତ ବର୍ଷ ଏପର୍ଯ୍ୟନ୍ତ ୧୮୩ଟି ଯାନ୍ତ୍ରିକ ତ୍ରୁଟି ଘଟଣା ରେକର୍ଡ କରାଯାଇ ସାରିଛି । ସେଥିମଧ୍ୟରୁ ୮୫ଟି ଘଟଣା ସହ ସବୁଠାରୁ ଆଗରେ ରହିଛି ଏୟାର ଇଣ୍ଡିଆ । ଲୋକସଭାରେ ଗୁରୁବାର ବେସାମରିକ ବିମାନ ଚଳାଚଳ ରାଷ୍ଟ୍ରମନ୍ତ୍ରୀ ମୁରଲୀଧର ମୋହୋଲ କହିଛନ୍ତି ଯେ, ଇଣ୍ଡିଗୋ ଏବଂ ଆକାସା ଏୟାରଲାଇନ୍ସ ଯଥାକ୍ରମେ ୬୨ ଏବଂ ୨୮ଟି ତ୍ରୁଟି ରିପୋର୍ଟ କରିଛନ୍ତି । ସ୍ପାଇସଜେଟ୍ ୮ଟି ତ୍ରୁଟି ରିପୋର୍ଟ କରିଛି । ଏପରି ତ୍ରୁଟିର କଠୋର ତଦନ୍ତ ଏବଂ ତୁରନ୍ତ ସଂଶୋଧନମୂଳକ ପଦକ୍ଷେପ ଆବଶ୍ୟକ । ସେପଟେ ଏୟାର ଇଣ୍ଡିଆ ଏବଂ ଏୟାର ଇଣ୍ଡିଆ ଏକ୍ସପ୍ରେସ ୮୫ ଟି ଯାନ୍ତ୍ରିକ ତ୍ରୁଟି ରିପୋର୍ଟ କରିଛି । 

ଏହି ସମସ୍ତ ସଂଖ୍ୟା ଚଳିତ ବର୍ଷ ୧ ଜାନୁଆରୀ ୨୦୨୫ ରୁ ୨୧ ଜୁଲାଇ ୨୦୨୫ ପର୍ଯ୍ୟନ୍ତ ରେକର୍ଡ ହୋଇଛି । ଅନ୍ୟପକ୍ଷରେ, ଯଦି ଆମେ ଗତ କିଛି ବର୍ଷର ତଥ୍ୟ ଉପରେ ନଜର ପକାଇବା, ତେବେ ୨୦୨୪ ରେ ରିପୋର୍ଟ ହୋଇଥିବା ଯାନ୍ତ୍ରିକ ତ୍ରୁଟି ସଂଖ୍ୟା ୪୨୧ ଥିଲା, ଯାହା ୨୦୨୩ ରେ ରିପୋର୍ଟ ହୋଇଥିବା ୪୪୮ ତୁଳନାରେ କମ୍ । ୨୦୨୨ ରେ ରିପୋର୍ଟ ହୋଇଥିବା ଯାନ୍ତ୍ରିକ ତ୍ରୁଟି ସଂଖ୍ୟା ୫୨୮ ଥିଲା। ଏହି ତିନି ବର୍ଷର ତଥ୍ୟରେ ଆଲାଏନ୍ସ ଏୟାର ଏବଂ ଭିସ୍ତାରାର ବିମାନ ତ୍ରୁଟି ସଂଖ୍ୟା ମଧ୍ୟ ଅନ୍ତର୍ଭୁ କ୍ତ । ୨୦୨୧ରେ ବିମାନରେ ଯାନ୍ତ୍ରିକ ତ୍ରୁଟି ରିପୋର୍ଟ ସଂଖ୍ୟା ୫୧୪ ଥିଲା। ସେତେବେଳେ ଆକାସା ଏୟାର କାର୍ଯ୍ୟ ଆରମ୍ଭ କରିନଥିଲା । 

ବିମାନ କମ୍ପାନୀ ଦ୍ୱାରା ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (DGCA)କୁ ରିପୋର୍ଟ କରାଯାଇଥିବା ସମସ୍ତ ତ୍ରୁଟିର ତଦନ୍ତ କରାଯିବା ଆବଶ୍ୟକ । ଯାହା ଦ୍ୱାରା ଉପଯୁକ୍ତ ସଂଶୋଧନମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ । ଏକ ଲିଖିତ ଉତ୍ତରରେ, ବେସାମରିକ ବିମାନ ଚଳାଚଳ ରାଷ୍ଟ୍ରମନ୍ତ୍ରୀ ମୁରଲୀଧର ମୋହୋଲ କହିଛନ୍ତି, ‘ସମସ୍ତ ତ୍ରୁଟି, ବିଶେଷକରି ପ୍ରମୁଖ ତ୍ରୁଟିଗୁଡ଼ିକର ଶୀଘ୍ର ତଦନ୍ତ କରାଯିବା ଉଚିତ । ଯାହା ଦ୍ଵାରା ଯଥାଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ। ଭବିଷ୍ୟତରେ ଏପରି ଘଟଣାଗୁଡ଼ିକୁ ରୋକିବା ଏବଂ ସମାଧାନକୁ ତ୍ୱରାନ୍ୱିତ କରିବା ପାଇଁ DGCA ସହିତ ମିଳିତ ପ୍ରୟାସ କରାଯାଉଛି।’