ନୂଆଦିଲ୍ଲୀ, ୨୧/୦୩: ଉତ୍ତର ପ୍ରଦେଶ କାସଗଞ୍ଜର ଜଣେ ୧୧ ବର୍ଷୀୟା ନାବାଳିକା ସହ ଜଡ଼ିତ ମାମଲାରେ ଆହ୍ଲାବାଦ ହାଇକୋର୍ଟ ଦେଇଥିବା ଟିପ୍ପଣୀକୁ ନେଇ ପ୍ରଶ୍ନ ଉଠିଛି । ବିଜେପି ରାଜ୍ୟସଭା ସାଂସଦ ତଥା ଜାତୀୟ ମହିଳା କମିଶନର ପୂର୍ବତନ ଅଧ୍ୟକ୍ଷା ରେଖା ଶର୍ମା କହିଛନ୍ତି, ଯଦି ବିଚାରପତି ହିଁ ସମ୍ବେଦନଶୀଳ ନ ହେବେ, ତେବେ ମହିଳା ଓ ଝିଅମାନେ କ’ଣ କରିବେ? ଏହି ମାମଲାରେ ମହିଳା କମିଶନ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହେବା ଉଚିତ ।
ଆହ୍ଲାବାଦ ହାଇକୋର୍ଟ ନିଜ ରାୟରେ କହିଥିଲେ କି କୌଣସି ନାବାଳିକାର ଛାତିକୁ ଧରିବା, ତା’ର ପାଇଜାମା ଡୋର ଖୋଲିବା କିମ୍ବା ତାକୁ ଘୋଷାଡ଼ି ନାଳ କଡ଼କୁ ନେଇଯିବା ପାଇଁ ଉଦ୍ୟମ କରିବା ଦୁଷ୍କର୍ମ ଅଥବା ଦୁଷ୍କର୍ମ ଉଦ୍ୟମ ମାମଲା ହୋଇପାରିବ ନାହିଁ । ଆହ୍ଲାବାଦ ହାଇକୋର୍ଟ ବିଚାରପତି ରାମ ମନୋହର ନାରାୟଣ ମିଶ୍ର ମାମଲାଟିକୁ ଅପରାଧର ପ୍ରସ୍ତୁତି ଓ ବାସ୍ତବିକ ଉଦ୍ୟମ ମଧ୍ୟରେ ପ୍ରଭେଦ ଦର୍ଶାଇଛନ୍ତି । ତତ୍ସହିତ ତଳ କୋର୍ଟଙ୍କ ଦ୍ୱାରା ଧାର୍ଯ୍ୟ ଗମ୍ଭୀର ଅଭିଯୋଗକୁ ସଂଶୋଧନ ପାଇଁ ନିର୍ଦ୍ଦେଶ ଦେଇଛନ୍ତି ।
ସେହିଭଳି ଅଦାଲତ ୩ ଜଣ ଅଭିଯୁକ୍ତଙ୍କ ବିରୋଧରେ ରୁଜୁ ହୋଇଥିବା ଅପରାଧ ସଂଶୋଧନ ପିଟିସନକୁ ସ୍ୱୀକାର କରିଛନ୍ତି । ହାଇକୋର୍ଟ ଅଭିଯୁକ୍ତ ଆକାଶ ଓ ପୱନ ବିରୋଧରେ ଆଇପିସି ଧାରା ୩୭୬ (ଦୁଷ୍କର୍ମ) ଓ ପୋକ୍ସୋ ଆଇନ ଧାରା ୧୮ରେ ହୋଇଥିବା ଅଭିଯୋଗକୁ କମାଇ ଦେଇଛନ୍ତି । ଏବେ ସେମାନଙ୍କ ବିରୋଧରେ ଧାରା ୩୫୪ (ବି) (ଉଲଗ୍ନ ଉଦ୍ଦେଶ୍ୟରେ ଆକ୍ରମଣ କିମ୍ବା ଅପରାଧିକ ବଳର ପ୍ରୟୋଗ) ଏବଂ ପୋକ୍ସୋ ଧାରା ୯/୧୦ (ଗମ୍ଭୀର ଯୌନ ଆକ୍ରମଣ) ଅନୁସାରେ ମକଦ୍ଦମା ଚାଲିବ । ତଳ କୋର୍ଟକୁ ସାନି ସମନ ଜାରି କରିବାକୁ ନିର୍ଦ୍ଦେଶ ଦିଆଯାଇଛି ।
ଉଲ୍ଲେଖଯୋଗ୍ୟ, କାସଗଞ୍ଜର ଜଣେ ମହିଳା ୨୦୨୨ ଜାନୁଆରୀ ୧୨ରେ କୋର୍ଟରେ ଅଭିଯୋଗ କରିଥିଲେ ଯେ ୨୦୨୧ ନଭେମ୍ବର ୧୦ରେ ସେ ନିଜ ୧୧ ବର୍ଷୀୟା ଝିଅ ସହ ନଣନ୍ଦଙ୍କ ଘରକୁ ଯାଉଥିଲେ । ସେହି ଦିନ ସନ୍ଧ୍ୟାରେ ଘରକୁ ଫେରୁଥିଲା ବେଳେ ରାସ୍ତାରେ ତାଙ୍କ ଗ୍ରାମର ଆକାଶ, ପୱନ ଓ ଅଶୋକ ଦେଖା ହୋଇଥିଲେ । ପୱନ ତା’ର ବାଇକ୍ରେ ଝିଅକୁ ନେଇ ଘରେ ଛାଡ଼ିଦେବ ବୋଲି କହିଥିଲା ।
ମହିଳା ଜଣକ ତା’ ଉପରେ ଭରସା କରି ଝିଅକୁ ଛାଡ଼ିଥିଲେ । କିନ୍ତୁ ରାସ୍ତାରେ ପୱନ ଓ ଆକାଶ ଝିଅଟିର ଛାତିକୁ ଧରିବା ସହ ତାକୁ ନାଳ କଡ଼କୁ ନେଇ ତା’ର ପାଇଜାମା ଡୋର ଟାଣି ଛିଡ଼ାଇ ଦେଇଥିଲେ । ଝିଅଟିର ଚିତ୍କାର ଶୁଣି ଲୋକେ ପହଞ୍ଚିଯିବାରୁ ଅଭିଯୁକ୍ତମାନେ ଧମକ ଦେଇ ଖସି ପଳାଇଥିଲେ । ମହିଳା ଜଣକ ଅଭିଯୋଗ ପାଇଁ ବାରମ୍ବାର ଥାନାକୁ ଯାଇଥିଲେ । କିନ୍ତୁ ପୁଲିସ ଅଭିଯୋଗ ନ ରଖିବାରୁ ସେ କୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଅଭିଯୁକ୍ତମାନେ ତଳ କୋର୍ଟଙ୍କ ଆଦେଶ ବିରୋଧରେ ଆହ୍ଲାବାଦ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।
