ସାହାଜପାଲ ,୧୯/୦୫: ଯୋଗ୍ୟ ପ୍ରମାଣପତ୍ର ଥାଇ ବି ମିଳୁ ନଥିଲା ଭତ୍ତା ଟଙ୍କା । ୫ ମାସ ହେଲା ଅଫିସରୁ ଅଫିସ ବୁଲି ଅଭିଯୋଗ କରିଥିଲେ ମଧ୍ୟ ଦିବ୍ୟାଙ୍ଗ ଯୁବକ ସୁମନ୍ତ ବିଶି କୌଣସି ସୁଫଳ ମିଳିନଥିଲା । ମାତ୍ର ଅସହାୟକୁ ସହାୟତାର ହାତ ବଢାଇଲା ପ୍ରମେୟ । ଖବର ପ୍ରକାଶ ପରେ ଦିବ୍ୟାଙ୍ଗଙ୍କ ଘରେ ପହଞ୍ଚିଲେ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ।
ସୂଚନା ମୁତାବକ, ବୌଦ୍ଧ ଜିଲ୍ଲା ତାଳଶରଡ଼ା ଗ୍ରାମପଞ୍ଚାୟତ ଅନ୍ତର୍ଗତ ସଂଗ୍ରାମପୁର ଗାଁର ୨୦ ବର୍ଷୀୟ ଦିବ୍ୟାଙ୍ଗ ଯୁବକ ସୁମନ୍ତ ବିଶି । ଭୀନ୍ନକ୍ଷମ ଭତ୍ତା ପାଇଁ ତାଳଶରଡ଼ା ପଞ୍ଚାୟତ ଓ ବ୍ଲକ ଅଫିସ୍ ଯାଇ ଆବଶ୍ୟକ କାଗଜ ପତ୍ର ଦାଖଲ କରିଥିଲେ । ହେଲେ ପ୍ରଶାସନିକ ଅଧିକାରୀ ପଦକ୍ଷେପ ଗ୍ରହଣ କରିନଥିଲେ । ଫଳରେ ଯୋଗ୍ୟ ହୋଇ ବି ଦିବ୍ୟାଙ୍ଗ ଭତ୍ତାରୁ ବଞ୍ଚିତ ହୋଇଥିଲେ ସୁମନ୍ତ ବିଶି । ଏ ବାବଦରେ ପ୍ରମେୟ ପୋର୍ଟାଲରେ ଖବର ପ୍ରକାଶିତ ହୋଇଥିଲା । ଯାହାର ମହାପ୍ରଭାବ ଦେଖିବାକୁ ମିଳିଛି । ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ସୌଦାମିନୀ ନାଏକ ଦିବ୍ୟାଙ୍ଗଙ୍କ ଘରେ ପହଞ୍ଚି କାଗଜପତ୍ର ନେବା ସହ ଖୁବ୍ ଶୀଘ୍ର ଭତ୍ତା ଟଙ୍କା ମିଳିବ ବୋଲି ପ୍ରତିଶ୍ରୁତି ଦେଇଛନ୍ତି ।
