ବେଙ୍ଗାଲୁରୁ,୧୬/୧୨: ମହିଳା ପ୍ରିମିୟର ଲିଗ୍ (ଡବ୍ଲ୍ୟୁପିଏଲ୍)ର ତୃତୀୟ ସଂସ୍କରଣ ପାଇଁ ରବିବାର ବେଙ୍ଗାଲୁରୁ ଠାରେ ନିଲାମ ଅନୁଷ୍ଠିତ ହୋଇଥିଲା । ଅନ୍କ୍ୟାପ୍ଡ ଖେଳାଳି ତଥା ମୁମ୍ବାଇର ପ୍ରତିଭାବାନ ଅଲରାଉଣ୍ଡର ସିମରନ ଶୈଖ୍ ସବୁଠୁ ଦାମୀ ସାବ୍ୟସ୍ତ ହୋଇଥିଲେ । ଗୁଜରାଟ ଜାଏଣ୍ଟ୍ସ ତାଙ୍କୁ ୧.୯୦କୋଟି ଟଙ୍କାରେ କିଣିଥିଲା ।
ସେହିପରି ତାମିଲନାଡ଼ୁର ୧୬ ବର୍ଷୀୟା ବ୍ୟାଟର ଜି. କମଳିନୀ ୧.୬୦କୋଟି ଏବଂ ଉତ୍ତରାଖଣ୍ଡ ସ୍ପିନର ପ୍ରେମା ରାୱତ ୧.୨୦କୋଟି ଟଙ୍କାରେ ବିକ୍ରି ହୋଇଥିଲେ । ବିଦେଶୀ ଖେଳାଳିଙ୍କ ମଧ୍ୟରେ ୱେଷ୍ଟଇଣ୍ଡିଜର ତାରକା ଅଲରାଉଣ୍ଡର ଡିଣ୍ଡ୍ରା ଡଟିନ୍ ସବୁଠୁ ଉଚ୍ଚା ଦାମରେ ବିକ୍ରି ହୋଇଥିଲେ । ଗୁଜରାଟ ତାଙ୍କୁ ୧.୭୦ କୋଟିରେ କିଣିଥିଲା । ମାତ୍ର ଭାରତୀୟ ସ୍ପିନର ସ୍ନେହ ରାଣା, ଇଂଲଣ୍ଡର ଲାଉରେନ ବେଲ, ହିଦର ନାଇଟ୍, ଦକ୍ଷିଣ ଆଫ୍ରିକାର ଲିଜେଲି ଲି’ଙ୍କୁ କିଣିବା ପାଇଁ କୌଣସି ଫ୍ରାଞ୍ଚାଇଜ ଆଗ୍ରହ ଦେଖାଇ ନଥିଲେ । ଯାହାକି କ୍ରିକେଟ୍ପ୍ରେମୀଙ୍କୁ ଚକିତ କରିଥିଲା । ନିଲାମରେ ୫ଟି ଯାକ ଫ୍ରାଞ୍ଚାଇଜ ଦଳ ମୋଟ ୧୯ଜଣ ଖେଳାଳି କ୍ରୟ କରିଥିଲେ । ସେଥିମଧ୍ୟରେ ୫ଜଣ ବିଦେଶୀ ଖେଳାଳି ରହିଥିଲେ । ନିଲାମରେ ମୋଟ ୧୨୦ଜଣ ଖେଳାଳି ସାମିଲ ହୋଇଥିଲେ ।
୨୨ବର୍ଷୀୟା ସିମ୍ରନଙ୍କୁ କିଣିବା ପାଇଁ ଦିଲ୍ଲୀ କ୍ୟାପିଟାଲ୍ସ ଓ ଗୁଜରାଟ ମଧ୍ୟରେ ଜୋରଦାର ଲଢ଼େଇ ହୋଇଥିଲା । ଶେଷରେ ଗୁଜରାଟ ୧.୬୦କୋଟି ଡାକିଥିଲା ଏବଂ ଦିଲ୍ଲୀ କ୍ୟାପିଟାଲ୍ସ ଓହରି ଯାଇଥିଲା । ଗତ ଡବ୍ଲ୍ୟୁପିଏଲ୍ରେ ସିମ୍ରନ ୟୁପି ୱାରିୟର୍ସ ଦଳ ସଦସ୍ୟ ରହିଥିଲେ। ମାତ୍ର ଏଥର ଦଳ ତାଙ୍କୁ ନିଲାମ ପାଇଁ ମୁକ୍ତ କରିଥିଲା । ନିଲାମରେ ତାଙ୍କ ମୂଳ ଦର ୧୦ଲକ୍ଷ ରହିଥିଲା । ଚଳିତ ବର୍ଷ ସିନିୟର ମହିଳା ଟି-ଟ୍ୱେଣ୍ଟି ଟ୍ରଫିରେ ସିମ୍ରନ ମୁମ୍ବାଇ ପକ୍ଷରୁ ୧୧ଟି ମ୍ୟାଚ୍ ଖେଳି ୧୭୬ରନ୍ ସଂଗ୍ରହ କରିଥିଲେ । ଅନ୍କ୍ୟାପ୍ଡ ଖେଳାଳି କମଳିନୀଙ୍କ ମୂଳ ଦର ୧୦ଲକ୍ଷ ରହିଥିଲା । ତାଙ୍କୁ ମୁମ୍ବାଇ ଇଣ୍ଡିଆନ୍ସ ୧.୬୦ କୋଟି ଟଙ୍କାରେ କିଣି ଦଳରେ ସାମିଲ କରିଥିଲା । କମଳିନୀ ଚଳିତ ୧୯ବର୍ଷରୁ କମ୍ ମହିଳା ଏସିଆ କପ୍ ଟି-ଟ୍ୱେଣ୍ଟିରେ ଭାରତୀୟ ଦଳ ସଦସ୍ୟା ରହିଛନ୍ତି । ଅନ୍ୟ ଯୁବା ଖେଳାଳି ପ୍ରେମାଙ୍କୁ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ୧.୨୦କୋଟିରେ କ୍ରୟ କରିଥିଲା ।
ଦିଲ୍ଲୀ କ୍ୟାପିଟାଲ୍ସ: ଏନ୍ ଚରଣି (୫୫ଲକ୍ଷ), ନନ୍ଦିନୀ କାଶ୍ୟପ୍ (୧୦ଲକ୍ଷ), ସାରା ବ୍ରାଏସ୍ (ସ୍କଟଲାଣ୍ଡ, ୧୦ଲକ୍ଷ), ନିକି ପ୍ରସାଦ (୧୦ଲକ୍ଷ)।
ଗୁଜରାଟ ଜାଏଣ୍ଟ୍ସ: ସିମ୍ରନ ଶୈଖ (୧.୯୦କୋଟି), ଡିଣ୍ଟ୍ରା ଡଟିନ୍ (ୱେଷ୍ଟଇଣ୍ଡିଜ୍, ୧.୭୦କୋଟି), ଡାନିଏଲ ଗିବସନ (ଇଂଲଣ୍ଡ୍, ୩୦ଲକ୍ଷ), ପ୍ରକାଶିକା ନାଏକ (୧୦ଲକ୍ଷ) ।
ମୁମ୍ବାଇ ଇଣ୍ଡିଆନ୍ସ: ଜି. କମଳିନୀ (୧.୬୦କୋଟି), ନାଦିନ ଡି କ୍ଲର୍କ (ଦକ୍ଷିଣ ଆଫ୍ରିକା, ୩୦ଲକ୍ଷ), ଅକ୍ସିତା ମାହେଶ୍ୱରୀ (୨୦ଲକ୍ଷ), ଏସ୍ ଗୁପ୍ତା (୧୦ଲକ୍ଷ) ।
ରୟାଲ ଚ୍ୟାଲେଞ୍ଜର୍ସ: ପ୍ରେମା ରାୱତ (୧.୨୦କୋଟି), ଯୋଶିତା ଜେଭି (୧୦ଲକ୍ଷ), ରାଘବୀ ବିଷ୍ଟ (୧୦ଲକ୍ଷ), ଜଗ୍ରାଭି ପାୱାର (୧୦ଲକ୍ଷ) ।
ୟୁପି ୱାରିୟର୍ସ: ଆଲାନା କିଙ୍ଗ୍ (ଅଷ୍ଟ୍ରେଲିଆ, ୩୦ଲକ୍ଷ), ଆରୁଷି ଗୋଏଲ (୧୦ଲକ୍ଷ), କ୍ରାନ୍ତି ଗୌଡ଼(୧୦ଲକ୍ଷ) ।
