ପୁରୀ,୧୫/୦୫: ରଥଯାତ୍ରା ପୂର୍ବରୁ ନୂଆ ରୂପରେ ଦିଶିବ ମହାପ୍ରଭୁଙ୍କ ଜନ୍ମବେଦି ଶ୍ରୀଗୁଣ୍ଡିଚା ମନ୍ଦିର ସମ୍ମୁଖ । ଶ୍ରୀଗୁଣ୍ଡିଚା ମନ୍ଦିର ସମ୍ମୁଖ ଭାଗ ବା ଦକ୍ଷିଣ ପାଶ୍ୱର୍କୁ ସୌନ୍ଦର୍ଯ୍ୟକରଣ କରାଯାଉଛି । ଏହି କାର୍ଯ୍ୟକୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ ନିରୀକ୍ଷଣ କରିଛନ୍ତି । ଏହି କାର୍ଯ୍ୟକୁ ରଥଯାତ୍ରା ପୂର୍ବରୁ ସାରିବାକୁ ଲକ୍ଷ୍ୟ ରହିଥିବା ସେ ତାଙ୍କ ଏକ୍ସ ଆକାଉଣ୍ଟରେ ସୂଚନା ଦେଇଛନ୍ତି । ଜନ୍ମବେଦିର ସିଂହଦ୍ୱାର ଦୁଇପାଶ୍ୱର୍ରେ ଦୁଇଟି ସୂଚନାକେନ୍ଦ୍ର ତଥା ଡୋନେସନ ସେଲ୍ କରାଯାଉଛି । ଏହା ଉପର ପାଶ୍ୱର୍ ବଡ଼ଦେଉଳ ଉପରି ଭାଗ ଭଳି ପ୍ରତୀୟମାନ ହେବ ।
ସେହିପରି ଶ୍ରୀମନ୍ଦିର ସିଂହଦ୍ୱାର ସମ୍ମୁଖରେ ଲାଗିଥିବା ଏକ ବଡ଼ ଏଲ୍ଇଡି ଟିଭି ଭଳି ଶ୍ରୀଗୁଣ୍ଡିଚା ମନ୍ଦିର ସିଂହଦ୍ୱାର ବାହାରେ ମଧ୍ୟ ଗୋଟିଏ ବଡ଼ ଏଲ୍ଇଡି ଟିଭି ଲାଗିବ । ଏହି ଏଲ୍ଇଡି ଟିଭିରେ ମହାପ୍ରଭୁଙ୍କ ନୀତିକାନ୍ତି ପ୍ରଦର୍ଶିତ ହେବ । ସେହିପରି ଶ୍ରୀଗୁଣ୍ଡିଚା ମନ୍ଦିର ସମ୍ମୁଖ ଭାଗ ଚଟାଣ ଓ ପାଚେରିକୁ ଖଣ୍ଡେଲାଇଟ୍ ପକାଇ ଅଧିକ ସୌନ୍ଦର୍ଯ୍ୟକରଣ କରାଯାଉଛି । ପାଚେରିରେ ଆର୍ଟିଷ୍ଟିକାଲ ଭ୍ୟୁ’ ଦିଆଯାଉଛି । ଲ୍ୟାଣ୍ଡ ସ୍କେପିଂ ଦ୍ୱାରା ଶ୍ରୀଗୁଣ୍ଡିଚା ମନ୍ଦିର ସମ୍ମୁଖ ଭାଗକୁ ଆହୁରି ମନୋରମ କରାଯିବ । ମେଘନାଦ ପାଚେରି ଓ ସମ୍ମୁଖ ଭାଗକୁ ଉଜ୍ୱଳ ଆଲୁଅରେ ଆଲୋକୀକରଣ କରାଯିବ । ଯେପରି ଶ୍ରୀଗୁଣ୍ଡିଚା ମନ୍ଦିର ସମ୍ମୁଖ ସମସ୍ତଙ୍କ ଦୃଷ୍ଟି ଆକର୍ଷଣ କରିବ ଓ ଧାର୍ମିକ ବାତାବରଣକୁ ଅହୁରି ରୁଦ୍ଧିମନ୍ତ କରିବ ଏହାକୁ ବିଶେଷ ଫୋକସ୍ ଦିଆଯାଉଛି । ଶ୍ରୀମନ୍ଦିର ପ୍ରଶାସନର ପ୍ରତ୍ୟକ୍ଷ ନିରୀକ୍ଷଣରେ ଏହି କାର୍ଯ୍ୟ ହେଉଛି । ପ୍ରାୟ ୧ କୋଟି ୬୩ ଲକ୍ଷ ଟଙ୍କା ବ୍ୟୟରେ କାମ ହେଉଛି । ଚଳିତ ମାସ ଶେଷ ସୁଦ୍ଧା ସାରିବାକୁ ଲକ୍ଷ୍ୟ ରଖାଯାଇଛି । ଏନେଇ ଶ୍ରୀମନ୍ଦିର ଉନ୍ନୟନ ପ୍ରଶାସକ ଦେବବ୍ରତ ସାହୁ କହିଛନ୍ତି, ମୁଖ୍ୟ ପ୍ରଶାସକଙ୍କ ନିରୀକ୍ଷଣରେ କାମ ହେଉଛି । ଶ୍ରୀଗୁଣ୍ଡିଚା ମନ୍ଦିର ସମ୍ମୁଖ ବାହାର ପାଶ୍ୱର୍କୁ ଶ୍ରୀମନ୍ଦିର ପରିକ୍ରମା ମାର୍ଗ ଭଳି ଆକର୍ଷଣୀୟ ଓ ମନୋରମ କରାଯିବ । ଏହା ଶ୍ରଦ୍ଧାଳୁଙ୍କୁ ନୂଆ ଅନୁଭୂତି ଦେବ ।
