ବାରଙ୍ଗ ୧୦/୧୧: ରାଜଧାନୀ ଉପକଣ୍ଠରେ ଆତଙ୍କ ଖେଳାଇଲେ ଡକାୟତ। ବନ୍ଧୁକ ମୁନରେ ଲୁଟିନେଲେ ସୁନା ଚେନ। ପ୍ରତିବାଦ କରିବାରୁ ୨ ଜଣଙ୍କୁ ମାଡ଼ ମାରିବା ସହ ଭାଙ୍ଗିଲେ ଗାଡ଼ି। ଏଭଳି ଡକାୟତି ଘଟଣା ବାରଙ୍ଗ ଥାନା ଅନ୍ତର୍ଗତ ନରାଜ-ବିଦ୍ୟାଧରପୁର ପାହାଡରେ ଘଟିଛି। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିବା ଜଣାପଡିଛି।
ସୂଚନା ଅନୁଯାୟୀ, ଶନିବାର ରାତି ପ୍ରାୟ ୧୦ ସମୟରେ ନରାଜ - ବିଦ୍ୟାଧରପୁର ପାହାଡ ଦେଇ ସ୍କୁଟିରେ ଯାଉଥିଲେ ଯୁବକ ଯୁବତୀ। ୬ ଜଣ ଦୁର୍ବୃତ୍ତ ମଝିରାସ୍ତରେ ତାଙ୍କୁ ଅଟକାଇ ବନ୍ଧୁକ ଦେଖାଇ ଥିଲେ। ଏହା ପରେ ତାଙ୍କୁ ମାଡ଼ ମାରିବା ସହ ଟଙ୍କା ପଇସା ମାଗିଥିଲେ। କିଛି ନ ପାଇବାରୁ ଯୁବତୀଙ୍କ ବେକରେ ଥିବା ଚେନକୁ ଚିଡ଼େଇ ନେଇଥିଲେ। ଉଭୟ ତାଙ୍କୁ ପ୍ରତିବାଦ କରିବାରୁ ଦୁର୍ବୃତ୍ତମାନେ ଦୁହିଁଙ୍କୁ ମାଡ଼ ମାରିବା ସହ ଗାଡ଼ିକୁ ଭାଙ୍ଗି ଦେଇଥିଲେ। ଦୁର୍ବୃତ୍ତଙ୍କ ଭିତରୁ ଜଣେ ବନ୍ଧୁକ କାଢ଼ି ୨ ରାଉଣ୍ଡ ଫାଙ୍କା ଗୁଳି ଚଳାଇଥିଲେ। ରାସ୍ତାରେ ଯାଉଥିବା ଅନ୍ୟ ଗାଡ଼ି ଚାଳକ ତାଙ୍କୁ ଡରେଇବାରୁ ସେଠାରୁ ୬ ଜଣ ନରାଜ ଆଡେ ପଳେଇ ଯାଇଥିଲେ। ଘଟଣା ସ୍ଥଳରେ ବାରଙ୍ଗ ଥାନା ପୋଲିସ ପହଞ୍ଚି ତଦନ୍ତ କରିଛି।
