ଗାଜା ସିଟି,୦୪/୦୮: ଗାଜାରୁ ଆସିଛି ଏକ ହୃଦୟ ବିଦାରକ ଭିଡିଓ । ହମାସ୍ ଜାରି କରିଥିବା ଏହି ଭିଡିଓରେ ବେଶ୍ ଦୁର୍ବଳ ହୋଇଯାଇଥିବା ଜଣେ ଇସ୍ରାଏଲ ବନ୍ଧକ ନିଜ କବର ନିଜେ ଖୋଳୁଥିବା ଦେଖିବାକୁ ମିଳିଛି । ଭିଡିଓରେ ହମାସ୍ର କ୍ରୂରତା ଏବଂ ଗାଜାରେ ଇସ୍ରାଏଲ ବନ୍ଧକଙ୍କ ଉପରେ ଅମାନବୀୟ ଅତ୍ୟାଚାର ପୁଣି ଦୁନିଆ ସାମ୍ନାକୁ ଆସିଛି । ୪୮ ଘଣ୍ଟା ଭିତରେ ଇସ୍ରାଏଲ ବନ୍ଧକଙ୍କ ଦ୍ୱିତୀୟ ଭିଡିଓ ଜାରି କରିଛି ହମାସ୍ । ଏପରି ଭିଡିଓ ଇସ୍ରାଏଲ ବାସୀ ଏବଂ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁଙ୍କୁ ଚିନ୍ତାରେ ପକାଇଛି ।
ଏଥିରେ ଦେଖିବାକୁ ମିଳିଛି, ୨୦୨୩ ଅକ୍ଟୋବର ୭ରେ ହମାସ୍ ଦ୍ୱାରା ଅପହୃତ ହୋଇଥିବା ଇସ୍ରାଏଲ ନାଗରିକ ୨୪ ବର୍ଷୀୟ ଇଭ୍ୟାତର ଡେଭିଡ୍ ଏକ ସଂକୀର୍ଣ୍ଣ ସୁଡ଼ଙ୍ଗରେ ମାଟି ଖୋଳୁଛନ୍ତି । ଏଥିରେ ସେ ବେଶ୍ ଦୁର୍ବଳ ଏବଂ ନିର୍ଜୀବ ଦେଖାଯାଉଛନ୍ତି । ସେ ଏକ ହାଫ୍ପ୍ୟାଣ୍ଟ ପିନ୍ଧିଛନ୍ତି । କ୍ୟାମେରା ଆଡ଼କୁ ଦେଖି କହୁଛନ୍ତି, ‘ମୁଁ ନିଜ କବର ନିଜେ ଖୋଳୁଛି । ମୋ ଶରୀର ଦିନକୁ ଦିନ ଦୁର୍ବଳ ହୋଇଚାଲିଛି । ମୁଁ ମୃତ୍ୟୁ ଆଡ଼କୁ ବଢ଼ୁଛି । ଏହା ହିଁ ମୋ କବର, ଯେଉଁଠି ମୋତେ ପୋତାଯିବ ।’
ଡେଭିଡଙ୍କ ସ୍ୱାସ୍ଥ୍ୟ ଦେଖିଲେ ଜଣାପଡ଼ୁଛି ଯେ ସେ ଦୀର୍ଘ ଦିନ ହେଲା ଖାଦ୍ୟ ଖାଇନାହାନ୍ତି । ସେ ବେଶ୍ କ୍ଷୀଣ ସ୍ୱରରେ କଥା ହେଉଛନ୍ତି । ଏପରିକି ସେ ଠିକ୍ରେ ଚାଲି ମଧ୍ୟ ପାରୁନାହାନ୍ତି । ଡେଭିଡ୍ଙ୍କ ପରିବାର ଲୋକେ କହିଛନ୍ତି, ପୁଅକୁ ଜାଣିଶୁଣି ଭୋକିଲା ରଖାଯାଇଛି । ହମାସ୍ ଡେଭିଡ୍ଙ୍କ ଜରିଆରେ ନିଜ ପ୍ରଚାର କରିବାକୁ ଚାହୁଁଛି । ଏହା ଦୁନିଆର ସବୁଠୁ ଭୟାବହ କାର୍ଯ୍ୟ । ପ୍ରଧାନମନ୍ତ୍ରୀ ନେତ୍ୟନ୍ୟାହୁ ଡେଭିଡ୍ଙ୍କ ପରିବାର ସହ କଥା ହୋଇଛନ୍ତି । ସରକାର ସମସ୍ତ ବନ୍ଧକଙ୍କୁ ସୁରକ୍ଷିତ ଭାବେ ମୁକୁଳାଇବା ଆଣିବାକୁ ସବୁ ପ୍ରକାର ଚେଷ୍ଟା କରୁଛନ୍ତି ବୋଲି ନେତନ୍ୟାହୁ କହିଛନ୍ତି ।
ପ୍ରକାଶଥାଉ କି, ପୂର୍ବରୁ ହମାସ୍ ଆଉ ଏକ ଭିଡିଓ ଜାରି କରିଥିଲା । ଏଥିରେ ୨୧ ବର୍ଷୀୟ ରୋମ ବ୍ରାସଲାଭସ୍କିଙ୍କୁ ବେଶ୍ ଦୁର୍ବଳ ଏବଂ ରୋଗିଣା ଅବସ୍ଥାରେ ଦେଖିବାକୁ ମିଳିଥିଲା । ଅନ୍ୟପକ୍ଷରେ ଇସ୍ରାଏଲ ସେନା ହମାସ୍କୁ ଚେତାବନୀ ଦେଇଛି । ତୁରନ୍ତ ଇସ୍ରାଏଲ ବନ୍ଧକଙ୍କୁ ମୁକ୍ତ ନ କଲେ ଗାଜାରେ ଅବିରତ ଆକ୍ରମଣ ହେବ ବୋଲି ସେନା ପକ୍ଷରୁ ବୟାନ ଜାରି କରାଯାଇଛି ।
ଇସ୍ରାଏଲ ସେନା ଅନୁସାରେ, ହମାସ୍ ୨୫୧ ଜଣଙ୍କୁ ଅପହରଣ କରିଥିଲା । ବନ୍ଦୀ ଅଦଳବଦଳ ପରେ ଆଉ ୪୯ ଇସ୍ରାଏଲ ନାଗରିକ ହମାସ୍ କବଳରେ ଥିଲେ । ସେମାନଙ୍କ ମଧ୍ୟରୁ ୨୭ ଜଣଙ୍କ ମୃତ୍ୟୁ ହୋଇଛି ।
