ନୂଆଦିଲ୍ଲୀ,୨୪/୧୨: ଭାରତୀୟ ପୁରୁଷ ହକି ଦଳର ଅଧିନାୟକ ହର୍ମନପ୍ରୀତ ସିଂହ ଏବଂ ପାରା ଆଥଲେଟ୍ ପ୍ରବୀଣ କୁମାର ଦେଶର ସର୍ବୋଚ୍ଚ କ୍ରୀଡ଼ା ସମ୍ମାନ ‘ମେଜର ଧ୍ୟାନଚାନ୍ଦ ଖେଳ ରତ୍ନ’ ପୁରସ୍କାର ପାଇବାକୁ ମନୋନୀତ ହୋଇଛନ୍ତି । ମାତ୍ର ପ୍ୟାରିସ୍ ଅଲିମ୍ପିକ୍ସରେ ଡବଲ୍ ବ୍ରୋଞ୍ଜ ପଦକ ଜିତି ଇତିହାସ ରଚିଥିବା ତାରକା ସୁଟର ମନୁ ଭାକରଙ୍କ ନାମ ତାଲିକାରେ ସାମିଲ ନହେବା ସମସ୍ତଙ୍କୁ ଚକିତ କରିଛି। ଅନ୍ୟ ପଟରେ ଅର୍ଜୁନ ପୁରସ୍କାର ପାଇଁ ୩୦ଜଣଙ୍କ ନାମ ସୁପାରିସ୍ କରାଯାଇଛି ।
ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ୍ ରାମସୁବ୍ରମଣ୍ୟନଙ୍କ ଅଧ୍ୟକ୍ଷତାରେ ୧୨ଜଣିଆ ଚୟନ କମିଟି ‘ଖେଳରତ୍ନ’ ପୁରସ୍କାର ପାଇଁ ହର୍ମନପ୍ରୀତ ଓ ପ୍ରବୀଣଙ୍କ ନାମ ମନୋନୀତ କରିଥିଲେ । ଗତ ପ୍ୟାରିସ୍ ଅଲିମ୍ପିକ୍ସରେ ହର୍ମନପ୍ରୀତଙ୍କ ନେତୃତ୍ୱରେ ଭାରତୀୟ ଦଳ ବ୍ରୋଞ୍ଜ ପଦକ ହାସଲ କରିଥିଲା । ସେ ଦଳର ସର୍ବାଧିକ ଗୋଲ୍ ସ୍କୋରର ସାବ୍ୟସ୍ତ ହୋଇଥିଲେ । ସେହିପରି ପାରା ଆଥଲେଟ ପ୍ରବୀଣ ପୁରୁଷ ହାଇଜମ୍ପ ଟି-୬୪ ବର୍ଗରେ ଭାରତକୁ ସ୍ୱର୍ଣ୍ଣ ପଦକ ଭେଟି ଦେଇଥିଲେ । ସେ ୨.୦୮ମିଟର ଉଚ୍ଚ ଜମ୍ପ କରି ଏସୀୟ ରେକର୍ଡ଼ ସହ ସ୍ୱର୍ଣ୍ଣ ପଦକ ଜିତିଥିଲେ । ଏହା ତାଙ୍କର ଦ୍ୱିତୀୟ ଅଲିମ୍ପିକ୍ସ ପଦକ ରହିଥିଲା । ଗତ ଟୋକିଓ ଅଲିମ୍ପିକ୍ସରେ ସେ ରୌପ୍ୟ ଜିତିଥିଲେ ।
ପ୍ୟାରିସ୍ ଅଲିମ୍ପିକ୍ସରେ ୨ଟି ବ୍ରୋଞ୍ଜ ପଦକ ଜିତିଥିବା ମନୁ ‘ଖେଳରତ୍ନ’ ପୁରସ୍କାର ତାଲିକାରେ ସ୍ଥାନ ନପାଇବା କ୍ରୀଡ଼ାପ୍ରେମୀଙ୍କୁ ମର୍ମାହତ କରିଛି । ସେ ଏହି ପୁରସ୍କାର ପାଇଁ ଆବେଦନ କରିନଥିବା କ୍ରୀଡ଼ାମନ୍ତ୍ରଣାଳୟର ଜଣେ ଅଧିକାରୀ ସଫେଇ ଦେଇଛି । ମାତ୍ର ମନୁଙ୍କ ପରିବାର ଏହାକୁ ଖଣ୍ଡନ କରିଛନ୍ତି । ସେ ଏହି ପୁରସ୍କାର ଆବେଦନ କରିଥିଲେ ବୋଲି ସ୍ପଷ୍ଟ କରିଛନ୍ତି । ନିକଟରେ ମନୁ ସୋସିଆଲ୍ ମିଡିଆରେ ଲେଖିଥିଲେ, ମୁଁ ‘ଖେଳରତ୍ନ’ ପୁରସ୍କାର ପାଇବାକୁ ହକ୍ଦାର କି ନାହିଁ? ଏହାକୁ ନେଇ ସୋସିଆଲ୍ ମିଡିଆ ଅନୁଗାମୀମାନେ ତାଙ୍କୁ ସମାଲୋଚନା କରିଥିଲେ । ଫଳରେ ସେ ନିଜ ପୋଷ୍ଟକୁ ଡିଲିଟ୍ କରି ଦେଇଥିଲେ । ମନୁ ଗତ ପ୍ୟାରିସ୍ ଅଲିମ୍ପିକ୍ସରେ ବ୍ୟକ୍ତିଗତ ମହିଳା ଏୟାର ପିସ୍ତଲ (୧୦ମିଟର) ଏବଂ ମିକ୍ସଡ୍ ଟିମ୍ (ସରବଜୋତ ସିଂହଙ୍କୁ ସାଥୀ କରି)ରେ ବ୍ରୋଞ୍ଜ ପଦକ ଜିତିଥିଲେ ।
ଭାରତୀୟ ଜାତୀୟ ରାଇଫଲ ଆସୋସିଏସନ୍(ଏନ୍ଆରଏଆଇ) ମନୁଙ୍କ ନାମ ସୁପାରିସ କରିବା ପାଇଁ ପ୍ରୟାସ ଆରମ୍ଭ କରିଛି । ଆସୋସିଏସନ୍ର ସଭାପତି କଳିକେଶ ନାରାୟଣ ସିଂହଦେଓ ମନୁଙ୍କ ନାମ ସାମିଲ କରିବା ପାଇଁ କ୍ରୀଡ଼ା ମନ୍ତ୍ରାଳୟକୁ ପତ୍ର ଲେଖିଥିବା ଜଣାଇଛନ୍ତି । ସେ କହିଛନ୍ତି, ଆମେ କ୍ରୀଡ଼ା ମନ୍ତ୍ରାଳୟ ସହ ଯୋଗଯୋଗ କରିଛୁ । ତାଙ୍କ ନାମ ସାମିଲ କରିବା ପାଇଁ ଆମେ ଲିଖିତ ଭାବେ ଜଣାଇଛୁ ।
ଗତ ବର୍ଷ ଭାରତୀୟ ପେସ୍ ବୋଲର ମହମ୍ମଦ ସାମି ଅର୍ଜୁନ ପୁରସ୍କାର ପାଇଁ ଆବେଦନ କରିନଥିଲେ । ମାତ୍ର ବିସିସିଆଇର ହସ୍ତକ୍ଷେପ ପରେ ତାଙ୍କୁ ପୁରସ୍କାର ତାଲିକାରେ ସାମିଲ କରାଯାଇଥିଲା । ଜାତୀୟ କ୍ରୀଡ଼ା ଦିବସ ପୁରସ୍କାର କମିଟି ସୋ ମୋଟୋ କଗ୍ନିଜେନ୍ସ ନିୟମରେ ସାମିଙ୍କୁ ତାଲିକାଭୁକ୍ତ କରିଥିଲେ । ମନୁଙ୍କ କ୍ଷେତ୍ରରେ କମିଟି ଏହି ନିୟମ ଆପଣେଇବା ଆଶା କରାଯାଉଛି ।
