ପୋଖରାସାଲହେ,୦୬/୦୭: ଝାରସୁଗୁଡ଼ା ଜିଲ୍ଲା କୋଲାବିରା ବ୍ଲକ୍ ପୋଖରାସାଲହେ ଓ ଝିର୍ଲାପାଲି ପଞ୍ଚାୟତରେ ଶନିବାର ଅପରାହ୍ଣରୁ ରବିବାର ସକାଳ ଯାଏଁ ପ୍ରବଳ ବର୍ଷା । ଲଗାଣ ବର୍ଷା କାରଣରୁ ବହୁ କ୍ଷୟକ୍ଷତି ହୋଇଥିବା ଅଭିଯୋଗ ହୋଇଛି । ଶନିବାର ସନ୍ଧ୍ୟାରେ ବର୍ଷା ସହ ବଜ୍ରପାତ ଯୋଗୁଁ ମାଲିଡିହି ଗାଁର ଛୁନକୁ ସାହୁଙ୍କ ସ୍ତ୍ରୀ ବବି ସାହୁ ଆହତ ହୋଇଥିବା ଅଭିଯୋଗ ହୋଇଛି । ଏହାସହ ବଜ୍ରପାତ ଯୋଗୁଁ ଛୁନକୁଙ୍କ ସହ ଅନେକ ବ୍ୟକ୍ତିଙ୍କ ଟିଭି, ଫ୍ରିଜ, ବିଦ୍ୟୁତ୍ ସାମଗ୍ରୀ ସମ୍ପୂର୍ଣ୍ଣ ପୋଡି ଯାଇଥିବା ଅଭିଯୋଗ ହୋଇଛି ।
ଏହାସହ ମାଟି ଧସିବାରୁ ଘଣ୍ଟମାଲ ଗ୍ରାମର ଆଲୋକ ପଟେଲଙ୍କ କୂଅ ସମ୍ପୂର୍ଣ୍ଣ ପୋତି ହୋଇ ପଡିଛି । ପ୍ରବଳ ବର୍ଷା ଯୋଗୁଁ ଛୋଟ ଛୋଟ ନାଳମାନଙ୍କର ପାଣି ବ୍ରିଜ୍ ଓ ରାସ୍ତା ଉପରେ ବହୁଛି । ଘଣ୍ଟମାଲ ନାଳ ବ୍ରିଜ୍ ଉପରେ ପ୍ରାୟ ୩ ଫୁଟ ପାଣି ବହୁଥିବାରୁ ଝିର୍ଲାପାଲି ଓ ଘଣ୍ଟମାଲ ମଧ୍ୟରେ ଯାତାୟାତ ବନ୍ଦ ହୋଇଯାଇଛି । ବହୁ ଘର କାନ୍ଥ ଭାଙ୍ଗି ଯାଇଥିବା ମଧ୍ୟ ଅଭିଯୋଗ ହୋଇଛି ।
