ନୂଆଦିଲ୍ଲୀ: ଭାରତ-ଚୀନ୍ ସୀମାବର୍ତ୍ତୀ ଅଞ୍ଚଳରେ ଶୁକ୍ରବାର ପ୍ରବଳ ତୁଷାରପାତ ହୋଇଛି । ଫଳରେ ସିକ୍କିମ୍‌ରେ ତାପମାତ୍ରା ହ୍ରାସ ପାଇଛି । ବିଭିନ୍ନ ଅଞ୍ଚଳରେ ପାରଦ ଶୂନ୍ୟକୁ ଖସିଯାଇଛି । ଏହା ସହ ରାସ୍ତାଗୁଡ଼ିକରେ ଯାତାୟାତ ବାଧାପ୍ରାପ୍ତ ହୋଇଥିବା ଜଣାପଡ଼ିଛି ।

ସକାଳ ଠାରୁ ନାଥୁଲା, କୁପୁପ୍ ଏବଂ ସୋମଗୋ (ଚାଙ୍ଗୁ) ହ୍ରଦ ଏବଂ ଏହାର ଆଖପାଖରେ ପ୍ରବଳରୁ ଅତି ପ୍ରବଳ ତୁଷାରପାତ ରେକର୍ଡ କରାଯାଇଛି। ଆଇଏମଡି ସିକ୍କିମ ପାଇଁ ରେଡ୍ ଆଲର୍ଟ ଜାରି କରିଛି । ଆଗାମୀ ୨୪ ଘଣ୍ଟା ମଧ୍ୟରେ ପାଗ ଆହୁରି ଖରାପ ହୋଇପାରେ ।

ବରଫ ଜମା ହୋଇଥିବାରୁ ପର୍ଯ୍ୟଟକମାନଙ୍କୁ ଉଚ୍ଚ ଅଞ୍ଚଳକୁ ଯାତ୍ରା ନକରିବାକୁ ପରାମର୍ଶ ଦେଇଛନ୍ତି ବିଭାଗୀୟ କର୍ତ୍ତୃପକ୍ଷ । ସୀମା ସଡ଼କ ସଂଗଠନ (BRO) ଟିମ୍‌ ବରଫ ସଫା କରିବା ପାଇଁ ନିରନ୍ତର କାର୍ଯ୍ୟ କରୁଛନ୍ତି।

ସେହଭଳି ଆଗାମୀ ୨୪ ଘଣ୍ଟା ମଧ୍ୟରେ ପଶ୍ଚିମବଙ୍ଗର ଅନେକ ଜିଲ୍ଲାରେ ମଧ୍ୟମ ଧରଣର ବର୍ଷା ହୋଇପାରେ ବୋଲି ସୂଚନା ଦେଇଛି ଆଇଏମଡି ।  ବାରାଣସୀ, ବଲିଆ ଏବଂ ମାଉ ସମେତ ଉତ୍ତର ପ୍ରଦେଶର ଅନେକ ଅଞ୍ଚଳରେ ବର୍ଷା ଯୋଗୁଁ କ୍ଷେତରେ ପାଣି ପଶିଛି ଏବଂ ଫସଲ କ୍ଷତିଗ୍ରସ୍ତ ହୋଇଛି।

ବାତ୍ୟା ମୋନ୍ଥା ପ୍ରଭାବରେ ଛତିଶଗଡ଼ରେ ପ୍ରବଳ ବର୍ଷା ଜାରି ରହିଛି। ଅନେକ ଟ୍ରେନର ଗତିପଥ ପରିବର୍ତ୍ତନ କରାଯାଇଛି ।  ଟ୍ରେନ୍‌ ଚଳାଚଳ ବିଳମ୍ବ ହେଉଛି । ଆଉ ଏଥିପାଇଁ କେରଳ, ଓଡ଼ିଶା, ତେଲେଙ୍ଗାନା, ମହାରାଷ୍ଟ୍ର ଏବଂ ଦିଲ୍ଲୀର ଯାତ୍ରୀମା​‌ନେ ହଇରାଣ ହେଉଥିବା ଜଣାପଡ଼ିଛି ।