ରାଜଗିର,୨୯/୦୮: ଶୁକ୍ରବାରଠୁ ବିହାରର ରାଜଗିରରେ ଆରମ୍ଭ ହେବ ହକି ଏସିଆ କପ୍ । ଚାମ୍ପିଅନ ଦଳ ୨୦୨୬ ହକି ବିଶ୍ୱକପ୍ ପାଇଁ ସିଧାସଳଖ ଯୋଗ୍ୟତା ହାସଲ କରିବେ । ଏଥିରେ ମୋଟ ୮ଟି ଦଳ ୨ଟି ଗ୍ରୁପ୍ (ଏ ଓ ବି)ରେ ଭାଗ ନେବେ । ଏଥର ପାକିସ୍ତାନ ଓ ଓମାନ ପ୍ରତିଯୋଗିତାରୁ ଓହରି ଯାଇଛନ୍ତି। ସେମାନଙ୍କ ସ୍ଥାନରେ ବାଂଲାଦେଶ ଓ କାଜାଖସ୍ତାନ ସାମିଲ ହୋଇଛନ୍ତି । ପୁଲ ଏ’ରେ ଭାରତ ସମେତ ଜାପାନ, ଚୀନ ଓ କାଜାଖସ୍ତାନ ଏବଂ ପୁଲ ବି’ରେ ବାଂଲାଦେଶ, ମାଲେସିଆ, କୋରିଆ ଓ ଚାଇନିଜ ତାଇପେ ରହିଛନ୍ତି ।
ପ୍ରଥମ ଦିବସରେ ୪ଟି ମ୍ୟାଚ୍ ରହିଛି । ପୁଲ୍-ଏ’ରେ ଜାପାନ-କାଜାଖସ୍ତାନ ଓ ଭାରତ-ଚୀନ ଏବଂ ପୁଲ୍-ବି’ରେ ମାଲେସିଆ-ବାଂଲାଦେଶ ଏବଂ ଦକ୍ଷିଣ କୋରିଆ-ଚାଇନିଜ ତାଇପେ’ ସାମ୍ନାସାମ୍ନି ହେବେ । ଭେଟେରାନ ଡ୍ରାଗ ଫ୍ଲିକର ହର୍ମନପ୍ରୀତ ସିଂ ପୂର୍ବଭଳି ଭାରତୀୟ ଦଳର ନେତୃତ୍ୱ ସମ୍ଭାଳିବେ । ଦଳରେ ୨ ଜଣ ଓଡ଼ିଆ ଅଲିମ୍ପିଆନ ଅମିତ ରୋହିଦାସ ଏବଂ ଫରୱାର୍ଡ ଶିଳାନନ୍ଦ ଲାକ୍ରା ସାମିଲ ରହିଛନ୍ତି । ନୀଲମ ସଞ୍ଜୀପ ଖେସ୍ ବିକଳ୍ପ ଖେଳାଳି ତାଲିକାରେ ସ୍ଥାନ ପାଇଛନ୍ତି ।
ଭାରତୀୟ ଦଳ: ଗୋଲକିପର-କ୍ରିଷନ ବାହାଦୂର ପାଠକ, ସୂରଜ କାରକେରା । ଡିଫେଣ୍ଡର-ସୁମିତ, ଜର୍ମନପ୍ରୀତ ସିଂ, ସଞ୍ଜୟ, ହର୍ମନପ୍ରୀତ ସିଂ, ଅମିତ ରୋହିଦାସ ଓ ଯୁଗରାଜ ସିଂ । ମିଡଫିଲ୍ଡର-ରାଜିନ୍ଦର ସିଂ, ରାଜ କୁମାର ପାଲ, ହାର୍ଦ୍ଦିକ ସିଂ, ହର୍ମନପ୍ରୀତ ସିଂ ଓ ବିବେକ ସାଗର ପ୍ରସାଦ । ଫରୱାର୍ଡ-ମନଦୀପ ସିଂ, ଶିଳାନନ୍ଦ ଲାକ୍ରା, ଅଭିଷେକ, ସୁଖଜିତ ସିଂ ଓ ଦିଲପ୍ରୀତ ସିଂ । ବିକଳ୍ପ ଖେଳାଳି-ନୀଲମ ସଞ୍ଜୀପ ଖେସ ।
