ନୂଆଦିଲ୍ଲୀ: ପହଲଗାମରେ ଆତଙ୍କବାଦୀ ଆକ୍ରମଣ ଏବଂ ନିର୍ଦ୍ଦୋଷ ଲୋକଙ୍କ ନିର୍ମମ ହତ୍ୟା ପାକିସ୍ତାନକୁ ବହୁତ ମହଙ୍ଗା ପଡ଼ିଛି । ଭାରତ ସରକାର ସିନ୍ଧୁ ନଦୀ ଜଳ ଚୁକ୍ତିନାମା ରଦ୍ଦ କରିଛି । ପାକିସ୍ତାନକୁ ପ୍ରତିଟି ବୁନ୍ଦା ପାଣି ପାଇଁ ବ୍ୟାକୁଳ କରିବା ପାଇଁ ବାଧ୍ୟ କରିଛି ଭାରତ । କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଶୁକ୍ରବାର ଏହି ପ୍ରସଙ୍ଗରେ କେନ୍ଦ୍ର ଜଳଶକ୍ତି ମନ୍ତ୍ରୀ ସି.ଆର. ପାଟିଲଙ୍କ ସହ ଏକ ବୈଠକ କରିଛନ୍ତି। ଦୁଇ ନେତାଙ୍କ ମଧ୍ୟରେ ହୋଇଥିବା ବୈଠକରେ ବିସ୍ତୃତ ଆଲୋଚନା ହୋଇଛି ।
ଅମିତ ଶାହ ଏବଂ ସି.ଆର. ପାଟିଲଙ୍କ ମଧ୍ୟରେ ହୋଇଥିବା ବୈଠକରେ ନିଷ୍ପତ୍ତି ନିଆଯାଇଛି ଯେ, ପାଣି ବନ୍ଦ କରିବା ପାଇଁ ପ୍ରତ୍ୟେକ ପଦ୍ଧତି ଉପରେ ତୁରନ୍ତ କାମ ଆରମ୍ଭ କରାଯିବ । ଦୁଇ ନେତାଙ୍କ ମଧ୍ୟରେ କ୍ଷଣସ୍ଥାୟୀ ଏବଂ ଦୀର୍ଘକାଳୀନ ରଣନୀତି ଉପରେ ମଧ୍ୟ ଆଲୋଚନା ହୋଇଛି । ସିନ୍ଧୁ ନଦୀ ଉପରେ ଶାହଙ୍କ ବୈଠକରେ କେବଳ ପାଟିଲ ଉପସ୍ଥିତ ଥିଲେ । ସିନ୍ଧୁ ଜଳ ଚୁକ୍ତି ରଦ୍ଦ ହେବା ପରେ ଏବେ ଭାରତ ନିଶ୍ଚିତ କରିବ ଯେମିତି ଗୋଟିଏ ବି ବୁନ୍ଦା ପାଣି ପାକିସ୍ତାନକୁ ନଯାଏ ।
ଗୃହମନ୍ତ୍ରୀ ଅମିତ ଶାହ ଏବଂ ସି.ଆର. ପାଟିଲଙ୍କ ମଧ୍ୟରେ ହୋଇଥିବା ବୈଠକରେ ସିନ୍ଧୁ ନଦୀର ଜଳ ବିଷୟରେ ବିସ୍ତୃତ ଆଲୋଚନା ହୋଇଛି । ସିନ୍ଧୁ ନଦୀର ପଙ୍କ ଉଦ୍ଧାର ଏବଂ ଖନନ କାର୍ଯ୍ୟ ତୁରନ୍ତ ଆରମ୍ଭ ହେବ । ପାଣିକୁ ଅନ୍ୟତ୍ର ପଠାଇବାର ରଣନୀତି ଉପରେ ମଧ୍ୟ ବିସ୍ତୃତ ଆଲୋଚନା ହୋଇଥିବା ଜଣାପଡ଼ିଛି । ଏହି ପାଣିକୁ ଜଳ ଅଭାବର ସମ୍ମୁଖୀନ ହେଉଥିବା ନଦୀଗୁଡ଼ିକୁ ପଠା ଯାଇପାରେ । ସିନ୍ଧୁ ନଦୀର ଜଳକୁ ଜଳସେଚନ ଲାଗି କିଭଳି ବ୍ୟବହାର କରାଯାଇ ପାରିବ ଏବଂ ବନ୍ଧ ନିର୍ମାଣ ବିଷୟରେ ବୈଠକରେ ଆଲୋଚନା ହୋଇଛି ।
ଭାରତ ସରକାର ୧୯୬୦ ସିନ୍ଧୁ ଜଳ ଚୁକ୍ତିନାମାକୁ ତତ୍କାଳ ପ୍ରଭାବରେ ରଦ୍ଦ ଘୋଷଣା କରିଛନ୍ତି। ଭାରତ ଗୁରୁବାର ପାକିସ୍ତାନକୁ ଏ ସମ୍ପର୍କରେ ଏକ ଆନୁଷ୍ଠାନିକ ଚିଠି ମଧ୍ୟ ଜାରି କରିଛି । ଚିଠିରେ ସ୍ପଷ୍ଟ କରାଯାଇଛି ଯେ, ଭାରତ ସରକାର ସମ୍ପୂର୍ଣ୍ଣ ବିଚାର ବିମର୍ଶ ପରେ ଚୁକ୍ତିନାମାକୁ ରଦ୍ଦ କରିବାକୁ ନିଷ୍ପତ୍ତି ନେଇଛନ୍ତି । ୧୯୬୦ରେ ଭାରତ ଏବଂ ପାକିସ୍ତାନ ମଧ୍ୟରେ ସିନ୍ଧୁ ଜଳ ଚୁକ୍ତି ସ୍ୱାକ୍ଷରିତ ହୋଇଥିଲା। ଏହି ଚୁକ୍ତି ଅନୁଯାୟୀ, ପାକିସ୍ତାନକୁ ସିନ୍ଧୁ, ଝେଲମ୍ ଏବଂ ଚେନାବର ଜଳ ଅଧୀକାର ମିଳିଥିଲା ଏବଂ ଭାରତକୁ ରବି, ବ୍ୟାସ୍ ଏବଂ ସତଲେଜର ଜଳ ଅଧୀକାର ମିଳିଥିଲା । ପାକିସ୍ତାନର ପ୍ରାୟ ୮୦% କୃଷି ସିନ୍ଧୁ ନଦୀର ଜଳ ପ୍ରଣାଳୀ ଉପରେ ନିର୍ଭର କରେ । ସିନ୍ଧୁ ଜଳ ଚୁକ୍ତିନାମା ଉପରେ ଭାରତର ପ୍ରତିବନ୍ଧକ ପାକିସ୍ତାନରେ ଜଳ ସଙ୍କଟ ସୃଷ୍ଟି କରିବ ଏବଂ କୃଷି ଉପରେ ପ୍ରଭାବ ପକାଇବ ।
