ନୂଆଦିଲ୍ଲୀ: ଭାରତ ଆସୁଛନ୍ତି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ୍। ସନ୍ଧ୍ୟାରେ ଦିଲ୍ଲୀରେ ପହଞ୍ଚିବେ ପୁଟିନ। ତେବେ ପୁଟିନଙ୍କ ଭାରତ ଗସ୍ତ ପୂର୍ବରୁ ଦିଲ୍ଲୀର ହୋଟେଲ ଶିଳ୍ପ ଗୁଡିକରେ ହଠାତ୍ ହଇଚଇ ସୃଷ୍ଟି ହୋଇଛି। ରାଜଧାନୀରେ ବିଳାସପୂର୍ଣ୍ଣ ହୋଟେଲ ବୁକିଂ ପାଇଁ ଭିଡ଼ ଯୋଗୁଁ ସମସ୍ତ ପଞ୍ଚ ତାରକା ହୋଟେଲ ଗୁଡ଼ିକର ରୁମ୍ ଦର ଦ୍ବିଗୁଣିତ ହୋଇଛି। କିଛି ଦିନ ପୂର୍ବରୁ ଯେଉଁ ରୁମ୍ ଗୁଡିକ ପ୍ରତି ରାତି ପାଇଁ ୫୦ ହଜାରରୁ ୮୦ ହଜାର ଟଙ୍କାରେ ଉପଲବ୍ଧ ହେଉଥିଲା, କିନ୍ତୁ ଏବେ ଏହା ୧ ଲକ୍ଷରୁ ୧ ଲକ୍ଷ ୩୦ ହଜାର ଟଙ୍କାରେ ବୁକ୍ କରାଯାଉଛି। ଏହି ଦରକୁ ଦେଖିଲେ ଦିଲ୍ଲୀରେ ଏବେ ହୋଟେଲ ରହଣି ବହୁତ ମହଙ୍ଗା ହୋଇଛି।
କେଉଁଠି ରହିବେ ପୁଟିନ୍ ?...
ଏକ ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ପୁଟିନ ଆଇଟିସି ମୌର୍ଯ୍ୟରେ ୪୭୦୦ ବର୍ଗଫୁଟ ବିଶିଷ୍ଟ ବିଳାସପୂର୍ଣ୍ଣ ଗ୍ରାଣ୍ଡ ପ୍ରେସିଡେନ୍ସିଆଲ୍ ସୁଟ୍ରେ ରହିବେ। ଏହି ସୁଟ୍ର ଏକ ସ୍ୱତନ୍ତ୍ର ଇତିହାସ ମଧ୍ୟ ଅଛି, କାରଣ ଏହା ସେହି କୋଠରୀ ଯେଉଁଠାରେ ଡୋନାଲ୍ଡ ଟ୍ରମ୍ପ, ଜୋ ବାଇଡେନ ଏବଂ ବିଲ୍ କ୍ଲିଣ୍ଟନଙ୍କ ଭଳି ଆମେରିକୀୟ ରାଷ୍ଟ୍ରମୁଖ୍ୟ ମାନେ ରହିଥିଲେ। ସୁଟ୍ରେ ଦୁଇଟି ଶୟନ କକ୍ଷ, ଏକ ଅଧ୍ୟୟନ, ଏକ ସ୍ୱାଗତ କ୍ଷେତ୍ର, ଏକ 12-ସିଟର ଡାଇନିଂ ରୁମ୍, ଏକ ମିନି-ସ୍ପା, ଏକ ଜିମ୍ ଏବଂ ଅନେକ ଉଚ୍ଚସ୍ତରୀୟ ସୁବିଧା ରହିଛି। ହୋଟେଲର ପ୍ରିମିୟମ୍ ରେଷ୍ଟୁରାଣ୍ଟ ବୁଖାରା ଏବଂ ଦମ୍-ପୁଖ୍ତକୁ, ପୁଟିନ୍ ଏବଂ ତାଙ୍କ ଦଳ ପାଇଁ ସ୍ୱତନ୍ତ୍ର ଭାବରେ ପ୍ରସ୍ତୁତ କରାଯାଇଛି।
କାହିଁକି ବଢିଲା ହୋଟେଲ ଦର ?...
ସୂତ୍ର ଅନୁସାରେ ପୁଟିନ୍ଙ୍କ ସମଗ୍ର ପ୍ରତିନିଧି ଦଳ ପୂର୍ବରୁ ନିକଟସ୍ଥ ହୋଟେଲ ବୁକ୍ କରିସାରିଛନ୍ତି। ତାଜ୍ ପ୍ୟାଲେସ୍, ଓବେରୟ, ଲୀଲା ଓର୍ ମୌର୍ଯ୍ୟ ସମେତ ଦିଲ୍ଲୀର ସମସ୍ତ ପ୍ରମୁଖ ପାଞ୍ଚ ତାରକା ହୋଟେଲରେ ଏହି ସପ୍ତାହାନ୍ତ ପାଇଁ କୌଣସି ରୁମ୍ ଖାଲି ନାହିଁ। ହୋଟେଲ ଅଧିକାରୀ ମାନେ କହିଛନ୍ତି ଯେ ସୁରକ୍ଷା, ପ୍ରୋଟୋକଲ୍ ଏବଂ ବିଦେଶୀ ପ୍ରତିନିଧି ଦଳଙ୍କ ଚାହିଦା ଦରକୁ ରେକର୍ଡ ସ୍ତରକୁ ଠେଲି ଦେଇଛି।
ହୋଟେଲରେ କ’ଣ ଖାଇବେ ପୁଟିନ୍ ?
ରିପୋର୍ଟ ଅନୁଯାୟୀ, ପୁଟିନ୍ଙ୍କ ବିଦେଶ ଗସ୍ତ ସମୟରେ ଖାଦ୍ୟ ବହୁସ୍ତରୀୟ ସୁରକ୍ଷା ଏବଂ ଯାଞ୍ଚ ଅଧୀନରେ ରହିଥାଏ। ତାଙ୍କ ଦଳ ସବୁଜ ସଙ୍କେତ ନଦେବା ପର୍ଯ୍ୟନ୍ତ ତାଙ୍କ ପାଖରେ କିଛି ପରିବେଷଣ କରାଯାଏ ନାହିଁ। ତାଙ୍କର ବ୍ରେକଫାଷ୍ଟ ବହୁତ ସରଳ, ବ୍ୟାୟାମ ପରେ, ସେ ପ୍ରୋଟିନ୍ ପାଇଁ ଷ୍ଟେକ୍ ଏବଂ କ୍ୱେଲ ଅଣ୍ଡା ଖାଆନ୍ତି । ତାଙ୍କର ହାଲୁକା ମିଠା ଖାଇବାକୁ ପସନ୍ଦ, ଏବଂ ପିସ୍ତା-ସ୍ବାଦଯୁକ୍ତ ଆଇସ୍କ୍ରିମ୍ ତାଙ୍କର ପ୍ରିୟ ବୋଲି ଜଣାପଡିଛି । ସେ ସାଧାରଣତଃ ମଦ୍ୟପାନରୁ ଦୂରେଇ ରହନ୍ତି, ଏବଂ ଗ୍ରୀନ୍ ଟି ତାଙ୍କର ପ୍ରିୟ ପାନୀୟ।
ଭାରତ-ରୁଷ ସମ୍ପର୍କ ଏବେ କାହିଁକି ଗୁରୁତ୍ବପୂର୍ଣ୍ଣ ?
ୟୁକ୍ରେନ ଯୁଦ୍ଧ ପରେ ପୁଟିନଙ୍କ ଏହା ପ୍ରଥମ ଭାରତ ଗସ୍ତ, ଯାହା ଏହାର କୂଟନୈତିକ ଗୁରୁତ୍ୱକୁ ଯଥେଷ୍ଟ ବୃଦ୍ଧି କରିଛି। ଦୁଇ ଦେଶ ମଧ୍ୟରେ ବାଣିଜ୍ୟ, ସ୍ୱାସ୍ଥ୍ୟ, ଶିକ୍ଷା ଏବଂ ପ୍ରତିରକ୍ଷା ସହିତ ଜଡିତ ଅନେକ ଗୁରୁତ୍ୱପୂର୍ଣ୍ଣ ଚୁକ୍ତି ହୋଇପାରେ ବୋଲି ଆଲୋଚନା ହେଉଛି।
