ଭୁବନେଶ୍ୱର,୦୮/୦୨: କୁମ୍ଭାରୀ ଛକରେ ବୋମାମାଡ । ସ୍ତ୍ରୀର ଚରିତ୍ରକୁ ସନ୍ଦେହ କରି ବୋମା ଫୋପାଡ଼ିଲା ସ୍ୱାମୀ । ସ୍ତ୍ରୀ କାମ କରୁଥିବା ଦୋକାନ ମାଲିକଙ୍କ ଉପରକୁ ସ୍ୱାମୀ ଫୋପାଡିଲା ଗୋଡି ବୋମା । ଦୁର୍ଘଟଣାରେ ଆହତ ହେଲେ ଦୋକାନ ମାଲିକ ସନ୍ତୋଷ । ନୟାଗଡ଼ ଜିଲ୍ଲା ରାଜସୁନାଖଳା ଫାଣ୍ଡି ଅନ୍ତର୍ଗତ କୁମ୍ଭାରୀ ଛକରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ସନ୍ତୋଷ ରାଜସୁନାଖଳାର କୁମ୍ଭାରୀ ଛକରେ କରିଥିବା ବର୍ଷା ଆଇସ୍ ପାର୍ଲରରେ ବୋଲଗଡ ଥାନା ଅଞ୍ଚଳର ବିକାଶଙ୍କ ସ୍ତ୍ରୀ କାମ କରନ୍ତି । ବିକାଶ ଏବଂ ତାଙ୍କ ସ୍ତ୍ରୀଙ୍କ ମଧ୍ୟରେ ଛାଡପତ୍ର ପାଇଁ ଆବେଦନ ହୋଇଥିବା ଜଣାପଡିଛି । ସନ୍ତୋଷ ଏବଂ ବିକାଶଙ୍କ ସ୍ତ୍ରୀଙ୍କ ମଧ୍ୟରେ ଅନୈତିକ ସମ୍ପର୍କ ରହିଥିବା ବିକାଶ ସନ୍ଦେହ କରୁଥିଲେ । ଶେଷରେ ଶୁକ୍ରାବାର ରାତି ପ୍ରାୟ ୧୧ଟା ୩୦ ସମୟରେ ସନ୍ତୋଷ ଦୋକାନ ବନ୍ଦ କରି ଯାଉଥିବା ସମୟରେ ତାଙ୍କ ଉପରକୁ ହଠାତ୍ ଗୋଡିବୋମା ଫୋପାଡିଦେଇ ପଳାଇଥିଲେ ବିକାଶ । ଏଥିରେ ସନ୍ତୋଷଙ୍କ ଦୁଇଗୋଡରେ ଆଘାତ ଲାଗିଛି । ଏହା ଦେଖି ସ୍ଥାନୀୟ ଲୋକମାନେ ସନ୍ତୋଷଙ୍କୁ ଉଦ୍ଧାର କରି ମେଡିକାଲ୍ ନେଇଥିଲେ । ପରେ ଏନେଇ ଖବର ପାଇବା ପରେ ରାଜସୁନାଖଳା ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ ମଧ୍ୟ ଅଭିଯୁକ୍ତକୁ ଏପର୍ଯ୍ୟନ୍ତ ଧରିପାରିନାହଁ ।
