ନୂଆଦିଲ୍ଲୀ: ୨୭ ବର୍ଷ ପରେ ହଜିଲା ସ୍ୱାମୀଙ୍କୁ ମହାକୁମ୍ଭରେ ଠାବ କରିଛନ୍ତି ପରିବାର। ଏହା କୌଣସି ଚଳଚ୍ଚିତ୍ରର କାହାଣୀ ନୁହେଁ। ସତରେ ଏପରି ଘଟିଛି ଚଳିତ ମହାକୁମ୍ଭ ମେଳାରେ। ଝାରଖଣ୍ଡର ଜଣେ ମହିଳା ଦୀର୍ଘ ୨୭ ବର୍ଷ ପୂର୍ବେ ଧାନବାଦରେ ନିଜ ଠାରୁ ଅଲଗା ହେଇଯାଇଥିବା ସ୍ୱାମୀଙ୍କୁ ଜଣେ ଅଘୋରୀ ସାଧୁ ରୁପେ ମହାକୁମ୍ଭରେ ଭେଟିଛନ୍ତି।
ସୂଚନା ମୁତାବକ, ଝାରଖଣ୍ଡର ଏକ ପରିବାର ନିକଟରେ କୁମ୍ଭ ମେଳା ବୁଲିବାକୁ ଯାଇଥିଲେ। କୁମ୍ଭମେଳାରେ ପରିବାର ଲୋକମାନେ ବୁଲୁଥିବା ବେଳେ ୨୭ ବର୍ଷ ତଳେ ପରିବାରଠୁ ଅଳଗା ହୋଇଯାଇଥିବା ଜଣେ ସଦସ୍ୟ ଗଙ୍ଗାସାଗରଙ୍କ ଭଳି ଜଣେ ନାଗା ସାଧୁ ଦେଖାଯାଇଥିଲେ। କୌତୁହଳ ବଶତଃ ସେମାନେ ସେଠାରେ ଅଟକି ସମ୍ପୃକ୍ତ ସାଧୁଙ୍କ ଫଟୋ ଉଠାଇ ଘରକୁ ପଠେଇଥିଲେ। ପରେ ସେମାନେ ଘରକୁ ଫେରିବା ପରେ ଗଙ୍ଗାସାଗରଙ୍କ ପତ୍ନୀ ଧନୱା ଦେବୀ ଉକ୍ତ ଫଟୋକୁ ଦେଖି କପାଳରେ ଥିବା ଚିହ୍ନ, ଆଣ୍ଠୁରେ ଥିବା କ୍ଷତ ଚିହ୍ନ ଦେଖି ସମ୍ପୃକ୍ତ ବ୍ୟକ୍ତି ଜଣଙ୍କ ଗଙ୍ଗାସାଗର ବୋଲି ଚିହ୍ନଟ କରିଥିଲେ। ପରେ ଧନୱା ଦେବୀଙ୍କ ସହ ତାଙ୍କ ପୁଅ କମଳେଶ ଓ ବିମଳେଶ ଏବଂ ଗଙ୍ଗାସାଗରଙ୍କ ଭାଇ ମୁରଲି ଯାଦବ ତାଙ୍କୁ ଖୋଜିବାକୁ ଯାଇ କୁମ୍ଭ ମେଳାରେ ପହଞ୍ଚିଥିଲେ।
ତେବେ ୬୫ ବର୍ଷିୟ ଗଙ୍ଗାସାଗର ବର୍ତ୍ତମାନ ବାବା ରାଜକୁମାର ନାମରେ ଅଘୋରୀ ସାଧୁ ଭାବରେ କୁମ୍ଭ ମେଳାରେ ଯୋଗ ଦେଇଛନ୍ତି। ତେବେ ପରିବାର ଲୋକମାନେ ତାଙ୍କ ପାଖରେ ପହଞ୍ଚି ନିଜ ପରିଚୟ ଦେବାପରେ ସିଏ ନିଜ ପୂର୍ବ ପରିଚୟ ଦେବାକୁ ମନାକରିଦେଇଥିଲେ। ସେ ବାରଣାସୀରୁ ଆସିଥିବା ବେଳେ ସେ କୌଣସି ଗଙ୍ଗାସାଗର ଯାଦବଙ୍କୁ ଜାଣିନାହାନ୍ତି ବୋଲି କହିଥିଲେ।
ସେ ନିଜ ସମ୍ପର୍କରେ କୌଣସି ତଥ୍ୟ ଦେବାକୁ ମନା କରିବାରୁ ପରିବାର ଲୋକ କୁମ୍ଭମେଳା ପୋଲିସ ନିକଟରେ ପହଞ୍ଚିଥିଲେ। ତାଙ୍କ ଡିଏନଏ ଟେଷ୍ଟ କରିବାକୁ ସେମାନେ ଦାବି ଧରି ପୋଲିସ ପାଖରେ ଅଡି ବସିଥିଲେ। ଧନୱା ଦେବୀ ତାଙ୍କ ସ୍ୱାମୀଙ୍କୁ ତାଙ୍କୁ ଫେରାଇ ଦେବାକୁ ସରକାର ସହଯୋଗ କରନ୍ତୁ ବୋଲି କହି କାନ୍ଦି ଉଠିଥିଲେ।
୨୭ ବର୍ଷ ପୂର୍ବେ ଗାଁରେ ଦାଦାଙ୍କ ପୁଅର ବାହାଘର ଚାଲିଥିବା ବେଳେ ଗଙ୍ଗାସାଗର ଜଣଙ୍କ ପାଇଁ ଶାଢୀ ଆଣିବାକୁ ବଜାର ଜାଇଥିଲେ। ହେଲେ ସେବେଠୁ ସେ ଆଉ ଘରକୁ ଫେରିନଥିଲେ। ପରିବାରର ଜଣେ ସଦସ୍ୟ ନିକଟରେ କୁମ୍ଭମେଳା ଯାଇଥିଲେ। ସେଠାରେ ଜଣେ ସାଧୁ ଗଙ୍ଗାସାଗରଙ୍କ ଭଳି ଦେଖାଯାଉଥିବାରୁ ସେ ତାଙ୍କ ଫଟୋ ଉଠାଇ ଘରକୁ ପଠାଇଥିଲେ। ତେବେ ତାଙ୍କ ଫଟୋ ଦେଖି ତାଙ୍କ ସ୍ତ୍ରୀ ସେ ଗଙ୍ଗାସାଗର ବୋଲି ଚିହ୍ନଟ କରିଥିଲେ।
ତେବେ ଡିଏନଏ ଟେଷ୍ଟ ପରେ ତାଙ୍କ ପ୍ରକୃତ ପରିଚୟ ଜଣାପଡିବ ବୋଲି ପରିବାର ଲୋକ ଆଶାବାଦୀ ରହିଛନ୍ତି। ତେବେ ଅପେକ୍ଷା କରିକରି ପରିବାରର କିଛି ସଦସ୍ୟ ଘରକୁ ଫେରିଥିବା ବେଳେ ଆଉ କିଛି ସଦସ୍ୟ କୁମ୍ଭ ମେଳାରେ ରହି ତାଙ୍କ ଉପରେ ନଜର ରଖିଛନ୍ତି ବୋଲି ସୂଚନା ମିଳିଛି।
