କବିସୂର୍ଯ୍ୟନଗର,୧୯/୦୪: କବିସୂର୍ଯ୍ୟନଗର ବ୍ଲକ୍ ମହାଛାଇ ନିକଟରେ ଶନିବାର ବିଳମ୍ବିତ ସନ୍ଧ୍ୟାରେ ମିଳିତ ଚଢ଼ଉ କରି ୧୩ଟି ବାଲି ବୋଝେଇ ଟ୍ରାକ୍ଟରକୁ ଜବତ କରାଯାଇଛି । ମହାଛାଇ ବାଲିଘାଟରେ ପୂର୍ବରୁ ପ୍ରଶାସନ ତରଫରୁ ବେଆଇନ ବାଲି ଚାଲାଣକୁ ରୋକିବା ପାଇଁ ୧୬୩ ଧାରା ଜାରି କରାଯାଇଥିଲା । ହେଲେ ମାଫିଆମାନେ ଏହାକୁ ଉଲ୍ଲଂଘନ କରି ବାଲିଚାଲାଣ ଜାରି ରଖିଥିଲେ । ଏହି ସୂଚନା ପାଇ ଖଣି ବିଭାଗ, ପୁଲିସ ଓ ତହସିଲ ପ୍ରଶାସନ ମିଳିତ ଭାବେ ଚଢ଼ଉ କରିଥିଲେ । ବାଲି ବୋଝେଇ ହୋଇ ରହିଥିବା ୧୩ ଟ୍ରାକ୍ଟର୍ ଜବତ କରାଯାଇଥିଲା । ତେବେ ଚାଳକମାନେ ଫେରାର ହୋଇଯିବାରେ ସକ୍ଷମ ହୋଇଥିଲେ । ଗାଡ଼ିଗୁଡ଼ିକୁ ଜବତ କରି ଥାନାକୁ ଅଣାଯିବା ସହ ଅଧିକ ତଦନ୍ତ କରାଯାଉଥିବା ପ୍ରୋବେସନାରୀ ଆଇପିଏସ୍ ଅଧିକାରୀ ନିତେଶ କୁମାର ମିଶ୍ର ସୂଚନା ଦେଇଛନ୍ତି ।
ସୂଚନା ଅନୁସାରେ କବିସୂର୍ଯ୍ୟନଗର ଥାନା ଅଧିନ ମହାଛାଇ ଗ୍ରାମ ପାଖ ଋଷୁକୂଲ୍ୟା ନଦୀରୁ ବେଆଇନ ବାଲି ଚାଲାଣ ହେଉଥିବା ପ୍ରଶାସନ ଖବର ପାଇ ଅତର୍କିତ ଚଢ଼ାଉ କରିଥିଲା । ନଦୀ ମଧ୍ୟରେ ୧୩ରୁ ଅଧିକ ଟ୍ରାକ୍ଟରରେ ବାଲି ଲଦା ଚାଲିଥିବା ଦେଖି ଅଫିସର ଚଢ଼ାଉ କରିଥିଲେ l ପ୍ରଶାସନର ଚଢାଉ ବେଳେ ଖବରପାଇ ମାଫିଆମାନେ ଛତ୍ରଭଙ୍ଗ ଦେଇଥିଲେ। ହେଲେ ଛାଡ଼ି ଯାଇଥିବା ଟ୍ରାକ୍ଟର ଗୁଡିକୁ ଜବତ କରାଯାଇଛି l ଏନେଇ ପୁରୁଷୋତ୍ତମପୁର ମାଇନିଂ ଅଧିକାରୀଙ୍କ ପକ୍ଷରୁ ଥାନାରେ ଲିଖିତ ଅଭିଯୋଗ କରାଯାଇଛି। କବିସୂର୍ଯ୍ୟନଗର ଥାନା ଅଧିକାରୀଙ୍କ ସମେତ ପୁରୁଷୋତ୍ତମପୁର ତହସିଲଦାର,ମାଇନିଙ୍ଗ ଅଧିକାରୀ ଏବଂ କବିସୂର୍ଯ୍ୟନଗର ମାଇନିଙ୍ଗ ଅଧିକାରୀ ସାମିଲ ଥିବା ଜଣାପଡିଛି।
