ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ଵାରା ଭାରତୀୟ ସାମଗ୍ରୀ ଉପରେ ୫୦% ଟାରିଫ୍ ଲଗାଯିବା ପରେ ଆମାଜନ, ଓ୍ଵାଲମାର୍ଟ, ଟାର୍ଗେଟ ଏବଂ ଗ୍ୟାପ୍ ଭଳି ପ୍ରମୁଖ ଆମେରିକୀୟ ରିଟେଲ କମ୍ପାନୀମାନେ ଭାରତରୁ ସାମଗ୍ରୀ ଆମଦାନୀ କରିବା ବନ୍ଦ କରିଛନ୍ତି । ଏହି ନିଷ୍ପତ୍ତି ଭାରତର ଟେକ୍ସଟାଇଲ ଏବଂ ପୋଷାକ ରପ୍ତାନୀ କ୍ଷେତ୍ର ପାଇଁ ଏକ ବଡ଼ ଆଘାତ ହେବ ବୋଲି ଆଶଙ୍କା କରାଯାଉଛି ।
ସୂତ୍ର ଅନୁଯାୟୀ, ଆମେରିକୀୟ କ୍ରେତାମାନେ ଭାରତୀୟ ରପ୍ତାନୀକାରୀମାନଙ୍କୁ ଇମେଲ ଏବଂ ଚିଠି ଜରିଆରେ ପୋଷାକ ଏବଂ ଟେକ୍ସଟାଇଲ ଚାଲାଣ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରଖିବାକୁ ନିର୍ଦ୍ଦେଶ ଦେଇଛନ୍ତି । ଆମେରିକୀୟ କମ୍ପାନୀମାନେ ଏହି ବୃଦ୍ଧି ପାଇଥିବା ଟାରିଫର ଅତିରିକ୍ତ ଖର୍ଚ୍ଚ ବହନ କରିବାକୁ ଅନିଚ୍ଛୁକ ଥିବାରୁ ଭାରତୀୟ ରପ୍ତାନୀକାରୀମାନଙ୍କୁ ଏହାର ଆର୍ଥିକ ଭାର ଗ୍ରହଣ କରିବାକୁ କୁହାଯାଇଛି। ଏହି ଟାରିଫ ହେତୁ ରପ୍ତାନୀ ଖର୍ଚ୍ଚ ୩୦-୩୫% ବୃଦ୍ଧି ପାଇବ ବୋଲି ଅନୁମାନ କରାଯାଉଛି, ଯାହା ଆମେରିକାକୁ ରପ୍ତାନୀ ହେଉଥିବା ଅର୍ଡରରେ ୪୦-୫୦% ହ୍ରାସ ଘଟାଇପାରେ।
ଏହା ଫଳରେ ଭାରତୀୟ ଟେକ୍ସଟାଇଲ ଶିଳ୍ପକୁ ପ୍ରାୟ ୪-୫ ବିଲିୟନ ଡଲାରର କ୍ଷତି ହେବାର ଆଶଙ୍କା ରହିଛି। ଓ୍ଵେଲସ୍ପନ ଲିଭିଂ, ଗୋକୁଳଦାସ ଏକ୍ସପୋର୍ଟସ, ଇଣ୍ଡୋ କାଉଣ୍ଟ ଏବଂ ଟ୍ରାଇଡେଣ୍ଟ ଭଳି ପ୍ରମୁଖ ରପ୍ତାନୀକାରୀ କମ୍ପାନୀମାନେ ତାଙ୍କର ୪୦-୭୦% ବିକ୍ରୟ ଆମେରିକା ବଜାରରୁ ପାଇଥାନ୍ତି। ଏହି ନିଷ୍ପତ୍ତି ଯୋଗୁଁ ଭାରତୀୟ ରପ୍ତାନୀକାରୀମାନେ ବାଂଲାଦେଶ ଏବଂ ଭିଏତନାମ ଭଳି ଦେଶମାନଙ୍କୁ ଅର୍ଡର ହରାଇବାର ଆଶଙ୍କା କରୁଛନ୍ତି। କାରଣ ଏହି ଦେଶମାନଙ୍କ ଉପରେ ଆମେରିକାରେ ମାତ୍ର ୨୦% ଟାରିଫର ସମ୍ମୁଖୀନ ହେଉଛନ୍ତି।
ଟ୍ରମ୍ପଙ୍କ ଏହି ଟାରିଫ୍ ନିଷ୍ପତ୍ତି ଭାରତର ରୁଷିଆରୁ ତୈଳ ଆମଦାନୀକୁ କେନ୍ଦ୍ର କରି ନିଆଯାଇଛି । ବୁଧବାର ସ୍ଵାକ୍ଷରିତ ଏକ ଏକ୍ସିକ୍ୟୁଟିଭ ଅର୍ଡରରେ ଟ୍ରମ୍ପ କହିଛନ୍ତି ଯେ, ଭାରତର ରୁଷିଆରୁ ତୈଳ ଆମଦାନୀ ଆମେରିକାର ଜାତୀୟ ସୁରକ୍ଷା ପାଇଁ ଏକ “ଅସାଧାରଣ ବିପଦ” ସୃଷ୍ଟି କରୁଛି। ଏହାର ପ୍ରତିକାର ସ୍ଵରୂପ, ପ୍ରଥମେ ୨୫% ଟାରିଫ ଲାଗୁ କରାଯାଇଥିଲା ଏବଂ ଏବେ ଅତିରିକ୍ତ ୨୫% ଯୋଗ କରାଯାଇଛି, ଯାହା ମୋଟ ଟାରିଫକୁ ୫୦% କରିଛି।
ଭାରତ ସରକାର ଏହି ଟାରିଫକୁ “ଅନ୍ୟାୟ, ଅଯୌକ୍ତିକ ଏବଂ ଅଗ୍ରହଣୀୟ” ବୋଲି ବର୍ଣ୍ଣନା କରିଛନ୍ତି। ବୈଦେଶିକ ମନ୍ତ୍ରଣାଳୟ କହିଛି ଯେ, ଭାରତର ତୈଳ ଆମଦାନୀ ବଜାର ଆଧାରିତ ଏବଂ ୧.୪ ବିଲିୟନ ଜନସଂଖ୍ୟାର ଶକ୍ତି ସୁରକ୍ଷା ନିଶ୍ଚିତ କରିବା ପାଇଁ କରାଯାଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ ଉଚ୍ଚସ୍ତରୀୟ କ୍ୟାବିନେଟ୍ ବୈଠକ ଡକାଇଛନ୍ତି ଯେଉଁଥିରେ ଏହି ଟାରିଫର ପ୍ରଭାବ ଏବଂ ରପ୍ତାନୀକାରୀମାନଙ୍କୁ ସମର୍ଥନ ପାଇଁ ସମ୍ଭାବ୍ୟ ପଦକ୍ଷେପ ଉପରେ ଆଲୋଚନା କରାଯିବ।
ଏହି ପରିସ୍ଥିତି ଭାରତ-ଆମେରିକା ବାଣିଜ୍ୟ ସମ୍ପର୍କରେ ନୂଆ ଉତ୍ତେଜନା ସୃଷ୍ଟି କରିଛି। ଶିଳ୍ପ ବିଶେଷଜ୍ଞମାନେ ଆଶଙ୍କା କରୁଛନ୍ତି ଯେ, ଏହା ଦୀର୍ଘମିଆଦୀ ପ୍ରଭାବ ପକାଇପାରେ ଏବଂ ଭାରତୀୟ ରପ୍ତାନୀକୁ ଅନ୍ୟ ଦେଶମାନଙ୍କ ସହ ପ୍ରତିଯୋଗିତାରେ ପଛରେ ପକାଇ ଦେଇପାରେ।
