ନୂଆଦିଲ୍ଲୀ,୦୪/୧୧: ଆମେରିକାରେ ଆୟୋଜିତ ୧୯ବର୍ଷରୁ କମ୍ ବକ୍ସିଂ ବିଶ୍ୱ ଚାମ୍ପିଅନସିପ୍ରେ ଭାରତ ମୋଟ ୧୭ ପଦକ ସହ ଅଭିଯାନ ଶେଷ କରିଛି । ସେଥିମଧ୍ୟରେ ୪ ସ୍ୱର୍ଣ୍ଣ, ୮ ରୌପ୍ୟ, ୫ ବ୍ରୋଞ୍ଜ ପଦକ ସାମିଲ ରହିଛି । ରବିବାର ଅନ୍ତିମ ଦିବସରେ ଭାରତକୁ ୩ଟି ସ୍ୱର୍ଣ୍ଣ ସହ ମୋଟ ୬ଟି ପଦକ ମିଳିଥିଲା ।
ମହିଳା ବକ୍ସର ପାର୍ଥବୀ ଗ୍ରେୱାଲ, ବଂଶିକା ଗୋସ୍ୱାମୀ ଓ ପୁରୁଷ ବକ୍ସର ହେମନ୍ତ ସାଙ୍ଗୱାନ ସ୍ୱର୍ଣ୍ଣ ପଦକ ଭେଟି ଦେଇଥିଲେ । ମହିଳା ୬୫କିଲୋ ବର୍ଗ ଫାଇନାଲ୍ରେ ପାର୍ଥବୀ ନେଦରଲାଣ୍ଡ୍ସର ଆଲିୟା ହୋପେମାଙ୍କୁ, ବଂଶିକା (୮୦ରୁ ଊଦ୍ଧ୍ୱର୍ କିଲୋ) ଜର୍ମାନୀର ଭିକ୍ଟୋରିଆ ଗାଟ୍ଙ୍କୁ ଏବଂ ହେମନ୍ତ (୯୦କିଲୋ) ୪-୧ରେ ଆମେରିକାର ରିଶନ ସିମ୍ସଙ୍କୁ ପରାଜିତ କରିଥିଲେ । ମାତ୍ର ନିଶା (୫୧କିଲୋ), ସୁପ୍ରିୟା ଦେବୀ (୫୪କିଲୋ) ଓ କ୍ରିତିକା ୱାସନ (୮୦କିଲୋ) ଫାଇନାଲ୍ରେ ହାରି ରୌପ୍ୟରେ ସନ୍ତୁଷ୍ଟ ହୋଇଥିଲେ । ଏହି ଚାମ୍ପିଅନସିପ୍ରେ ଭାରତୀୟ ମହିଳା ବକ୍ସର ୩ଟି ସ୍ୱର୍ଣ୍ଣ ଓ ୭ଟି ରୌପ୍ୟ ଏବଂ ପୁରୁଷ ବକ୍ସର ୧ସ୍ୱର୍ଣ୍ଣ, ୧ରୌପ୍ୟ ଏବଂ ୫ବ୍ରୋଞ୍ଜ ପଦକ ହାସଲ କରିଥିଲେ ।
